Tona vana ba bwe tunga luphangu lu Yelusalemi, va vyoka 400 di mimvu. Mu ndeko divula di Yelusalemi mube kalanga Zakalia nganga Nzambi ayi nkazi’andi Elizabeti. Bawu bakwela mu thama, vayi basa buta ko ni mwana wumweka. Angi kilumbu kinkaka mu thangu Zakalia kaba vika bimfimbu voti malasi mamfimbu ku tempelo, mbasi yi Yave yimmonikina. Zakalia wumona beni boma, vayi mbasi beni yiba dizina di Ngabi wunkamba: ‘Bika kumona boma. Kibila Yave ma kuthuma mwingi yi kuzabikisa zitsangu zimboti. Nkazi’aku wunkwiza buta mwana wu dibakala, ayi dizina dyandi dyala ba Yoane. Nandi Yave kama sola ayi kaveni kiyeku ki nkinza.’ Zakalia wuyuvula: ‘Bwidi yilenda kikinina mambu amomo? Kibila nkazi’ami ayi minu veka tuma nunina ngolo mwingi kubwe buta mwana.’ Ngabi wunkamba: ‘Nzambi nandi ma kumfila mwingi yikukamba tsangu ayiyi. Angi bo wunkhambu tela mana, ngye wunkwiza ba mutu wunkhambu tubanga ti mwana beni kala butuka.’

Zakalia wukala beni kisina ku khati tempelo yinlongo. Vana kabasika, batu baba ku nganda baba tomba kuzaba kibila kakadila kisina. Vayi nandi kasa bula ko ni mbembo, angi mu myoko to kaba vangilanga bidimbu. Diawu batu beni bavisila ti nandi tsangu yi Nzambi katambula ku khati kaba.

Bosi, Elizabeti wuyiza ba bwemba ayi wubuta mwana wu dibakala, dedi bo mbasi katubila. Bakundi ayi basi dikanda bayangalala ayi bayiza mona mwana beni. Elizabeti wuba kamba: ‘Dizina dyandi Yoane.’ Vayi bawu batuba: ‘Va dikanda dyaku vasi mutu bantedilanga Yoane. Mboti wuntedila Zakalia, dizina di tat’andi.’ Angi Zakalia wusonika mu mwa dibaya: ‘Dizina dyandi Yoane.’ Mu thangu beni, Zakalia wutona bwe koluka! Zitsangu zitedi mwana beni zityamuka mu tsi yoso yi Yuda, ayi baba kuyikuvula: ‘Mwana awowo, wala ba nani kuntwala?’

Yave wuyadila phevi’andi yinlongo kwidi Zakalia. Bosi Zakalia wutona kubikula: ‘Bika Yave kazituswa, Nandi wukanikisa kwidi Abalami ti wala fila Mesiya mwingi ka tukula. Yoane wunkwiza ba mbikudi, ayi wunkwiza kubika ndizulu yi Mesiya.’

Ngye zebi! Ntindu mangitukulu beni mawu mamonikina mvandi Malia wuba dikanda dimweka na Elizabeti. Mu dilongi dinlanda tunkwiza bwela kuzaba mawu.

Elizabeti wuba butu kyandi baba tedilanga Malia waba kalanga ku divula di Nazaleti ku Ngalili. Malia wuwizana dikwela ayi Zozefi wuba kalipintelo. Mbasi Ngabilieli wumonikina Malia bo Elizabeti kaba bwemba bu ngonda sambanu. Wunkamba: ‘Mbote’aku Malia! Ngeyo monokono nlemvo kuidi Yave.’ Malia kasa visikisa ko mambu Ngabilieli kaba tuba. Ngabilieli Wunkamba dyaka: ‘Ngye wunkwiza ba mu bwemba ayi wela buta mwana wu dibakala wela kuntedila Yesu. Wela ba Ntinu ayi wela yala thangu zyoso.’

Malia wuvutula: ‘Yisa zaba dibakala ko. Bwidi yilenda butila mwana?’ Mbasi Ngabilieli wunkamba dyaka: ‘Yave kalembakananga dyambu ko. Pheve yinlongo yala ba yaku ayi wela buta mwana dibakala. Butu kyaku Elizabeti mvandi widi mu bwemba.’ Buna Malia wuvutula: ‘Minu yidi kisadi kinkyeto ki Yave, bika mabela boso bu tubidi.’

Malia wuyenda ku divula diba ku mbata myongo mwingi katala Elizabeti. Thangu Malia kavana Elizabeti mboti, mwana wuba mu kivumu kyandi wunyikuka. Mu nzila pheve yinlongo, Elizabeti wutuba: ‘Malia Yave wu kusakumuni. Nzitusu mu kutambula ngudi yi Mfumu’ami ku nzo’ami.’Malia wumvutudila: ‘Yinzitisa Yave mu ntim’ami woso.’ Malia wuvyokisa ngonda tatu ku nzo Elizabeti, bosi ko wuvutuka ku bwala bwandi ku Nazaleti.

Thangu Zozefi kazaba ti Malia wuba mu bwemba, wutomba kumanisa ngwizani baba yi kukwela. Angi mbasi yimmonikina mu ndosi ayi wunkamba: ‘Bika mona boma bu kwela Malia ka nandi kasa vanga dyambu dimbi ko.’ Diawu Zozefi wukikinina Malia kaba nkazi’andi ayi wunnata ku nzo’andi.