Yoane wuba longanga batu ti mutu wumweka waba kwiza wulutidi nkinza ke naveka. Bo Yesu kadukisa 30 di mimvu, nandi wubotuka ku Ngalili ayi wuyenda ti ku mwila wu Yolidani, va kibwangu Yoane kaba botikilanga batu. Yesu bo kadinda Yoane mwingi kambotika, nandi wumvutudila: ‘Minu yilendi kubotika ko, vayi ngyewu, ngye fweti kumbotika.’ Yesu wukamba Yoane: ‘Buawu Yave kantombila.’ Bosi bawu babwadi bakuluka mu mwila wu Yolidani, ayi Yoane wukotisa nyitu yoso yi Yesu mu nlangu.

Bo Yesu kabasika mu nlangu, nandi wusambila. Mu thangu beni, diyilu dizibuka ayi phevi yi Nzambi yikuluka buka dibembi. Mbembo yi Yave yiyuwakana ku diyilu: “Ngyewu widi mwan’ama wu luzolo, khini yiwombu wukumbonisanga.”

Bo pheve yi Yave yiyadila mu Yesu, nandi wuyiza ba Klisto ove Mesiya. Bosi wuyiza ba wukubama mwingi kutona kisalu Yave kamvana.

Bo kamana kubotama, Yesu wuyenda ku thandu ayi wudukisa kuna 40 di bilumbu. Bo kavutuka, nandi wuyenda tala Yoane. Mu thangu Yesu kaba fikama, Yoane wutuba: ‘Talanu mwana dimemi di Nzambi, dimbotulanga masumu mu nza.’ Yoane katubila mawu kibila kaba tomba batu bazaba ti Yesu nandi Mesiya. Ngye zebi mambu mbi Yesu kamonikina bo kaba ku thandu? Tunkwiza zaba mawu mu dilongi dinlanda.

Bo Yesu kamana kubotama, phevi yinlongo yinnata ku thandu. Yesu wudukisa kuna 40 di bilumbu, ayi nzala yiwombo kaba. Mu thangu beni, Satana wuyiza mwingi kuntota ayi wunkamba: ‘Boti ngye widi mwana Nzambi, muna kamba mamanya mama makituka mapha.’ Yesu wumvutudila: ‘Disonama ti: ‘Mutu kalendi zingila kaka mu dipha ko vayi mu mambu moso mantotukanga mu munu wu Nzambi.’

Bosi Satana wubwe kamba Yesu: ‘Boti ngye widi mwana Nzambi, wukiloza ku tsi tempelo, bila disonama: ‘Nzambi wela fidisa zimbasi zyandi mu dyambu dyaku ayi zyela kunata mu myoku miawu mwingi kulu kwaku kubika bumina thutu mu dimanya.’ Yesu wubwe kumvutudila: ‘Disonama dyaka ti: Wulendi vukumuna Nzambi’aku ko.’

Satana wumonisa Yesu mintinu myoso mi nza ayi minkembu myandi, bosi wunkamba: ‘Tala, ngye kumfukimina kwandi ayi kumbwongimina yeka kuvana byuma byoso biabi.’ Vayi Yesu wumvutudila: ‘Botuka, Satana! Bila disonama ti: Mfumu Nzambi’aku nandi fweti bwongimina ayi nandi to fweti sadila.’

Bosi, Satana wuyenda ayi zimbasi ziyiza kindisa Yesu ayi bamvana bidya. Tona thangu beni, Yesu wutona kulonga tsangu zimbote zi Kintinu kibila kyawu kisalu bamfidila va ntoto mwingi kavanga. Mu kibila ki zi tsangu beni zimbote, batu baba zolanga Yesu ayi baba kunlandakananga mu bibwangu byoso kaba kwendanga.