Ku divula baba tanguninanga Usi, kwaba zingilanga dibakala dimweka wuba bwongiminanga Yave mu bukyedika. Dizina dyandi Yobi. Nandi wuba kisina, waba sadisanga basukama, bana bafwilu matata, ayi bakyeto bafwilu banuni. Bo kaba mavanga mamboti ayi busina, mansundula ti kasa monikina ko mambu ma phasi mu luzingu lwandi?

Yobi kasa zaba ko ti, wuba na mbeni waba kummonanga nsoki mu mavanga mandi mamboti. Ngye zebi nani? Satana. Vayi Yave bo kazaba mawu, wuyuvula Satana: ‘Kibila mbi wunkengidilanga kisadi kyama Yobi phila ayoyo? Va ntoto woso vasi ko mutu wunkaka buka nandi, tidi kutumamana ayi kuvanga mambu masonga.’ Satana wumvutudila: ‘Bukyedika nandi wukutumukinanga, kibila wubikanga ko dyambu dimbi dimonika mu luzingu lwandi, wunsakumunanga bisalu byandi ayi wumbutisanga bibulu byandi. Vayi ngye kubonga byuma byoso bidi yandi, nandi wala bika kusadila.’ Yave wunkamba: ‘Wulenda kwaku thota Yobi. Vayi kawubotula moyo’andi.’ Kibila mbi Yave kabikila Satana kathota Yobi? Kibila nandi wuba lufyatu ti Yobi mu ntima woso kaba kunsadilanga.

Satana wutona kuthota Yobi mu mambu ma phasi. Theti, wufila mivi mwingi bayiba zingombi ayi bibulu binkaka bi Yobi. Bosi wufila mbazu mwingi kuvika mamemi moso ma Yobi. Wubwe fila mivi bamana kukwiba zikamela zyoso zi Yobi. Wuvondisa bisadi byoso baba sunganga bibulu bi Yobi. Vayi tsangu yiluta beni phasi katambula, kumi dyandi di bana bafwa khumbu yimweka bo nzo yi baba vangila nkungi yibulumuka. Yobi wuba beni mu kyunda mu mambu kamonikina, vayi nandi wukwikama kusadila Yave mu ntima woso.

Satana waba tomba Yobi katovuka beni. Diawu kantudila kimbevu kingolo ayi nyitu’andi yiwala zimbeza. Yobi waba tovuka beni. Vayi nandi kasa zaba ko kibila kaba monikina mambu beni. Nandi kasa bikila ko mambu amomo matulula kikundi kyandi na Yave. Nzambi wumona mambu moso ayi wuyangalala beni bo Yobi katatamana kumbwongimina kheti mu ziphasi.

Satana wufila bakundi batatu ba Yobi ku nzo’andi mwingi bamvukumuna. Bawu bankamba: ‘Ḿba ngyewu masumu wuntomba kusweka dyawu Nzambi ka kutovudila.’ Nandi wuba vutudila: ‘Minu yisa vanga ko dyambu dimbi va meso ma Nzambi.’ Mawu mavanga Yobi kabala ti Yave nandi waba twadisa ziphasi zyandi. Dyawu katubila ti Yave kasi kumvangila ko mambu masonga.

Dibakala dimweka baba tedilanga Elihu wuba va khonzu, wuyuwa mambu moso baba tuba ayi wubakamba: ‘Mambu moso muma tuba masi ko makyedika. Yave katyanga ko kumona mambu mambi. Nandi wummonanga mambu moso ayi wunsadisanga batu mu thangu badi mu ziphasi.

Bosi Yave wutona kuvana Yobi byuvu. Nandi wunyuvula: ‘Kibila mbi ngye wumbanzila ti minu yisi kuvangila ko mambu masonga? Ngye zebi bwidi yivangila diyilu ayi ntoto? Boti wisa zaba ko, bwidi wulenda visila mambu moso mamvyoka mu luzingu lwaku?’ Yobi wutuba: ‘Yave ngye wunnunga. Minu yinkuwanga to mambu matedi mu ngyewu, vayi bosi yima kuzaba minu veka. Ayi yimazaba ti vasi ko dyambu ngye wulenda lembakana kuvanga. Dyawu ndemvukila mu mambu yibe tuba.’

