Tona va thonono, batu bansambilanga zinzambi ziwombo. Vayi Kibibila kintubila to Nzambi yimueka ‘wulutidi na zinzambi zioso zinkaka.’ (2 Lusansu 2:5) Nani Nzambi? Ayi kibila mbi nandi kalutidi na zinzambi zioso zinkaka batu bambuongiminanga? Nzambi wuntomba muingi ngie wulonguka matedi nandi. Mawu tuemmona mu dilongi adidi.

1. Dizina di Nzambi nani ayi mbi bimmonisa ti nandi wuntomba befu tuzaba dizina beni?

Mu Kibibila Nzambi wutu zabikisa nani nandi kadi. Nandi wutuba: ‘Minu yidi Yave. Adiodio diawu dizina diama.’ (Tanga Yesaya 42:5, 8.) “Yave” yidi tsekudulu yi dizina di Kiebeleo dinsundula, “Nandi kalenda vanga diosokua diambu katidi.” Yave wuntomba befu tuzaba dizina diandi. (Esodu 3:15) Buidi tulenda bela lufiatu mu mawu? Nandi wutula dizina adiodio mu Kibibila kuvioka 7.000 di zikhumbu!a Bawombo bantedilanga Nzambi, Nzambi voti bansadilanga zithangununu ziwombo zinkaka dedi Mfumu, Mvangi ayi Nkua Ngolo Zioso. Nzambi yikiedika wuvanga diyilu ayi ntoto, nandi to fueni kutambula dizina, Yave.—Deutelonomi 4:39.

2. Mbi Kibibila kintuba matedi Yave?

Batu bansambilanga zinzambi ziwombo. Vayi Kibibila kintuba ti Yave nandi to Nzambi yikiedika. Kibila mbi? Vadi bibila biwombo. Vasi ko mutu wulutidi lulendu kena Yave. Diawu, ‘Nandi to Wulutidi Zangama mu nza yimvimba.’ (Tanga Minkunga 83:18.) Nandi widi ‘Nkua Ngolo Zioso,’ kibila widi lulendu lu kuvanga mambu nandi kantomba. Mvandi nandi widi ‘Mvangi wu biuma bioso bidi ku diyilu ayi va ntoto.’ (Nzaikusu 4:8, 11) Yave, nandi to wunzinganga thangu ka thangu.—Minkunga 90:2.

3. Nzambi widi zithangununu ziwombo vayi dizina dimueka to

Vadi disuasana mu thangununu bantedilanga mutu ayi dizina diandi? Muingi kubaka mvutu, tala VIDEO, bosi tubilanu kiuvu kinlanda.

VIDEO: Zithangununu Ziwombo, Vayi Dizina Dimueka To (0:41)

• Vadi disuasana mu zithangununu bantedilanga mutu ayi dizina diandi?

Kibibila kintuba ti batu bansambilanga zinzambi ziwombo ayi zimfumu ziwombo. Tanga Minkunga 136:1-3, bosi tubilanu kiuvu kinlanda:

• Nani ‘Nzambi yi zinzambi’ ayi ‘Mfumu yi zimfumu’?

4. Yave wuntomba ngie wuzaba ayi wusadila dizina diandi

VIDEO: Nzambi Widi Dizina?—Kitini (3:11)

• Kibila mbi ngie wunyindudila ti Nzambi wuntomba batu bazaba dizina diandi?

Yave wuntomba batu basadilanga dizina diandi. Tanga Loma 10:13, bosi tubilanu biuvu binlanda:

• Kibila mbi didi diambu dinkinza kusadilanga dizina di Nzambi, Yave?

• Buidi ngie wummuenanga bo mutu ka kutedila mu dizina diaku?

• Buabu, buidi Yave kambelanga bo ngie wunsadila dizina diandi?

5. Yave wuntomba ngie wuba nkundi’andi

VIDEO: Yaba Tomba Kubakula Nzambi Yikiedika (8:18)

• Buidi luzingu lu Soten lubalukila bo kalonguka matedi dizina di Nzambi?

Muingi wuba nkundi wu mutu, theti fueti zaba dizina diandi. Tanga Yakobi 4:8a, bosi tubilanu biuvu binlanda:

• Thumusunu mbi Yave ka kuvana?

• Buidi kuzaba ayi kusadila dizina di Nzambi kulenda kusadisila kuluta ba nkundi’andi?

MBI NGIE BELONGUKA

Yave didi dizina di Nzambi yikiedika. Nandi wuntomba muingi befu tuba bakundi bandi. Diawu nkinza beni kuzaba ayi kusadila dizina di Yave.

