Zozefi ayi Malia baba kalanga ku Nazaleti na Yesu ayi bana bawu bankaka ba babakala ayi ba bakyeto. Zozefi wube konzulanga dikanda dyandi mu kisalu kyandi ki kalipintelo, wulongisa bana bandi bazaba Yave ayi minsiku myandi. Babe kwendanga mu zinzo zi Nzambi mu kubwongimina Yave ayi ku Yelusalemi ku nkungi wu Pasika mimvu myoso.

Thangu Yesu kadukisa 12 di mimvu, dikanda dyandi diyenda ku Yelusalemi mu dyambu di nkungi wu Pasika boso bubela kifu kyawu. Divula diba diwala batu bayiza kukemba nkungi beni. Buna wumana, Zozefi ayi Malia batona vutuka ku Nazaleti; bamwena ti Yesu wuba yawu mu dingumba. Angi thangu bantomba kwidi bibutu byawu binkaka biba dyata yawu, basa kummona ko.

Buawu Zozefi ayi Malia bavutukila ku Yelusalemi, ayi babila Yesu mu bilumbu bitatu. Buna bayenda ku tempelo, babata Yesu va khati minlongi, wunkuwa buboti mambu baba longa ayi kukuvula byuvu. Minlongisi bayituka beni mu mimvutu Yesu kaba vutulanga. Bawu bamona ti Yesu wuvisikisa buboti minsiku mi Yave.

Zozefi ayi Malia basa ba ko ntima wukuluka. Malia wutuba: ‘Mwana, tube kwe tombanga muma moso! Kwidi wubedi?’ Yesu wuvutula: ‘Lwisa zaba ko ti minu yifweti ba ku nzo Tat’ami?’

Yesu wuvutuka ayi matata mandi ku Nazaleti. Zozefi wulongisa Yesu kisalu ki kalipintelo. Mu mbwenu’aku, phila mutu mbi Yesu kaba mu bumwana bwandi? Mu ndyonzukulu’andi, Yesu wubwela ndwenga, diawu Nzambi ayi batu baba kunzodilanga beni.

Yoane, mwana wu Zakalia ayi Elizabeti, wuyonzuka ayi wuyiza ba mbikudi. Yave wusola Yoane mwingi kalubula batu ndizulu yi Mesiya. Vayi nandi kasa longilanga ko batu mu zinzo zi zikhutukunu ove mu mavula. Angi nandi kinanu kaba longisilanga buka mu zithandu ayi mu ndeko mwila. Basi Yelusalemi ayi basi Yuda baba kwendanga kwidi Yoane mwingi kaba longisa. Nandi wuba kamba babika vanga mambu mambi mwingi bayangidika Yave. Bawombo babalula mavanga mawu ayi Yoane wuba botika bo bayuwa mambu kaba longisa.

Yoane kasa nata ko nzingulu yi busina. Buka bikhutu kaba vwatanga, bivangulu mu mika mi kamela, ayi bidya byandi biba mindeka voti makhoko ayi wika. Bawombo baba tombanga kuzaba Yoane. Bafalisi ayi basaduki mvandi baba kwendanga mwingi kummona. Yoane wuba bakambanga: ‘Fungulanu masumu minu ayi balulanu mavanga minu. Bikanu kuyindulanga ti bo lubutukila mu nkuna wu Abalami, mawu mamvanga luba batu balutidi luvalu voti bana ba Nzambi.’

Bawombo baba kuvulanga Yoane: ‘Mbi tufweti vanga mwingi kukwangidika Nzambi?’ Yoane wuvutudila basi Yuda: ‘Boti bikhutu byodi bidi yaku, vana kimweka kwidi mutu wukhambulu.’ Zebi kibila mbi Yoane kabakambila mawu? Nandi waba tomba kubalongisa ti mwingi bayangidika Yave, bafweti monisa luzolo kwidi batu bankaka.

Yoane wukamba baba kongulanga phaku: ‘Tubaganu kyedika ayi bikanu kukwibanga bankaka.’ Kwidi masodi nandi wutuba: ‘Bikanu kuvuna ayi kubonga zimbongo zi batu bankaka.’

Zinganga zi Nzambi na Zilevita, mvawu bayiza kwidi Yoane ayi bayuvula: ‘Ngyewu widi nani?’ Yoane wutuba: ‘Minu yidi mbembo yi mutu wowo wulembu yamikina mu thandu, luludika nzila yi Yave buka bu bikudila mbikudi Yesaya.’

Batu ba yangalala mu mambu Yoane kaba balonganga. Bawombo baba yikuvulanga ti Yoane nandi Mesiya. Vayi nandi wubavutudila: ‘Minu munlangu yilembu lubotikila vayi mutu wowo wunkwiza, nandi lutidi mangolo; yisa fwana ko mu zibula minsinga mi zisapatu zyandi. Nandi wela kulubotikila mu pheve yinlongu.’