Isaki bo kakwela, wuba 40 di mimvu. Dizina di nkazi’andi Lebeka. Isaki waba zolanga beni nkazi’andi. Kuntwala bayiza buta bana bwadi baba bibaza.

Wutheti wubutuka bantedila Esau, vayi wumwadi bantedila Yakobi. Esau kaba sa sikiminanga ko beni va nzo, kibila wuba nlozi wu bibulu. Vayi Yakobi, wuba mwana waba zolanga beni kukala va nzo mwingi kusadisa matata mandi.

Esau wuba mwana wutheti wu Isaki. Nandi wuba nswa wu kutambula kyuka ki dikanda ke na Yakobi. Ngye zebi kyuka buna mbi? Bidi byuma tata kambikilanga bana bandi bo kamfwa, dedi ntoto ove zimbongo. Lukanu Yave kavana Abalami, kidi mvandi kyuka Isaki kaba mwingi kubikila bana bandi. Esau kabasa vwanga ko nkinza lukanu beni vayi Yakobi waba luvwanga nkinza.

Kilumbu kinkaka, Esau bo kafumina ku nsitu, wuba beni phokongo ayi nzala. Bo kavitila va nzo, wuyuwa mfimbu yi bidya khomb’andi kilezi Yakobi kaba lamba ayi wunkamba: ‘Tala, yamfwa mu nzala! Phana bidya!’ Yakobi wunkamba: ‘Ngye kuphana theti nswa wu kubonga bukhulutu buaku bosi minu ya kuvana.’ Esau wunkamba: ‘Minu yisi kitomba ko! Bonga kwaku, minu kyuma yintomba bidya.’ Mu mbwenu’aku, diyindu dimboti Esau kabaka? Mve. Kibila nandi wumanga kyuka ki dikanda.

Bo Isaki kayiza nuna, nandi wumona ti thangu yifweni yi kusakumuna mwan’andi wutheti. Angi Lebeka wusadisa Yakobi katambula lusakumunu lubina baka Esau. Bo Esau kayiza zaba mawu, nandi wuba beni nganzi ayi waba tomba kuvonda Yakobi. Lebeka ayi Isaki bazaba makani ma Esau ayi baba tomba kukyeba Yakobi. Diawu bankambila: ‘Tina, yenda ku nzo khomb’ami Labani ti nganzi yi Esau yala mana.’ Yakobi wuyuwa malongi ngudi’andi kamvana mwingi kuvukisa mwel’andi ayi wuyenda ku nzo yi Labani ngudi’andi khazi.

Yave wukanikisa kukyeba Yakobi dedi bo kabyebila Abalami ayi Isaki tat’andi. Yakobi wuyenda kwezingila ku divula baba tangunininga Kanana, kuawu kakwedila, kabutila bana bawombo ayi kabakila busina.

Kilumbu kinkaka Yave wukamba Yakobi: ‘Vutuka ku tsi yi matata maku.’ Diawu, Yakobi ayi dikanda dyandi babakila makani ma kuvutuka. Vayi mu nzila, batu bamweka bazabikisa Yakobi ti Esau waba kwiza ndengana na 400 di babakala! Nandi wuba beni boma. Waba yindula: ‘Mba khomb’ama widi makani ma kuphanga bubi ayi dikanda dyama!’ Diawu Yakobi kasambila: ‘Yave Nzambi lemvuka, phukisa mu myoko mi khomb’ama.’ Mu kilumbu kilanda, Yakobi wufila khayilu kwidi Esau dedi mameme, zikhombo, zingombi, zikamela ayi ziphunda.

Mu bwilu beni bo Yakobi ka syala nafeka, nandi wumona mbasi! Mbasi beni yitona kunwana yandi. Bawu banwana bwilu boso ti va meni. Yakobi wufufuka kulu, vayi nandi wutatamana kusimba mbasi beni kibila waba tomba mbasi kansakumuna. Mbasi wunkamba: ‘Bika minu yenda.’ Angi Yakobi wumvutudila: ‘Ti wisi kutsakumuna ko yisi kubika ko wenda.’

Mbasi beni wusakumuna Yakobi. Bo kansakumuna, Yakobi wuyiza ba lufyatu ti khomb’andi Esau kalendi ko kumvanga bubi.

Va meni, Yakobi wumona ku kinanu Esau ayi 400 di babakala bandi bankwiza yizanga. Bo kafikama vaba Esau, nandi wufukama sambwadi di zikhumbu mwingi kundinda nlemvo. Esau bo kamona abobo, wuduma zithinu ti vaba Yakobi ayi babumbasana. Bawu babwadi batona kudila kibila bavutuka kuba kithwadi. Bwidi Yave kamwena mu phila Yakobi ka kikuludila ayi kadedikisila mambu kaba na khomb’andi?

Bosi Esau, wuvutuka ku nzo’andi, vayi Yakobi wuvitila kwidi matata mandi. Yakobi 12 di bana kaba. Mazina mawu: Lubeni, Simeoni, Levi, Yuda, Dani, Nafatali, Ngadi, Aseli, Isakali, Zabuloni, Zozefi ayi Benyamini. Mu bana beni Yave wusadila​—Zozefi—​mwingi kavukisa dikabu dyandi mu thangu nzala. Ngye zebi bwidi mamonikina? Tunkwiza zaba mawu mu kapu yinkwiza.