Ba Lufiatu mu Yave bo Tsukulu yi Nza Ayiyi Yikefikamanga

Thangu yiluelu yisiedi, mvibudulu wu Yave wunkuiza mana. Binganga bi luvunu biala tuluka, ayi dingumba di zimfumu zi luyalu diala nuanisa dikabu di Nzambi. Vayi Yave wala bunga batu bambi mu Alimangedoni. Baklisto bantediminanga mu mayangi mambu amomo kumonika.

Bukiedika, befu tusa zaba ko mambu moso matedi ziphasi zingolo. Dedi, tusa zaba ko thangu mbi ziawu ziala tonina. Tusa zaba ko bibila zimfumu zi luyalu bala vana muingi kutulula binganga bioso bi luvunu. Mvandi tusa zaba ko nati thangu mbi zimfumu zi luyalu bala tatamana kunuanisa dikabu di Nzambi. Tusa zaba ko mbi Yave kala sadila muingi kutulula batu bambi mu Alimangedoni.

Kibibila ki tuzabikisa mamoso mantombulu, muingi tununga mamoso mankuiza mu lufiatu ayi kibakala. Dedi, befu tuzebi ti tuidi mu kuzingila mu thangu yitsuka yi “bilumbu bitsuka.” (2 Timoteo 3:1) Tuzebi ti Nzambi wala kufisa thangu mintinu mi luyalu bala tuludila binganga bi luvunu muingi babika kutulula mvandi kinganga ki kiedika. (Matai 24:22) Befu tuzebi ti Yave wala vukisa dikabu diandi. (2 Petelo 2:9) Ayi befu tuzebi ti mutu Yave kasola muingi kutulula batu bambi ayi kuvukisa nkangu wunneni wu batu mu Alimangedoni, widi wusonga ayi widi beni mangolo.—Nzaikusu 19:11, 15, 16.

Bukiedika, mambu mankuiza kuntuala, mala tula “beni boma” batu. Vayi kutanga ayi kuyindula phila Yave kavukisila dikabu diandi mu thangu yikhulu, ayi mu mambu ka tuzabikisa mu matedi bilumbu binkuisa kuntuala, kuala tusadisa ‘kunanguna thalu’ mu lufiatu ti phulusu’itu yima fikama.—Luka 21:26, 28.