Ntinu wu Loma Sezali Ongisite wuvana lutumu lu tanga batu boso. Diawu kavanina nswa basi Yuda boso bavutuka mu mala mawu ayi ba kisonikisa. Zozefi ayi Malia mvawu bavutuka ku Betelemi ku divula Zozefi kabutukila. Mu thangu beni, Malia waba belama kubuta.

Bo bavitila ku Betelemi, bavikila va mwa phaka yi bibulu kibila, basa baka ko kibwangu ki kukala. Vawu Malia kabutila Yesu. Nandi wuzinga mwana mu minledi ayi wuntula mu dikwala baba tulanga bidya bi bibulu.

Mu ndeku divula di Betelemi, muba minsungi myaba kengidila mameme mawu ku nganda. Ba susukila mbasi yi Yave wuba monikina ayi nkembo wu mfumu wuba zungidila. Bawu bamona boma buwombo, vayi mbasi wuba kamba: ‘Bikanu kumona boma.’ Minu yidi zitsangu zimboti mwingi kuluzabikisa. Mesiya mabutuka bubu ku Betelemi.’ Mu thangu beni, vayiza zimbasi ziwombo ziba tuba: ‘Vananu nkembo kwidi Nzambi ku diyilu, ayi ndembama yiwala ntoto woso.’ Bosi zimbasi beni zizimbala. Mbi minsungi beni mi mamemi bavanga?

Bawu batuba: ‘Mu thangu ayiyi, ndoko’anu ku Betelemi.’ Bawu bayenda ku Betelemi ayi badenga Zozefi ayi Malia va mwa phaka baba kalanga na mwana wutsombi.

Baboso bayuwa mambu mbasi kakamba minsungi mi mamemi baba kwitukanga. Malia wuyindula mambu moso mbasi kankamba ayi kasa zimbakana ko ni dimweka. Bosi minsungi mi mamemi bavutuka kuawu, ayi bakembisa Yave mu mambu moso bamona voti bayuwa.

Mu tsi mweka ku leste yi Isaeli, kuba batu babe tanga mana ti zimbwetila zilenda kuba twadisa. Bwilu bumweka, ndambu babakala basi leste bamona mbwetila yinlezama, yindyata ku yilu ayi balandakana yawu. Mbwetila beni, yiba nata ku Yelusalemi. Buna bavitila, bayuvula: ‘Kuawu kwidi mwana wala kwiza ba ntinu basi Yuda? Befu twizidi mwingi tumbwongimina.’

Thangu Elodi ntinu wu Yelusalemi kayuwa tsangu yi ntinu mona wufwema ngolo. Wuyuvula zimfumu zi zinganga: ‘Kwidi ntinu beni kafweti butukila?’ Bawu bankamba: ‘Mimbikudi mituba ti nandi kafweti butukila ku Betelemi.’ Diawu Elodi wutela batu baba ku leste ayi wubakamba: ‘Yendanu ku Betelemi ayi monanu mwana beni. Luvutukanu mwingi mukhamba kibwangu kadi kibila minu mvami yitidi kumbwongimina.’ Angi luba kwandi luvunu.

Mbwetila yitona dyaka kudyata. Babakala beni balandakana yawu ti ku Betelemi. Mbwetila yitelama va yilu nzo mweka ayi bakota muna. Babata Yesu ayi ngudi’andi Malia. Bambwongimina ayi bamvana mikhayilu mi thalu yiwombo. Bukyedika kwandi ti Yave nandi wufila babakala abobo mwingi biza tala Yesu? Ndamba.

Mu bwilu buna, Yave wukamba Zozefi mu ndosi: ‘Elodi tidi kuvonda Yesu. Bonga nkazi’aku ayi mwana lutina ku Ngipiti. Kalanu kuna nate ndyela mukamba ti thangu yifweni yi kuvutukila.’ Zozefi ayi dikanda dyandi bayenda mu nswalu ku Ngipiti.

Yave wukamba babakala baba ku Leste, babika kuvutukila kwidi Elodi. Buna Elodi kamona ti basa vutuka ko, wufwema beni. Kibila kasa bwe baka ko bu kuzabila vaba Yesu. Nandi wutuma bavonda bana boso ba babakala baba phunga yi Yesu mu Betelemi yoso. Angi Yesu wuvuka, bila bantinisa ku Ngipiti.

Bo Elodi kafwa, Yave wukamba Zozefi: ‘Thangu yifweni yi kuvutukila ku Isaeli.’ Zozefi, Malia ayi Yesu bavutuka ayi bavikila ku Nazaleti.