Vasa bwe vyoka ko zingonda ziwombo tona Yesu kabotama mu mvu 30, nandi ayi batu bawombo bayenda ku Yelusalemi mu nkungi wu Pasika. Mu nkungi beni, baba vananga mikhayilu mi bibulu ku tempelo. Batu bankaka baba twalanga bibulu biawu ti ku Yelusalemi, vayi bankaka baba sumbilanga biawu ba kuvitila ku Yelusalemi.

Bo Yesu kayenda ku tempelo, wumona batu baba sumbisa bibulu ku khati. Nandi wuvisa ti batu beni, basa kwenda ko kubwongimina Yave vayi zimbongo zyawu bayenda kasala! Mbi Yesu kavanga? Nandi wuvanga kikoti ki minsinga ayi wubasisa mamemi ayi zingombi ku nganda yi tempelo. Nandi wubwisa zimeza zi batu baba sumbisa ayi wutyamuna zimbongo zyawu va tsi. Yesu wukamba batu baba sumbisanga mabembi: ‘Botulanu byuma binu avava! Bikanu kukitula nzo Tat’ami bwangu ki kusumbisila byuma binu.’

Batu boso baba ku tempelo bayituka mu mambu Yesu kaba vanga. Minlandikini myandi batebuka monyo mbikudulu yitubila matedi Mesiya: ‘A Nzambi, luzolo lwidi yama mu diambu di nzo’aku luawu lwela kuphondisa.’

Mu mvu 33, Yesu wuyenda khumbu yimwadi ku tempelo ayi wukukisa batu baba sumbisanga kuna byuma. Nandi kaba tomba batu boso bakinzika nzo Tat’andi.

Bo Pasika yivyoka, Yesu ayi minlandikini myandi bayenda ku Ngalili. Angi bawu bavyokila theti ku Samalia va ndeku divula baba tedilanga Sikali mwingi bavunda nkadu. Yesu wukala va ndeku kisima ki Yakobi mu thangu kaba telimina minlandikini myandi bayenda kasumba bidya ku bwala bufikama.

Mu thangu beni, va yiza nkyeto wumweka va kisima mwingi kuteka nlangu. Yesu wunkamba: ‘Phana mwa nlangu yinwa.’ Nandi wumvutudila: ‘Bwidi ngye widi mwisi Yuda wulenda dindila minu mwisi Samalia nlangu wu kunwa? Bila basi Yuda ayi basi Samalia bawizananga ko!’ Yesu wunkamba: ‘Enati zebi mutu wu kulinda nlangu wu kunwa, khanu ngeyo fweti kunlinda mwingi nandi kakuvana nlangu wu luzingu.’ Nkyeto beni wunyuvula: ‘Bwidi malenda bela; Ngye wisi ko ni kizenza mwingi kutekila nlangu?’ Yesu wumvutudila: ‘Woso mutu wela nwa nlangu ndyela kumvana, kalendi bwela mona phuila ko.’ Buna nkyeto wunkamba: ‘A tata, phana nlangu beni mwingi yibika bwe monanga phuila.’

Bosi Yesu wunkamba: ‘Yenda landa nnuni’aku.’ Vayi nandi wunkamba ti kasa ba ko nnuni. Yesu wubwe nkamba: ‘Yizebi ti babakala batanu bama banga yaku ayi dibakala dinzinganga yaku kasi ko nnuni’aku.’ Nandi wukamba Yesu: ‘Yima visa ti ngye widi ḿbikudi.’ Ayi wubwe tuba: ‘Befu basi Samalia tunkikininanga ti tulenda bwongimina Nzambi akuku, vayi basi Yuda bantubanga ti tufweni kwendanga ku Yelusalemi mwingi kwe bwongimina Nzambi. Minu yizebi ti Mesiya wunkwiza ayi wala tulongisa bwidi tufweti bwongimina Nzambi.’ Bosi Yesu wunkamba dyambu ka khambu zabikisa batu bankaka: ‘Minu yidi Mesiya.’

Nkyeto beni bo kayuwa mawu, wuyenda mu thinu ti ku Samalia ayi wukamba basi Samalia: ‘Minu yima bakula Mesiya. Nandi ma kukhamba mambu moso matedi mu minu. Twendi’anu mwingi mummona!’ Bawu banlandakana ti ku kisima ki nlangu ayi bayuwa malongi ma Yesu.

Basi Samalia baleba Yesu mwingi kakala va divula diawu. Yesu wukala vana bilumbu byodi ayi wulonga batu. Bawombo bakikinina ti Yesu nandi Mesiya. Basi Samalia bakamba nkyeto beni wuyenda kuba tela: ‘Bo tuma kuwa befu veka dibakala dyodyo, bukyedika tukikinini ti nandi mvukisi nza yoso.’