Vutukila Mambu Mamfunu

• Kibila mbi Yave kadidi disuasana na zinzambi zioso zinkaka?

• Kibila mbi tufueti sadilanga dizina di Nzambi?

• Bivisa mbi bimmonisa ti Yave wuntomba muingi ngie wuba nkundi’andi?

TALA MAMBU MANKAKA

Tala bivisa bitanu bimmonisa ti Nzambi widi.

“Nzambi widi?” (Dilongi didi mu jw.org)

Tala kibila mbi tulenda kikinina ti Nzambi kasi ko thonono ayi mbanunu.

“Quem criou Deus?” (A Sentinela, 1.º de Agosto de 2014)

Longuka nkinza wu kusadila dizina di Nzambi kheti tusa zaba ko buboti buidi baba tanguninanga diawu mu thangu yikhulu.

“Nani Yave ayi Kibila mbi Dizina Diandi Didi Nkiza?” (Dilongi didi mu jw.org)

Vadi nkinza wu kutedila Nzambi mu dizina diandi? Tala kibila mbi tulenda tubila ti Nzambi widi dizina dimueka to.

“Mazina ma Kua Nzambi Kadi?” (Dilongi didi mu jw.org)

Yave wuntomba tubaka mayangi mu luzingu ayi khumbu zinkaka tuvanganga minkungi. Bukiedika ti minkungi mioso minkuangidikanga Yave? Buidi tulenda monisina luzolo luitu mu nandi mu mambu amomo?

1. Kibila mbi minkungi mioso miyangidikanga ko Yave?

Ngie wulenda kuituka mu kuzaba ti minkungi miwombo misi ko kithuadi na mambu madi mu Kibibila. Kibila miyizila mu malongi ma baphakanu ayi midi kithuadi na binganga bi luvunu. Mvandi midi kithuadi na mambu ma kindoki ayi miyizila mu mayindu ma batu bankikininanga ti muela wufuanga ko. (Yesaya 65:11) Yave wunlubulanga bisadi biandi: “Lutatuka . . . ayi lubikasimba biuma bimbi.”—2 Kolintu 6:17.a

2. Ntindu mbi minkungi minyongisanga Yave?

Yave wutuvana ndubu yi “kubika tula lufiatu luitu loso mu batu.” (Tanga Yelemia 17:5.) Minkungi minkaka minzitisanga batu bafuila mu kibila ki tsi, masodi, bidimbu bi tsi ayi diphanda (1 Yoane 5:21) Minkungi minkaka minzitisanga politica, voti mambu mankaka. Mu mbuenu’aku buidi Yave kankuiza bela befu kuvana nzitusu nandi kafueni tambula, kuidi mutu, mangumba, voti batu bantuadisanga mayindu maviakana na mayindu Mandi?

3. Mambu mbi mambivisanga minkungi?

Kibibila ki tukandimina ‘kunua beni malavu, minkungi minviokisanga kitesu, kukolo malavu.’ (1 Petelo 4:3) Mu minkungi minkaka, batu banunganga ko kuyala mavanga mawu ayi bamvanganga kitsuza. Diawu, muingi tutatamana kuba bakundi ba Yave, tufueti vanga mangolo muingi kutatuka mambu moso malenda ku tubivisa vantual’andi.

BUELA LONGUKA

4. Bika kukemba minkungi miyongisanga Yave

Tanga Efeso 5:10, bosi tubilanu biuvu binlanda:

• Mbi tufueti vanga muingi tuba lufiatu boti, tulenda kemba nkungi voti ndamba?

• Minkungi mbi midi beni mizabakana ku tsi wunkalanga?

• Bukiedika ti minkungi mioso minkuangidikanga Yave?

Wumana kukikuvusa buidi Nzambi kammuenanga matedi kukemba kilumbu ki mbutukulu? Kibibila kisintubila ko bisadi bi Nzambi bakemba kilumbu ki mbutukulu vayi kintubila to batu buadi basa ba ko bisadi bi Nzambi bakemba kilumbu ki mbutukulu. Tanga Ngenesi 40:20-22 ayi Matai 14:6-10. Bosi tubilanu biuvu binlanda:

• Mambu mbi mamonika mu minkungi amiomio?

• Mu kutadila matangu amama ma Kibibila, buidi Yave kantadilanga batu bankembanga kilumbu ki mbutukulu?

