Bwilu bunkaka ntinu Nebukadenesali wubwe lota ndosi yinkaka kamanga visikisa tsundu. Nandi wubwe tumisa zinganga zyandi mwingi bansudikisa tsundu yi ndosi beni, angi ni wumweka mu bawu kasa nunga ko. Diawu kabwe tumisina to Danieli mwingi kansundikila ndosi beni.

Ntinu wukamba Danieli: ‘Mu ndosi beni, yibe lota nti wunneni wube konzuka ti kuvitila ku matuti ayi woso kwa mutu mu zitsi zyoso kalenda mona wawu. Meza ma nti beni mamboti ayi makundi mawombo mabedi muna. Bibulu biwombo biba kwendanga va mvevo wu nti beni mwingi kuswamina mwinya ayi zinuni ziwombo zitungila manza mu matafi ma nti beni. Vayi yiza mona mbasi yifumini ku diyilu ayi wiza tuma: ‘Kwanganu nti beni ayi luzenganu matafi mandi. Angi bikanu to tsina nti beni, zinganzi zidi mu tsi ntoto ayi kanganu lukanda lu kisengu ayi lu cobre va tsina nti mwingi wubika konzuka. Nti beni widi ntima wu mutu, vayi wala baluka ntima wu kibulu ti vala vyoka sambwadi di zithangu. Batu boso bala zaba ti Yave nandi Nkwa ngolo zyoso ayi nandi kalenda vana luyalu lu kintinu kyandi kwidi woso kwa mutu nandi katidi.’’

Bo Yave kakamba Danieli tsundu yi ndosi beni, Danieli wumona boma diawu kakambila ntinu: ‘Minu yiba mwena ti ndosi beni yinsundukila kwidi zimbeni zyaku, angi mu ngye veka yinsundukila. Nti belota batumini bazenga, wunsundula ngye veka. Ngye wunkwiza botuka theti va luyalu lwaku, ayi wala dya bititi bi nsitu buka bibulu. Vayi dedi bo mbasi kabe tubila babika tsina nti, mansundula ti ngye wala vutuka kuyala banga ntinu.’

Bo va vyoka mvu wumweka, mu thangu Nebukadenesali kaba betila phemo ku yilu kibanga kyandi ayi kutala bu tungimina divula di Babiloni, nandi wutuba: ‘Ah, tala phila Babiloni yinlezimina divula minu veka yitungisa. Bukyedika, minu yivyokizi mintinu myoso. Bo kamana kukoluka, wuyuwa mbembo yibasikila ku diyilu yintela: ‘Nebukadenesali! Tona bubu, ngye wambotuka theti va luyalu lwaku.’

Mu thangu beni, Nebukadenesali wuvunzuka ntu ayi wuyiza ba buka dilawu. Nandi bambotula mu mangolo ku nzo’andi kaba kalanga ayi wuyenda kadyatanga ayi kudya bititi buka bibulu bi nsitu. Minlengi myandi miyonzuka buka zitsala zi kibala ayi mikhondo voti zingongolo zyandi ziyonzuka buka zinuni.

Bo vavyoka sambwadi di mimvu, Nebukadenesali wuyiza bwe vutuka mu bumutu. Yave wubika nandi kabwe vutuka va luyalu buka ntinu wu Babiloni. Nebukadenesali wutuba: ‘Bukyedika, Yave nandi fweni mu zitusu. Ayi minu yima zaba ti nandi widi mu kuyala Diyilu. Nandi, wunlonganga batu bakinangikanga mwingi ba kikulula ayi wumvananga kintinu kyandi kwidi mutu nafeka katidi.’

Bo Nebukadenesali kafwa mwan’andi Belasasali wuvingana va luyalu. Kiba kilumbu, ntinu beni wuvanga nkungi wunneni ayi wutumisa iveve di zimfumu zi Babiloni. Nandi wukamba bisadi byandi babasisa zimbungu zi wola tat’andi kayiba ku nzo yinlongo yi Yave, mwingi bawu banwina malavu mu nkungi beni baba zitisila zinzambi zyawu zi luvunu. Mu thangu beni basusukila koku kunneni ku dibakala kuba sonika mambu mangitukulu mu kibaka ki sala beni baba vangila nkungi.

Belasasali wumona beni boma. Diawu katumisina mimbikudi myandi mwingi bansundudila mambu beni, ayi wukanikisa ti: ‘Woso kwa mutu wunkwiza nunga, yinkwiza mbyeka mutu wuntatu wulutidi kimfumu mu luyalu.’ Mimbikudi myoso bameka kusundula mambu beni, vayi ni wumweka mu bawu kasa nunga ko. Buawu nkazi wu ntinu Belasasali kakambila nnuni’andi: ‘Tala, tumisa Danieli mwingi kasundudila mambu beni, kibila nandi to wunnunganga kuvanga mawu tona mu luyalu lu ntinu Nebukadenesali tat’aku.’

Danieli wuyenda ku nzo ntinu, ayi Belasasali wunkamba: ‘Ngye nunga kusudikisa mambu beni, yinkwiza kubyeka mutu wuntatu wulutidi kimfumu mu luyalu.’ Danieli wuntambudila: ‘ Tala, minu yisintomba ko zikhayilu zyaku, vayi ye kusudikisa tsundu yi mambu beni. Tat’aku Nebukadenesali, wuba mutu wu lungundai, vayi Yave wunkulula. Ngye feka zebi mambu moso mamonikina tat’aku, angi wisa monisa ko lukinzu kwidi Yave, kibila be nwina vinho mu zimbungu zi wola ziba ku nzo yinlongo yi Yave. Buawu Yave kamasonikina mambu amomo: ‘Mene, Mene, Tekele ayi Falesini. Mansundua ti Yave wela bika basi Media ayi Pelesia batulula Babiloni, ayi ngyewu walasa bwe ba ko ntinu.’

Angi bo divula di Babiloni diba luphangu lunangama ayi mwila wuvinda waba zungidilanga mu zikhonzo zyoso, bawu balevula matuba Yave ayi baba lufyatu ti Babiloni yalasa tuluka ko. Vayi mu bwilu beni basi Media ayi Pelesia bakota ku Babiloni. Ngye zebi bwidi bakotila? Kolesi ntinu wu basi Pelesia ayi masodi mandi, bazibula nzila yinkaka mwingi nlangu wudekuka. Bo nlangu wudekuka, masodi mavyoka mu malembi. Mu kibila ki nkungi beni, basi Babiloni babika myelo mizibuka ayi masodi makota mu khambu nwana. Bawu bavonda ntinu wu Babiloni ayi batona kuyala divula di Babiloni.

Bo vavyoka mvu wumweka, Kolesi wutuba: ‘Yave ma kukhamba yibwe tunga nzo’andi yinlongo ku Yelusalemi, woso kwa mutu mu luzolu lwandi wuntomba kubwela myoko, kalenda kwandi kwiza’. Dedi bo Yave kakanikisila, dikanda dyoso di basi Yuda divutuka ku Yelusalemi bo vavyoka 70 di mimvu mu thangu Babiloni yituluka. Ntinu Kolesi wuvutula zimbungu zyoso zi wola, zi palata, ayi byaboso biba ku nzo yinlongo yi Yave ntinu Nebukadenesali kayiba. Ngye mamona phila Yave kasadila Kolesi mwingi kuvukisa dikanda dyandi?