Ntinu wunkaka wu Babiloni wuba Daliu. Nandi wuzaba ti Danieli wuba mutu wu luvalu. Diawu, kambyekila mfumu mu batu bandi babo bankinza baba ku Babiloni. Angi batu beni baba monanga Danieli nsoki ayi baba tombanga kumvanga bubi. Bawu, bo bazaba ti Danieli wuba sambilanga Yave mintulu mitatu mu kilumbu, bawu bayenda koluka na ntinu Daliu ayi bankamba: ‘Ntinu, sonika nsiku wuntuma batu boso basambilanga to ngyewu. Ayi woso wunsambila zinzambi zinkaka, twala kuntibula mu dibulu di zikhosi.’ Daliu wutya diyindu beni ayi wuvana nsiku.

Bo Danieli kazaba mawu, wuyenda ku nzo. Nandi wufukama va ndambu nela yiba yizibuka ayi wusambila kwidi Yave. Bo batu beni baba monanga Danieli nsoki bayenda ku nzo’andi ayi bambata nandi kemu sambila, bawu bavutuka mu thinu mwingi kuzabikisa mawu kwidi ntinu, ayi bankamba: ‘Danieli mengi kutumukina! Vayi widi mu kunsambila Nzambi’andi mintulu mintatu mu kilumbu. Daliu waba zolanga beni Danieli ayi kabasa tomba ko nandi kafwa. Kilumbu kyoso waba yindula phila kalenda kumvukisila. Angi kasa zaba ko ma kuvanga, kibila nafeka wuvana nswa beni ayi kasa ba ko bu kubaludila wawu. Diawu katumina to batu bandi bantibula mu dibulu di zikhosi.

Mu bwilu buna, Daliu kasa leka ko mu kibila ki kubala Danieli. Mu meni, wuduma zithinu ku dibulu di zikhosi ayi wutela Danieli: ‘Nzambi’aku wu kuvukisidi?’

Daliu wuyuwa mbembo yi Danieli yimvutudila: ‘Mbasi yi Yave yi zibikidi myunu mi zikhosi ayi basa kundya ko.’ Daliu wuyangalala beni! Wutuma bathapula Danieli mu dibulu beni. Danieli kasa kwanyuka ko ni vama. Buna ntinu wutuba: ‘Tibulanu batu bafundidi Danieli mu dibulu di zikhosi.’ Ngye zebi, buna bathumbu vitila, zikhosi zi badya.

Bosi Daliu wuvana nsiku awuwu: ‘Batu boso bafweti vumina Nzambi yi Danieli. Kibila nandi vukisidi Danieli mu dibulu di zikhosi.’

Ngyewu, wunsambilanga Nzambi kadika kilumbu buka Danieli?

Esteli wuba mwana nkyeto mwisi Yuda, waba kalanga ku divula dimweka di Pelesia baba tedilanga Susani. Kaba kadilanga kuna, kibila mu mimvu mivyoka ntinu Nebukadenesali wubotula dikanda dyandi ku Yelusalemi. Nandi wuyonzukila mu myoko mi Molodokai, khomb’andi wunkulutu mu kivumu kinkaka, wuba sadilanga kwidi Ahasevelosi ntinu wu Pelesia.

Ntinu Ahasevelosi waba tomba nkazi wunkaka. Diawu bisadi byandi batumisina bakyeto boso baluta kitoko ku divula beni, ayi batumisa mvandi Esteli. Ngye zebi nani ntinu kasola mu bakyeto boso batumisa mo kaba nkazi’andi? Bukyedika, Esteli. Angi Molodokai wunkamba kabika kutuba ti nandi wuba mwisi Yuda.

Ntinu wuba na kisadisi kimweka ki lungundai baba tedilanga Hamani. Nandi wuba mfumu yi bamfumu boso bantinu, vayi wubatomba batu boso bamfukiminanga ba kummona. Molodokai kaba kumfukiminanga ko. Diawu Hamani wudasukila Molodokai ayi waba tomba kumvonda. Bo kayiza bakula ti Molodokai wuba musi Yuda, wuyiza baka makani ma kuvonda batu boso basi Yuda. Nandi wukamba Ntinu: ‘Basi Yuda batu ba boma; diawu tufweti kuba vonda. Ntinu wunkamba: ‘Vanga moso mambu tidi kuvanga’ ayi wumvana nswa wu kusonika nsiku. Hamani wusonika nsiku wuba tuba: ‘Mu kilumbu 13, mu ngonda Adali, basi Yuda boso befweni fwa.’ Vayi Yave wubamona mambu moso babavanga.

Esteli kasa zaba ko nsiku beni, diawu Molodokai kamfidila nkanda wusonama nsiku beni. Bosi wunkamba: ‘Yenda wusolula ayi ntinu.’ Esteli wumvutudila: ‘Woso mutu wummonika va meso ma ntinu mu khambu kuntumisa, kafweti fwa. Yima dukisa 30 ma bilumbu ntinu kathumisanga ko. Vayi yenkwenda. Na kundonunina nkawu’andi ma yivuka, vayi na kumanga, buna ma yifwa.’

Esteli wukota ku nzo ntinu. Bo ntinu kammona, wiza nonuna nkawu’andi ayi wunyuvula: ‘Mbi wuntomba nzol’ami?’ Nandi wumvutudila: ‘Yitidi kutumisa bubu ngyewu ayi Hamani mwingi mwiza dya ku nzo.’ Bo bamana kudya mu kilumbu beni, Esteli wiza ba tumisa ntulu wummwali. Mu ntulu wummwali, ntinu wiza kuvula Esteli: ‘Mbi tidi nzol’ami?’ Nandi wuvutula: ‘Mutu wuntomba kuphonda na dikanda dyama. Diawu lemvuka wutukula!’ Ntinu wunyuvula: ‘Nani wuntomba kuvonda?’ Nandi wuvutula: ‘Hamani nkwa mambi.’ Ntinu Ahasevelosi wudasuka beni ayi wiza tuma bavonda Hamani mu thangu beni.

Vayi vasa ba ko mutu wulenda kubalula nsiku wusonika Hamani. Diawu ntinu kabyekila Molodokai mwingi kaba mfumu yi bamfumu boso ba ntinu ayi wukamba kasonika nsiku wumona. Molodokai wusonika nsiku wuba tuba ti batu boso basi Yuda balenda kuawu kunwanisa woso kwa mutu wuntomba kubavonda. Mu kilumbu 13 mu ngonda yi Adali, basi Yuda bamana kuvonda zimbeni zyawu. Tona mu kilumbu beni, basi Yuda batona kukembanga kilumbu beni kadika mvu.