Dikabu di Yuda basa bwe ba ko kintwadi na Yave ayi basola kusambila zinzambi zi luvunu. Mu mimvu miwombo, Yave kafidila mimbikudi mwingi basadisa dikabu di basi Yuda kubalula mavanga. Vayi bawu basa kuwa ko mimbikudi, angi kuseva baba basevanga. Mbi Yave kabina vanga mwingi kumanisa tsambudulu yi luvunu?

Mu thangu beni ntinu wu Babiloni Nebukadenesali, waba tulula ayi kuyadila zi tsi ziwombo. Nandi wutulula Yelusalemi ayi wunata Yoyakini ntinu basi Yuda, zimfumu zinkaka, na masodi ayi babakala baba kalanga ku Yuda. Nebukadenesali mvandi wunata kyuka kyoso kiba mu tempelo yi Yave. Ayi wubyeka Sedekia mwingi kaba ntinu basi Yuda.

Va thononu Sedekia waba tumamananga ntinu Nebukadenesali. Angi mimbikudi mi luvunu ayi batu bankaka bakamba Sedekia mwingi kabalukila Babiloni. Vayi Yelemia wunlubula: ‘Ngye kubalukila Babiloni mwala kwiza monikina mambu ma mbi ku tsi yi Yuda, bawombo bala fwa, nzala yala saba ayi bawombo bala ba kubela.’

Dinana di mvu mivyoka, Sedekia wubaka makani ma tona kubalukila Babiloni ayi wudinda masodi ma Ngipiti mwingi bakyeba divula di Yelusalemi. Vayi Ntinu Babiloni Nebukadenesali wutuma nkangu wu masodi mwingi bazungidila Yelusalemi ayi batulula divula beni. Angi Yelemia wukamba Sedekia: ‘Ngye fweti kukivana kwidi Babiloni, kibila Yave betuba ti buawu to ngyewu ayi divula di Yeluselemi lulenda vukila.’

Bo va vyoka mvu wumweka ayi ndambu, basi Babiloni banunga kukota ku Yelusalemi ayi bavika divula beni. Bavika mvandi tempelo yi Yave, bavonda batu bawombo ayi bankaka babanata mu buloko ku Babiloni.

Sedekia wutina ku Yelusalemi, angi basi Babiloni banlandakana ti bambwila ayi bannata kwidi ntinu Nebukadenesali. Bosi ntinu wutuma mwingi bavonda bana ba Sedekia va meso mandi. Nandi wutobula mvandi meso ma Sedekia ayi wuntula mu buloko ti kayiza fwa. Angi Yave wukanikisa basi Yuda: ‘Va kuvyoka 70 di mimvu, minu yala kuluvutula ku Yelusalemi.’

Mambu mbi mamonikina kwidi matoko baba zolanga Yave banata ku Babiloni? Bukyedika kwandi ti bawu bakwikama kusadila Yave?

Bo ntinu Nebukadenesali kanata zimfumu zi basi Yuda ku Babiloni, nandi wukamba masodi mandi mwingi basola va khati zimfumu beni matoko maba buvinya ayi dyela mwingi baba kubika voti babalonga mu mimvu mitatu, mu dyambu basala mu luyalu lu ntinu wu Babiloni. Nebukadenesali wusola dibakala baba tedilanga Aspenazi mwingi kabalonga kutanga, kusonika ayi kukoluka mbembo yi basi Babiloni. Mvandi baba kamba ba dilanga va meza ntinu ayi zimfumu zinkaka zi luyalu baba dilanga. Mazina ma matoko beni maba: Danieli, Hanania, Misaeli, ayi Azalia. Angi Aspenazi wuba vingisa mazina ma basi Babiloni, batona kubatedila: Beletesasali, Sadalaki, Mesaki ayi Abede-Nengo. Mu phil’aku, mambu matoko beni balonguka ku Babiloni, mavanga bawu babika kusadila Yave? Mve.

Kibila matoko beni, baba makani ma kutumamana to Yave. Bawu bazaba ti balendi dya ko bidya Yave kakandimina mu minsiku myandi. Dyawu bakambila Aspenazi: ‘Lemvuka bika kutuvana bidya bi ntinu’. Aspenazi wuba tambudila: ‘Benu manga kudya bidya beni ayi ntinu na kumona ti mwisi ko buvinya buboti, nandi wela kuphomda!’

Danieli wubaka diyindu, dyawu kakambila Aspenazi: ‘Nlemvo tu kudinda mu kumi di bilumbu wutuvananga to meza ma kudya ayi nlangu. Kuntwala wela kwiza mona diswasana mu befu ayi bandyanga bidya bi ntinu’. Aspenazi wukikinina diyindu beni.

Bo kumi di bilumbu beni bivyoka, Danieli ayi bakundi bandi batatu baluta ba buvinya. Yave wuyangalala beni bo bawu batumamana zithumu zyandi, dyawu kavanina Danieli ndwenga yi kusundula zindosi.

Bo ndongukulu beni yimana, Aspenazi wunata matoko moso kwidi Nebukadenesali. Ntinu wuyoluka yawu ayi wummona ti Danieli, Hanania, Misaeli, ayi Azalia baluta matoko mankaka mu dyela. Ntinu wubasola mwingi bansadisa mu lutumu lwandi ayi mu thangu kaba bakanga makani mankinza, nandi waba lindanga lusalusu luawu. Bukyedika, Yave wusadisa Danieli ayi bakundi bandi baba beni dyela kuvyoka zinganga ziba bikulanga mambu ma ntinu Nebukadenesali.

Yindula kuaku; Danieli, Hanania, Misaeli, ayi Azalia baba ku tsi yi kinzenza, angi bawu basa zimbakana ko ti baba bisadi bi Yave Nzambi. Ngye mvaku wala tebukanga moyo kukwangidika ntima wu Yave kheti bo widi kinanu na matata maku?