Yave wubwe kamba Mose: ‘Yiza ku mbata mongo mwingi yi kuvana zithumu minu veka yinkwiza sonika mu mamanya.’ Mose wuyenda ayi wukadila kuna 40 di bilumbu. Mu bilumbu beni, Yave wusonika kumi di zithumu mu mamanya mwadi ayi wuvana mawu kwidi Mose.

Buvyokila thangu, bana ba Isaeli baba mwena ti Mose wuba zimbakana. Diawu bakambila Aloni: ‘Befu tuntomba mutu ka tudyatisa. Wutuvangila nzambi yi kitumba!’ Aloni wubakamba: ‘Twalanu wola.’ Nandi wubonga yawu ayi wusulumuna yawu ku mbazu, bosi wuvanga kitumba ki kibulu. Bawu batuba: ‘Nandi wuwu Nzamb’itu, wutukula ku tsi yi Ngipiti!’ Bawu batona kubwongimina kitumba beni ki wola ayi bavanga nkungi mu kilumbu beni. Mu mbwenu’aku, mambu bavanga maba mamboti? Ndamba, kibila bawu bakanikisa ti Yave to bankwiza bwongiminanga. Vayi bawu babundula tsila beni.

Yave bo kamona mambu baba vanga, wukamba Mose: ‘Vutuka kwidi bana ba Isaeli, kibila bawu bama bundula minsiku myami ayi bawu nzambi yi luvunu badi mu kubwongimina mu thangu ayiyi.’ Mose wukuluka mu thinu mongo ayi wunata mamanya ma mwadi ma zithumu Yave kamvana.

Mu thangu kafikama vaba bana ba Isaeli, wuyuwa zimbembo zi batu baba kwimbila, baba kina ayi baba bwongimina kitumba beni. Mose wuba beni mu nganzi kibila khenene kaba mona mambu baba vanga. Nandi wuyekula va tsi mamanya maba yandi va myoko ayi mamana kutyamuka. Bosi wutulula mvandi kitumba kiawu bavanga. Mose wuyuvula Aloni: ‘Bwidi be kikinina kuvanga mambu ma phila ayoyi? Aloni wunkamba: ‘Bika kufwema! Ngye veka zebi dikabu adidi, bawu bafumu tombanga nzambi yinkaka. Diawu yibe vangila kitumba akyokyo mu wola bafeka babe vana! Mose wumvutudila: ‘Ngye khanu be manga kuvanga mawu.’ Bosi Mose wuvutuka ku mongo wu Sioni ayi wudinda Yave mwingi kaba lemvukila.

Yave wulemvukila batu boso baba bakubama mu kutumamana minsiku myandi. Ngye mavisa ti diba dyambu dinkinza bana ba Isaeli kulandakana thwadusulu yi Mose?

Bo Mose kayenda ku Mongo wu Sioni, Yave wunkamba katunga divwala dimboti mwingi bana ba Isaeli babwongiminanga Nzambi ayi batedila diawu Nzo Yinlongo yi Kubwongimina Yave. Bawu bavangila divwala beni mu phila balenda nungina kunanguna ayi kunata diawu vosokwa vama bankwenda.

Yave wubwe kamba Mose: ‘Zabikisa batu bavana, kyoso kwa kyuma mwingi basadisa kutunga nzo yinlongo.’ Bana ba Isaeli batumamana ayi bavana wola, palata, mamanya ma luvalu ayi byuma binkaka bi kitoko. Bavana mvandi miledi mi benga, nkanda wu nyitu bibulu, ayi byuma binkaka. Mose bo kamona ti byuma beni bima sabila ngolo, nandi wuba kamba: ‘Bikanu kubwe twala.’

Babakala ayi bakyeto bawombo bakivana mwingi kutunga Nzo Yinlongo. Yave wubavana ndwenga mwingi babaka bu kuvangila kisalu beni. Bankaka baba lengulanga bisadulu, baba vanganga minledi, nangunanga ayi ludikanga mamanya, angi bankaka baba syulumunanga wola ayi bankaka baba vanganga mabaya.

Bawu batunga nzo yinlongo dedi bo Yave katubila. Bavanga mvandi minledi mi kitoko mwingi kuvasa nzo beni mu bibwangu byodi. Kibwangu kitheti Kinlongo, vayi kimwadi Kilutidi Kinlongo. Mu kibwangu ki mwadi, batula kuna kasu yi luwawanu, yivangulu mu mabaya batula wola va mbata. Va kibwangu kitheti, batula kuna kyuma bavangila mu wola baba thetikanga zivela, batula mvandi mwa mesa baba vikilanga malasi ma kusemina. Vayi ku nganda, kuawu batula dibola ayi mesa ma kuvikila mikhayilu. Yave wukamba bana ba Isaeli batula kasu yi luwawanu ku kibwangu kimwadi kiluta kinlongo, mwingi batebukanga moyo lukanu luawu lu kutumamana Yave. Ngye zebi luwawanu buna mbi? Luwawanu, tsilulu wumvanga kwidi mutu wunkaka.

Yave wusola Aloni ayi bana bandi mwingi basala ku nzo yinlongo banga Zinganga zi Nzambi. Bawu baba kiyeku ki kukyeba ayi kuvika mikhayilu. Aloni nandi to Yave kavana nswa wu kukota ku kibwangu kimwadi Kiluta Kinlongo. Nandi ntulu wumweka mu mvu kaba kotilanga kuawu mwingi kavana mikhayilu mi masumu mandi, ma dikanda dyandi ayi masumu ma dikabu dyoso di Isaeli.

Bana ba Isaeli bamana kutunga Nzo yinlongo, bo vavyoka mvu wumweka tona babika Ngipiti. Bawu bayangalala beni kibila babaka kibwangu kifwana mwingi kubwongimina Yave.

Bo bamanisa kutunga yawu, Yave wudyatisa bana ba Isaeli mu dituti diba ditsikama va mbata nzo yinlongo, mwingi kamonisa bana ba Isaeli ti nandi widi va khati’awu. Bo dituti beni dintsikama vama, buna bawu mvawu bafweti kala vana. Vayi dya kubotuka, muna thangu yi kunanguna Nzo Yinlongo yi Yave mwingi kubotuka vama badi ayi kulandakana kunkwenda dituti beni ti dintsikama vama, bosi ba bwesi be nangika Nzo Yinlongo.