Buna Adami ayi Eva ba botuka ku lumbu lu Edeni, bawu babuta bana bawombo. Wutheti dizina dyandi Kaini, wuyiza ba mvati nsitu ayi wumwadi Abeli wuyiza ba nsungi mameme.

Kilumbu kimweka Kaini ayi Abeli bakubika mikhayilu mwingi kukabila Yave. Ngye zebi khayilu buna mbi? Kyuma ki thalu wumvana mutu nkaka. Yave wuyangalala mu khayilu Abeli kavana, angi kasa tya ko khayilu wu Kaini. Mawu mavanga Kaini kaba beni nganzi. Yave wu lwengisa Kaini kabika kubikila nganzi kunyala kibila yilenda kumvangusa kavanga mambu mambi. Vayi Kaini kasa kuwa ko.

Kaini wukamba Abeli: ‘Minu yintomba twenda yaku ku nsitu, Abeli wukikina. Mu thangu baba va baveka, Kaini wuvonda khomb’andi. Mbi Nzambi kayiza vanga? Yave wukukisa Kaini ku kinanu kuma kakhambu bakila bu kuvutukila.

Dilongi mbi tulenda baka? Tulenda ba mu nganzi voti mambu ma kukhambu monikina mu phila befu tuntombila vayi ti batuveni malongi, mu thinu—​tufweti lembika mayindu mitu mu kukhambu​—bikila nganzi beni yituyala.

Abeli waba zolanga Nzambi ayi wuvanga mambu masulama, Yave kalendi ko kuzimbakana mambu mavanga Abeli. Nandi wala vulubusa Abeli mu thangu kala balula ntoto paladizu.

Buvyokila thangu, ntoto wuyiza wala batu. Vayi batu bawombo baba vanganga mambu mambi. Zimbasi zinkaka mvandi ku diyilu, bayiza ba mavanga mambi ayi babaka makani ma kuvwata zinyitu zi nsuni mwingi kwiza va ntoto. Ngye zebi kibila bayizila va ntoto? Kibila bawu baba tomba kukwela bakyeto va ntoto.

Bawu bakwela bakyeto ayi babuta yawu bana baba beni bazangama ayi baba buphunya. Yave kasa tya ko kumona mambi bo masaba mu batu va ntoto. Diawu nandi kabakila makani ma kubunga batu boso bambi va ntoto mu khuka yi nlangu.

Vayi mu mbandu beni, mu bakana mutu wumweka baba tanguninanga Nowa, waba vanganga mamboti ayi wuba luzolo luwombo mu Yave. Nowa, waba zinganga na nkazi’andi, bana bandi batatu baba tedilanga Semi, Hami ayi Yafeti. Bana bandi baba na bankyetu bawu. Yave waba tomba kuvukisa Nowa ayi dikanda dyandi mu khuka yi nlangu. Diawu kakambila Nowa katunga nzaza yinneni banga dikumbi dilenda lalama va mbata nlangu. Nandi wubwe kamba Nowa kakotisa mintindu myoso mi bibulu mu nzaza beni, mwingi biawu mvandi bivuka.

Nowa ayi dikanda dyandi ba kivana mwingi kutunga nzaza mu nswalu boso Nzambi kabatumina. Va vyoka 50 di mimvu mwingi nzaza beni yimana kutungu. Nowa mvandi wulubula batu mu matedi Khuka nlangu yinneni yaba fikama. Batu beni babayisa ndubu yi Nowa.

Yave wuvana Nowa nswa mwingi bakota mu nzaza. Mambu mbi mamonika? Tunzaba mawu mu dilongi dinlandakana.