70 di mimvu mivyoka tona bana ba Isaeli bavutuka ku Yelusalemi. Vayi bankaka baba kalanga mu mavula ma luyalu lu Pelesia. Esala nganga Nzambi wuba wumweka mu batu beni ayi wuba longanga batu minsiku mi Yave. Bo kazaba ti basi Isaeli ku Yelusalemi babika kulandakana minsiku mi Yave, diawu kabatomba kukwendila kuna mwingi kasadisa basi Yuda. Ntinu Pelesia Alatasasta wiza kamba Esala: ‘Nzambi wuvana ndwenga yi kulongisila minsiku myandi, diawu vutuka ku Yelusalemi ayi woso kwandi tidi kwenda yaku, kalenda kwandi kwenda.’ Esala wiza kutikisa batu boso baba tomba kuvutuka ku Yelusalemi ayi basambila Yave mwingi kaba kyeba mu nzila baba kwenda.

Bawu bavanga ngonda zinna bosi batuka ku Yelusalemi. Zimfumu buna bamona Esala, bankamba ti basi Isaeli bakwela bakyeto baba sambilanga zinzambi zi luvunu. Ngye zebi mbi Esala kavanga bo kayuwa mawu? Nandi wumona beni kyunda diawu kafukimina va ntwal’awu ayi wusambila: ‘ A Yave, ngye wutuvangila mambote mawombo, vayi befu tunsumukanga beni va meso maku.’ Batu boso baba vana, banyonga mu mambi baba vanganga, vayi bawu batatamana kuvanga mambu mambi va meso ma Nzambi. Diawu Esala kasodila bakhulutu ayi mimfundusi mwingi batadila mambu beni. Mu zingonda zitatu zilanda, bawu babaka makani ma kukuka mu tsi baboso baba manga bwongimina Yave.

Bo vavyoka kumi ayi mimvu myodi, mu thangu bamana tunga bibaka bi Yelusalemi, Esala wukutikisa dikanda dyoso va nyalungubu ayi wubatangila minsiku mi Yave. Bo kazibula buku yi minsiku, baboso baba vana batelama. Esala wukembisa Yave, ayi bawu bananguna myoko myawu ayi bakikinina mambu beni. Thangu Esala kaba tanga ayi kaba sudikisa mawu, baboso baba landakana mawu buboti ayi bakikinina ti bukyedika babika kutumamana Yave. Bankaka badila, bankaka banyonga beni ayi bamona zitsoni mu mambi mawu. Mu kilumbu kilanda, bo Esala kabwe tanga minsiku mi Yave, balonguka ti yiba fikama thangu yi vanga nkungi wu mavuala kwidi Yave; diawu bayendila mu thinu mwingi kukubika nkungi beni.

Mu sambwadi di bilumbu bavangila nkungi beni, baboso bayangalala ayi bavutudila Yave matondo phila kasakumunina zitsola zyawu. Bawu babika kuvanga nkungi buka wuna, tona mu bilumbu bi Yosua. Bo nkungi wuvyoka, baboso bakubama, ayi Esala wusambila: ‘Yave, ngye wutuvukisa ku Ngipiti, wutuvana bidya bo tuba mu thandu ayi wutuvana tsi yimboti. Vayi mu thangu zyoso befu tumvanganga mambi va mesu maku. Ngye wufila mimbikudi myaku mwingi ba tulubula, angi befu twisa kuwa ko. Kheti bobo, ngye wutuvibidila ayi wuvanga mambu mamoso wukanikisa kwidi Abalami. Diawu bubu befu tunkanikisa kutumamana mu thangu zyoso.’ Bawu basonika makani beni bosi zimfumu, zi Levita, ayi zinganga zyoso zi Nzambi bavyaka muawu nlembu.

Tuvutuka nkadu ku mbusa mu thangu Nehemia mwisi Isaeli wuba kalanga ku Susani divula di Pelesia ayi wuba sadilanga ku nzo ntinu Alatasasta. Kilumbu kinkaka khomba yi Nehemia wuntwadila zitsangu zimbi zifumina ku tsi Yuda. Nandi wunkamba: ‘Batu bavutuka ku Yelusalemi basinzingila ko mu malembi. Kibila tona basi Babiloni batolumuna luphangu ayi myelo mi divula, yibubu batungidi ko biawu.’ Mambu amomo manyongisa beni Nehemia. Bo kaba tomba kukwenda ku Yelusalemi mwingi kaba sadisa, diawu kasambidila mwingi ntinu kambikila nzila.

Ntinu bu kabakula ti Nehemia mu kyunda kaba, diawu kankambila: ‘Wukadila ko phila ayoyo. Mbi bi kutatisa?’ Nehemia wumvutudila: ‘Bwidi yilenda bela mayangi mu kutala ti divula dyami Yelusalemi didi dituluka?’ Muna ntinu wunyuvula: ‘Mambu mbi tidi yi kuvangila?’ Mu nswalu Nehemia wusambila mu tsi ntima, bosi ko wutuba: ‘Ti kuba, phana nswa mwingi yetungi luphangu lu Yelusalemi.’ Ntinu Alatasasta wuvana Nehemia nswa ayi masodi mwingi menda yandi ti ku Yelusalemi. Wubyeka mvandi Nehemia mfumu yi basi Yuda ayi wumvana mabaya mwingi kavangila myelo mi luphangu.

Bu Nehemia kavitila ku Yelusalemi, wukongudila luphangu loso lu divula. Bosi wukadisa zinganga zi Nzambi ayi zimfumu zinkaka. Bosi wuba kamba: ‘Kyadi ayi kyunda mambu yima mona. Tufweti tunga luphangu.’ Baboso bakikinina ayi batona kutunga luphangu.

Angi zimbeni zi basi Isaeli baba sakinina ayi batuba: ‘Luphangu muntunga, kheti ḿbaku kalenda kwandi ku lubwisa.’ Vayi bawu basa bavuvukila ko, angi batatamana kutunga ti bamanisa kutunga bibaka.

Zimbeni zyawu zifumina mu khonzo ziwombo, zikana kwiza nwanisa basi Yelusalemi mu kinzimbukila. Buna basi Yuda bayuwa mawu, bamona boma. Angi Nehemia wuba kindisa: ‘ Bikanu kumona bona kibila Yave widi yitu.’ Bosi Nehemia wutula masodi mwingi bakengidila batu baba tunga, diawu zimbeni bakhambu bwe bakila bu kuba nwanisina.

Bamanisa kutunga luphangu ayi myelo mu 52 di bilumbu. Nehemia wutumisa zilevita ku Yelusalemi mu kilumbu ki nzibudulu. Wukhupika bawu mu mangumba mwadi ma minyimbidi, bawu bamaka va yilu bibaka bi luphangu ayi biza vasana. Nehemia wiza kwenda khonzu yinkaka yi luphangu na dingumba dithete, angi Esala wiza kwenda na dingumba dimwadi khonzu yinkaka mwingi badengana. Bo baba dyata baba kwesikanga ayi kuyola minkunga kwidi Yave nate badengana. Bawu bamana kuzunga luphangu loso. Babakala boso, na bakyeto ayi bana balezi bavana minkhayilu kwidi Yave ayi bavanga Nkembo. Zimbembu zyawu zi mayangi ziyuwakana ti ku kinanu.