Wukhidi kukikuvusanga buidi Yave kankuiza muena ngie kukemba kilumbu ki mbutukula ayi minkungi minkaka mikhambulu kithuadi na Kibibila?’ Tanga Esodu 32:1-8. Bosi, tala VIDEO ayi tubilanu biuvu binlanda.

VIDEO: Minkungi Minyongisanga Nzambi (5:07)

• Kibila mbi tufueti vangilanga mambu mu phila yinkuangidikila Yave?

• Buidi tulenda vangila mawu?

Buidi tulenda zabila nkungi wunyongisanga Yave

• Widi nguizani na mambu Kibibila kinlonga? Muingi wuzaba fiongunina kuma nkungi beni wubasikila.

• Mimvananga nzitusu kuidi batu, politica voti bidimbu bi tsi? Buluti nkinza, tunzitisanga Yave ayi tuidi lufiatu ti nandi to wala manisa ziphasi va nza.

• Phila bankembilanga minkungi beni ayi mambu mammonikanga mu miawu madi disuasani na mambu Kibibila kinlonga? Tufueti vanga mangolo muingi tuba badiodila mu mayindu.

5. Sadisa bankaka bakinzika mambu wunkikininanga

VIDEO: Mu Lukinzu Sudikisa Mambu Wunkikininanga (2:01)

Tanga Matai 7:12, bosi tubilanu biuvu binlanda:

• Dedi bummonisina matangu amama, ngie widi nsua wu kukuika basi dikanda diaku babika kukemba nkungi wunsitisanga tsi?

• Mbi wulenda vanga muingi dikanda diaku bakhambu sadilanga Yave bavisa ti, kheti wisinkuiza kemba ko yawu minkungi mi nza, vayi ngie wu kubakizikanga ayi wu kubanzolanga?

6. Yave wuntomba tuzingila mu mayangi

Yave wuntomba tubaka mayangi bo tumviokisa thangu na dikanda voti na bakundi bitu. Tanga Mpovi 8:15, bosi tubilanu kiuvu kinlanda:

• Buidi matangu amama mammonisina ti, Yave kantomba befu tuzingila mu mayangi?

Yave wuntomba dikabu diandi babaka mayangi ayi baviokisanga thangu va kumueka. Tala VIDEO muingi mumona buidi mawu mammonikinanga mu zikhutukunu zi tsi.

VIDEO: Kuyambanga Zikhomba Mu Lukutukunu lu zi Tsi (5:40)

Tanga Ngalatia 6:10, bosi tubilanu biuvu binlanda:

• Tufueti kemba nkungi wunzitisanga tsi muingi kukuangidika bankaka?

• Mu mbuenu’aku, mbi binluta tuadisanga mayangi: kukabila mu kibila ki lukuiku lu nkungi, voti mu ntim’aku woso?

• Bawombo mu zimbangi zi Yave, bamvananga mua minkayilu kuidi bana bawu. Boti widi bana balezi, mambu mbi wulenda kubavangila?

MBI NGIE BELONGUKA

Yave wuntomba befu tuba mu mayangi bo tumviokisa thangu na dikanda voti na bakundi bitu. Vayi nandi wuntomba tubika kemba minkungi mi kunyongisanga.

Vutukila Mambu Mamfunu

• Biuvu mbi tulenda kuyikuvusa muingi kuzaba nkungi wunyongisanga Yave?

• Buidi tulenda sadisila dikanda ayi bakundi bitu bazaba makani tuidi matedi minkungi minzitisa tsi?

• Buidi tuzabidi ti Yave wuntomba tuba mu mayangi bo tumviokisa thangu na bankaka?

TALA MAMBU MANKAKA

Fiongunina minkungi mbi mio baklisto balendi kemba ko.

“Kibila mbi Zimbangi zi Yave bakembilanga ko minkungi minzitisa tsi?” (Dilongi didi mu jw.org)

Tala bibila binna bi tuvanga kukikinina ti kukemba kilumbu ki mbutukulu kinyongisanga Yave.

“Kibila mbi Zimbangi zi Yave bakembilanga ko kilumbu ki mbutukulu?” (Dilongi didi mu jw.org)

Mona mbi ditoko dimueka kamvanganga mu lukinzu bo batu bankotanga yandi kikola bakumvuenzanga bo kakhambu kembanga nkungi wu nuela.

Yave wu Kuvuanga Nkinza (11:35)

Baklisto boso bakiedika bakembanga ko nuela. Buidi bammuenanga makani amomo?

“Eles encontraram algo melhor” (A Sentinela, 1 de Dezembro de 2012)