Bo Yobi kanunga mu zithotolo zyoso zi Satana, Yave wubwe sakumuna Yobi ayi wumvana busina kuvyoka buba yandi. Yobi wuzinga mu mayangi mimvu miwombo. Yave kavangila mawu kibila Yobi waba kuntumamananga kheti mu thangu ziphasi. Ngye mvaku, wala landakana kifwani ki Yobi mu kusadila Yave, kheti mu thangu wummona ziphasi?

Ku tsi yi Ngipiti dikanda di Yakobi diyiza zabakana bana ba Isaeli ayi bawu bayiza ba bawombo. Bo Yakobi ayi Zozefi bafwa, ntinu wunkaka wutona kuyala mu tsi yi Ngipiti. Falawo waba mona boma phila bana ba Isaeli baba wadila ku tsi yi Ngipiti. Diawu kakwikila bana ba Isaeli basala banga mimvika mu kuvanga mateya ma kutungila ayi vanga bisalu bi ngolo mu zitsola. Vayi bobwawu bana ba Isaeli baba bwelama beni. Falawo kasa tya ko. Dyawu katumina bavonda bana boso ba babakala bambutuka. Bukyedika bana ba Isaeli bayituka beni ayi baba mu kyunda mu mambu maba monika!

Mu dikabu di Isaeli muba nkyeto wumweka baba tanguninanga Yokebedi, wubuta mwana wumboti wu dibakala. Mwingi kukyeba mwana kabuta, nandi wuntula mu kiphanyi ayi wuntula mu ndeko mwila wu Nilo. Mwana wutheti wunkyeto wu Yokebedi, baba tanguninanga Miliami wusyala mu ndeko nlangu mwingi kukengidila khomb’andi yi kilezi.

Mwana wunkyeto wu Falawo bo kayenda ku nlangu mwingi kayobila, wumona kiphanyi va yilu nlangu kinlalubuka. Vayi mu khati muba mwana wutsombi waba dila ayi nandi wummona beni kyadi. Bo khomb’andi Miliami kamona bobo, wuyuvula mwana wu Falawo: ‘Wuntomba minu yitedila nkyeto wumweka mwingi kayemika ayi kakeba mwana awuwu?’ ‘Ngete yenda.’ Miliami wuyenda mwingi katela ngudi’andi Yokebedi. Bosi mwana wu Falawo wukamba Yokebedi: ‘Nata mwana awuwu wukhebila nandi buboti ayi wunyemika, minu yala kufuta.’

Bo mwana beni kayonzuka, Yokebedi wunnata kwidi mwana wu Falawo ayi wumvana dizina di Mose, nandi wunkyeba buboti banga mwan’andi. Mose wuyonzuka banga mwana ntinu ayi wuba lwaku lu kubaka kyosu kwa kima kaba tomba. Vayi Mose kasa zimbakana ko Yave. Nandi wuzaba ti kasa ba ko mwisi Ngipiti, angi wuba mwisi Isaeli dikabu di Nzambi. Dyawu kasodila kusadila Yave.

Bo kadukisa 40 di mimvu, Mose wubaka makani ma kusadisa dikabu dyandi. Kilumbu kinkaka bo kamona mwisi Ngipiti waba bula mvika wumweka mwisi Isaeli, Mose wu dasuka beni ayi wubula mwisi Ngipiti beni nate kafwa. Mwingi batu babika kuzaba mambu kavanga, wunzika mu ntoto. Bo Falawo kazaba mawu, wutomba kuvonda Mose. Diawu Mose katinina ku bwala bu mweka baba tedilanga Midiani. Vayi Yave wutatamana kukyeba Mose.