Loti waba kalanga na ngudi’andi khazi Abalami ku divula di Kanana. Buvyokila thangu, bawu bayiza ba bibulu biwombo. Kibwangu baba zingilanga kiyiza ba kilwelu mwingi kuzingila bawu babwadi na bibulu biawu. Diawu Abalami kakambila Loti: ‘Mu mbwenu’ama befu tulendi ko bwe zingila kibwangu kimweka, tufweti vambana. Diawu sola khonzo tidi kwenda. Ngye kusola khonzo yi lubakala minu yinkwendila khonzo yi lukyeto. Abalami wubikila Loti kasola theti. Mu mbwenu’aku nandi wumonisa luzolo lukyedika?

Loti wumona ti va ndeko divula di Sodoma, yiba khonzo yimboti mwingi kusola. Kibila kuba nlangu ayi bidya mwingi kudikila bibulu. Nandi wusola kibwangu beni ayi wunata dikanda dyandi mwingi bazingila kuna.

Batu baba zingilanga ku Sodoma ayi divula dinkaka difikama baba tedilanga Ngomola, baba mavanga mambi. Mambi mawu masabila ngolo, diawu Yave kabakila makani ma kubunga mavula beni. Vayi Yave waba tomba kuvukisa Loti ayi dikanda dyandi, diawu kafidila kuna zimbasi wadi mwingi kuba lubula: ‘Botukanu Mu thinu! Kibila Yave wambunga divula di Sodoma ayi Ngomola.’

Angi Loti kasa botuka ko mu thinu bo zimbasi bankamba. Nandi waba vuvisa. Diawu zimbasi basimbila mu koko ku Loti, ku nkazi’andi ayi bana bandi mwingi kuba basisa mu thinu ku divula beni. Zimbasi batenduka: ‘Dumanu zithinu! Luvukisa myela minu! Bikanu kutalanga ku mbusa! kibila beno kutalanga kumbusa lunkwiza fwa.’

Mu thangu ba tuka ku divula baba tedilanga Zoali, Yave wufila mbazu ku divula di Sondoma ayi Ngomola. Mavula beni mamana kutuluka. Vayi nkazi wu Loti wutala kumbusa ayi wukituka dikhuku di salu kibila wumanga kutumamana Yave! Bawu baba mu kyunda mu mambu mammonikina. Vayi kheti bobo, baba mu mayangi bo bavuka kibila bawu batumamana Yave.

Abalami waba zolanga beni Yave ayi wumfyatila, mawu kalongisa mvandi mwan’andi Isaki. Angi, bo Isaki kadukisa 25 di mvu, Yave wudinda Abalami kavanga dyambu diphasi. Dyambu mbi?

Nzambi wukamba Abalami: ‘Lemvuka, bonga Isaki mwan’aku wumweka to, yenda ku tsi bantanguninanga Molia ayi minu yala kusudikila mongo wufweti kwenda mwingi kuvana mwan’aku buka khayilu.’ Abalami kasa zaba ko kibila Yave kaba kundindila mwingi kuvanga mawu. Vayi nandi wutumamana Yave.

Va meni, Abalami, bisadi byandi byodi ayi Isaki, bayenda ti ku Molia. Bilumbu bitatu badyatila mwingi kuvitila. Bo batona kumona mongo ku kinanu Yave kaba sudikila, Abalami wukamba bisadi byandi: ‘syal’anu vava. Minu ayi Isaki khayilu tunkwenda vana va mbata mongo kwidi Yave.’ Abalami wubonga mbeli ayi wukamba Isaki kanata nkadu biswadi. Isaki wuyuvula tat’andi: ‘Kibulu mbi tunkwenda vana Yave khayilu?’ Abalami wumvutudila: ‘Mwan’ami, bika kutatubuka, Yave nafeka ma kavana.’

Mu thangu batuka va mbata mongo, bavanga kikuma voti vama bamvikilanga mikhayilu.

Bosi, Abalami wukanga myoko ayi malu ma Isaki ayi wuntula va yilu kikuma. Abalami bo kasimba mbeli, mu kilokulu beni wuyuwa mbembo yi mbasi yi Yave wunkamba: ‘Abalami! bika kuvanga mbi mwan’aku Isaki! Minu yima zaba ti ngye widi beni kiminu mu Nzambi. Kibila ngye ma bina vana mwan’aku wumweka to wu luzolo kwidi Nzambi, kheti mu kuzaba ti didi dyambu di phasi mu kuvanga.’ Angi Abalami wumona dimeme diba dikangama mu nti. Nandi wubonga diawu mwingi kuvana khayilu va bwangu ki Isaki.

Tona mu kilumbu beni, Yave wabatedilanga Abalami nkundi’andi. Zebi mu kibila mbi? Kibila, Abalami waba tumamananga minswa mi Yave ayi wuvanga mambu moso Nzambi kaba tomba.

Yave wubwe vutukila kukamba Abalami lukanu kaba mu nandi: ‘Minu yala kusakumuna, ayi ngye wala ba dikabu dinneni. Yala sadila dikanda dyaku mwingi kusakumuna batu boso va ntoto.’