Mu bwilu bumweka, ntinu Nebukadenesali wulota ndosi yi kakhambu zaba tsundu. Ndosi beni yaba kuntatisa beni ayi kasa bwe baka ko tolo. Diawu Nebukadenesali katumisina zinganga zyandi baba sundulanga zindosi ayi wuba kamba: ‘Khambanu ndosi yibe lota.’ Bawu bamvutudila: ‘Tuba theti ndosi beni ayi befu twe kukamba mbi yawu yinsundula.’ Ntinu wubwe tuba: ‘Mve! benu khambanu ndosi beni khanu ye kuluvonda benu boso. Bawu batuba: ‘Mfumu’itu, lemvuka tuba theti ndosi belota, bosi befu twe kusudikisa yawu. Ntinu wubakamba: ‘Benu minu muntomba kuvunzikisa! Tubanu munswalu ndosi yibe lota.’ Bawu batuba: ‘Ah! Ntinu vasi ko mutu wulenda kukamba mambu wuntomba.’

Ntinu wudasuka beni ayi wutuma kuvonda batu boso baba ndwenga ku Babiloni. Nswa beni kavana, wutula luzingu lu Danieli, Sadalaki, Mesaki ayi Abede-Nengo va kingela. Bosi, Danieli wuye kamba ntinu Nebukadenesali mwingi kavana mwa thangu. Danieli ayi bakundi bandi, balinda lusalusu kwidi Yave. Ngye zebi mbi Yave kavanga?

Yave wukamba Danieli ndosi beni ayi tsundu’andi. Mu kilumbu kilanda, Danieli wukamba bisadi bi ntinu: ‘Tala, bikanu kuvonda ni mutu wumweka kibila minu yima zaba tsundu yi ndosi beni.’ Diawu bisadi bi ntinu banatina Danieli ti kuba ntinu Nebukadenesali. Bosi Danieli wukamba ntinu: ‘Nzambi ma kumonisina mambu mankwiza kuntwala, ayi tsundu yi ndosi’aku yawu ayiyi: ‘Ngye belota kitumba kinnene kidi ntu wu wola, ntima ayi myoko mi palata, kivumu ayi mabubu ma malu matsongo voti (cobre), angi mu makungulu voti makuma ti mu bitambi madi masobakana kisengu ayi tuma. Ngye benona mvandi dimanya dibe zenguka mu mongo dibe bunda mu malu ma kitumba beni ayi kyawu kiza mana kituka ntoto. Bosi phemu yiza nata ntoto woso. Buna bilumbu bivyoka, dimanya beni diza ba dineni ayi diza fuka ntoto woso.’

Bosi Danieli wutuba: ‘Ntu wu wola bemona, luawu luyalu lu kintinu kyaku. Ntima ayi myoko mi palata binsundula ntinu wala vinginina luyalu lwaku. Bosi, vala kwiza ntinu wunkaka wela ba buka tsongo voti (cobre) ayi wela yala ntoto woso. Vala bwe kwiza ntinu wunkaka wela ba mangolo banga kisengu. Ku tsuka, kwala monika ntinu wunkaka wuvasana, khonzo yinkaka yi ntinu beni yala ba mangolo banga kisengu, angi yinkaka yela ba yilebakana buka tuma. Dimanya wumona dinsundula Kintinu ki Nzambi, kintinu beni kyela tulula mintinu myoso mi nza ayi kyela yala mu thangu zyoso.

Bo kayuwa tsundu yi ndosi beni, Nebukadenesali wiza fukama va ntwala Danieli ayi wunkamba: ‘Bukyedika, Nzambi’aku ma kusudikisa ndosi beni, kibila nandi to Nzambi yikyedika ayi vasi ko yinkaka buka nandi’. Nebukadenesali kasa bwe vonda ko Danieli, angi wumbyeka mfumu yi batu boso baba ndwenga ayi mfumu yi Babiloni. Mamona? Yave wutambudila nsambu wu Danieli ayi wunsadisa.

Thangu bo yivyoka, ntinu Nebukadenesali wuyiza tunga kitumba ki wola kinene beni ayi wutula kyawu mu thandu babe tedilanga Dula. Nandi wiza kutikisa batu boso ba nkinza ku Babiloni mwingi bamona kitumba beni. Mu nkangu beni, muba mvandi ba Ebelewo babe tedilanga Sadalaki, Mesaki ayi Abede-Nengo. Ntinu wiza tuba: ‘Benu kukuwa nkunga wuma tona, mufwene fukama ayi kubwongimina kitumba akiki. Noso kwa wummanga bwongimina kitumba beni, ma bankuba ku mfulu yimbazu. Abwabu! Mbi ba Ebelewo beni batatu babina vanga? Kubwongimina kitumba voti kufyatila Yave?

Thangu nkunga wutona batu boso bafukama ayi babwongimina kitumba, vayi Sadalaki, Mesaki ayi Abede-Nengo bamanga kufukama. Babakala baba yawu va khonzo, buna bamona ti bawu basa fukama ko, biza bafunda kwidi ntinu Nebukadenesali. Ntinu wiza batumisa ayi wiza bakamba: ‘Yeka bwe mubikila mwa thangu, vayi benu kumanga bwongimina kitumba, yeka muvika ku mbazu. Zebi mvutu mbi bawu bavutudila ntinu? Bawu batuba: ‘Bika kwaku kutuvana thangu. Kibila Nzamb’itu kalenda kutuvukisa ku mfulu yi mbazu. Vayi ti kasi tuvukisa ko, muna zaba kwaku ti twisi mbwongimina ko kitumba kyaku.’’

Ntinu Nebukadenesali wudasuka ayi wutuba: ‘Bwelanu mbazu sambwadi di mintulu.’ Buna mbazu yiba yiwombo, wutuma masodi mandi bakanga Sadalaki, Mesaki ayi Abede-Nengo ayi baba kuba ku mfulu yi mbazu. Ngye zebi, mbazu yiba yiwombo beni ayi masodi ma bakuba kuna, mafwa mu kibila ki dyamu. Vayi thangu ntinu kayindimina ku mfulu beni, wiza mona batu banna bandyatila va khati mbazu. Nandi wiza susuka ayi wuyuvula: ‘Ka babakala batatu tube kuba ku mbazu ve? Angi baba nna yimona kukhati mfulu. Wunkaka widi buka mbasi!

Nebukadenesali wiza belama va ndambu mfulu ayi wiza kamba bawu batatu babasika. Batu boso baba vana basusuka thangu bamona Sadalaki, Mesaki ayi Abede-Nengo ba basika. Zebi kibila mbi? Kibila bawu basa vya ko. Nsuni’awu, minlengi ayi bikhutu byawu bisa vya ko ne mfuku mwisi basa ba ko.

Nebukadenesali wiza tuba: ‘Bukyedika! Nzambi yi Sadalaki, Mesaki ayi Abede-Nengo nandi Nkwa Ngolo Zyoso. Nandi be fidisa mbasi mwingi kavukisa bawu batatu. Vasi ko nzambi wulenda kundedakana.’

Abwabu, mbi tulenda kulonguka mu Sadalaki, Mesaki ayi Abede-Nengo? Tufweti monisa lufyatu lu ngolo kwidi Yave, ti tulembu monikina ziphasi voti zithotolo.