Va meni, Falawo bo kayuwa ti bana ba Isaeli ba botuka ku Ngipiti, nandi wubalula mayindu ayi wukamba masodi mandi: ‘Kubamanu ayi kubikanu makalu mwingi tulandakana bana ba Isaeli! Dyambu dimbi tubevanga, khanu twisa bika ko bawu benda.’ Falawo ayi masodi mandi batona kulandakana basi Isaeli.

Yave wusadila dituti va mwinya ayi mbazu va bwilu, mwingi kutwadisa bana ba Isaeli. Nandi wuvanga mawu nate bana ba Isaeli bavitila mu ndeko ḿbu wubenga, ayi wubakamba bakala theti vana.

Mu thangu bana ba Isaeli bamona Falawo ayi dingumba dyandi di masodi, basa bwe zaba ko ma kuvanga, kibila kuntwal’awu kuba ḿbu wubenga ayi kumbusa zimbeni ziawu masodi ma Ngipiti. Bana ba Isaeli batendukila Mose: ‘Befu boso tuma kwiza sinda akuku! Khanu be tubika tufwila ku Ngipiti.’ Angi Mose wuba vutudila: ‘Bikanu kumona boma. Vwenanu swi ayi monanu phila Yave ka tuvukisila.’ Bukyedika, Mose wuba lufyatu mu Yave!

Yave wukamba bana ba Isaeli babika kutina, vayi batelama va kibwangu baba. Mu bwilu beni, Yave wufidisa matuti mwingi kutula nkaku kwidi masodi ma Ngipiti na bana ba Isaeli. Ku ndambu masodi ma basi Ngipiti wutula kitombi, vayi ku ndambu basi Isaeli wutula mweze voti tendele.

Yave wukamba Mose kanonuna koko kwandi mu ḿbu. Bosi, Nandi wufila phemu yi ngolo mu bwilu boso. Ḿbu wukabuka va khati ayi wuvanga nzila mwingi bana ba Isaeli bavyokila. Bawu basabuka khonzo yinkaka mu ntoto wuyuma.

Nkangu wu masodi ma Ngipiti batona kulandakana bana ba Isaeli. Vayi Yave wutula divunza kwidi masodi ma Falawo, makalu mawu matona kubotuka zipenewu. Bawu baba tenduka: ‘Ndokwanu tuvutuka ayi tubotuka avava, kibila Nzambi’awu wu kubanwanina.’

Bo basi Isaeli bamana kuvyoka, Yave wubwe kamba Mose: ‘Nonuna koko kwaku mu ḿbu.’ Mu thangu beni, zikhonzo ziwadi zi nlangu zibwila basi Ngipiti. Falawo ayi masodi mandi bamana kufwa ayi ni mutu wumweka kasa vuka ko.

Bana ba Isaeli bayimbila ayi bazitisa Nzambi mu nkunga waba tubila abubu: ‘Tuyimbidila Yave, kibila nandi Nzambi Nkwa Ngolo Zyoso. Bebonga makalu ma basi Ngipiti ayi masodi mandi, bebunga mawu mu ḿbu.’ Mu thangu bawu baba kwimbila, bakyeto baba kina ayi baba sika zindungu. Baboso baba mu mayangi kibila Yave wuba vukisa!

Bo vavyoka ngonda wadi tona bana Isaeli babotuka ku Ngipiti, bawu bavitila ti mu Mongo wu Sioni. Bawu batsikika vana mavwala mawu ayi bazingila vana. Yave wutumisa Mose ku mbata mongo ayi wunkamba: ‘Minu yima vukisa bana ba Isaeli. Ba kutumamana minsiku myami, bawu bala ba dikabu dyami disolwa.’ Mose wuvutuka kuba bana ba Isaeli ayi wubakamba matuba Yave. Ngye zebi mvutu mbi bawu bavana? Bawu bakanikisa: ‘Befu tukikinini kuvanga mambu moso Yave katubidi.’

Mose wubwe maka ku mbata mongo ayi Yave wunkamba: ‘Bilumbu bitatu bya kuvyoka, minu yala vutuka mwingi kukoluka yinu ayi kamba bana ba Isaeli babika kumaka ku mbata mongo.’ Mose wukuluka ayi wukamba bana ba Isaeli babika kumaka ku mbata mongo, vayi bakubama mwingi bayuwa Yave Nzambi.

Bo bilumbu bitatu beni bivyoka, bana ba Isaeli batona kumona zitsyemo, matuti manomba va mbata mongo, bayuwa zinzazi ayi nkwimbi. Bosi Yave wukuluka va mbata mongo buka diyenga di mbazu. Bana ba Isaeli baba titumuka kibila boma busabila ngolo mu mambu baba mona. Mongo woso wuwala mwisi ayi waba tutubuka beni ayi nkwimbi waba kuwakana ngolo.

Bosi Nzambi wubakamba: ‘Minu Yave, Nzambi yikyedika. Beno mulendi bwongimina ko zinzambi zinkaka zi luvunu, vayi minu to.’ Mose wubwe vutuka ku mbata mongo ayi Yave wumvana minsiku mitedi phila bafweti kumbwongimina ayi bafweti zingila. Mose wusonika minsiku beni ayi wutangila myawu bana ba Isaeli. Bawu bakanikisa: ‘Tunkwiza vanga mambu moso Yave kantomba.’ Bukyedika ti bawu baba bakubama mwingi kuvanga mambu bakanikisa Nzambi?