Bo kamana kubotama, Yesu wutona kulonga: ‘Kintinu ki Nzambi kima fikama.’ Minlandikini myandi bayenda yandi ku Ngalili ayi ku Yuda. Bo Yesu kavutuka ku Nazaleti divula kabutukila, wuyenda ku nzo Nzambi, wuzibula masonokwa ma Yesaya, ayi wotona kutanga mu mbembo yinangama: ‘Yave wuphana pheve yinlongo mwingi yisamuna tsangu zimbote.’ Ngye zebi kibila mbi Yesu katubila mawu? Kibila batu baba tomba nandi kasadila pheve yi Nzambi mwingi kuvangila mangitukulu. Vayi Yave kavanina pheve’andi kwidi Yesu, mwingi kasamuna tsangu yitedi Kintinu ki Nzambi. Bosi Yesu wukamba baboso baba vana: ‘Bubu mbikudulu ayiyi yima sunduka.’

Yesu bosi wuyenda ku ḿbu wu Ngalili, ayi wubata kuna minlandikini myandi minna baba minlobi mi zimfu. Mazina mawu maba: Petelo, Andele, Yakobi voti Zaki ayi Yoane. Yesu wuba kamba: ‘Ndandakananu ayi ndiela kulukitula minlobi mi batu.’ Bawu babika makondi mawu, balandakana Yesu mu kulonga zitsangu zi Kintinu ki Yave mu ntoto woso wu Ngalili. Bawu balongisa zitsangu beni mu zinzo zi Nzambi, mu mazandu ayi mu zinzila. Batu bawombo baba kwe balandakananga kosokwa khonzo bankwenda. Zitsangu zitedi Yesu zityamuka mu zitsi zyoso nate ku Sili.

Kuntwala, Yesu wuvana mangolo ayi luyalu kwidi minlonguki minkaka mwingi kubuka bimbevo ayi kukukisa zipheve zimbi mu batu. Minlonguki minkaka miyenda yandi kwe longa mu mavula ayi mu mala. Bakyeto bakwikama buka Maliya Madaleni, Zana, Suzani ayi bankaka, bavanga mangolo mwingi kusadisa Yesu ayi minlonguki myandi.

Yesu bo kamana sudikisa buboti minlongisi myandi bu bafweti longila batu, bosi wuba fila mwingi balonga ku divula dyoso di Ngalili. Bawombo bayuwa zitsangu beni zi Kintinu mvawu bayiza ba minlandikini mi Yesu ayi babotama. Vayi batu bawombo mu bibwangu binkaka baba tomba kukuwa matedi Kintinu beni. Yesu wuba fwanikisila buka mbongo yiba yiyela mwingi kuvela. Diawu kakambila minlongisi myandi: ‘Lindanu mu nsambu kwidi Yave Mfumu yi tsola mwingi kabwela fidisa bisadi mu dyambu bavela mbongo yoso ayoyo.’ Bosi Yesu wubwe sola 70 di minlandikini ayi wuba fila bwadi bwadi mwingi balonga ku Yuda. Bawu balonga batu boso matedi Kintinu ki Nzambi. Minlonguki, bo bavutuka mu mayangi, bayenda mu thinu kazabikisa Yesu kisalu kimboti bavanga ayi mambu mamonika. Bawu batuba ti ni Satana kasa nunga ko kutula nkaku kisalu ki kusamuna.

Yesu wuba kubika bubote ti kamona ti bawu bala tatamana kulonga kheti nandi vutukidi ku diyilu. Ku tsuka wuba kamba: ‘Yendanu, lukitula batu ba zitsi zyoso minlonguki myami ayi luba botika.’

Yave wutuma Yesu va ntoto mwingi kiza longa tsangu yi Kintinu ki Nzambi. Mo kamonisa mambu Yesu kala vanga bo kala yala buka ntinu, Yave wumvana pheve yinlongo mwingi kubukisa bimbevo byoso. Mu bibwangu byoso kaba kwendanga, batu baba kunlandakananga mwingi kaba sadisa ayi nandi wuba kuba belusanga. Ziphofo baba monanga, bafwa bavulubuka, bikata bitelama ayi balawuka mu bila ki ziphevi zimbi babeluka. Bawombo babeluka mu kusimba to mu bikhutu bi Yesu. Bukyedika, Yesu ni thangu yimboti yi kuvundila kasa ba ko kibila batu baba kunlandakananga mu bibwangu byoso kaba kwendanga.

Kilumbu kinkaka, batu banata kwidi Yesu kikata ki libakala. Angi basa baka ko bu kunkotisila ku nzo kibila batu basabila ngolo ku khati. Bawu bamaka kuyilu nzo, batobula mwanza ayi bankulula ti vaba Yesu. Bosi Yesu wukamba kikata beni: ‘Telama ayi lyata.’ Batu bayituka beni bu katona kulyata.

Vasa vyoka ko bilumbu biwombo, bo Yesu kayenda ku bwala bunkaka, kumi di babakala baba buazi banlandakana ayi balinda: ‘Yesu wutu sadisa’. Mu thangu yikhulu, baba bikanga ko batu badi buazi kufikama vadi batu bankaka. Diawu Yesu kaba kambila benda ku tempelo. Vayi mu nzila, bawu babeluka. Wumweka mu bawu bo kamona ti wubeluka, wuvutuka mwingi kwiza vutudila Yesu ayi Nzambi matondo. Yindula kwaku! Mu kumi yoso, wumweka to wuvutudila Yesu matondo!

Nkyeto wumweka wubedila 12 li mimvu wubatomba kubeluka. Nandi wufyelumuka muba dingumba di batu ti kavitila vaba Yesu ayi wubumina mu kikhutu ki Yesu. Mu thangu beni, nandi wubeluka. Yesu wuyuvula: ‘Nani ma kumbumina?’ Nkyeto beni wuba titumuka mu boma, ayi wukikinina ti nandi wubumina mu bikhutu bi Yesu. Yesu wunkamba: ‘Mwan’ami, yenda kwaku mu ndembama.’

Libakala Iimweka baba tedilanga Yailo wulinda kwidi Yesu: ‘Lemvuka yiza kuna nzo’ama bila mwan’ama wu nkyeto bela ki bela.’ Angi bo katuka ku nzo Yailo, mwana beni wu yifwila! Thangu Yesu kavitila, wu yedenga batu bawombo baba dila va kimweka ayi dikanda. Yesu wubakamba: ‘Bikanu kudila bila lala kalembu lala.’ Bosi, Yesu wusimba mwana beni mu koko ayi wutuba: ‘Mwana, telama!’ Nandi wutelama ayi wukamba matata mandi bamvana bidya. Yindula nyenzi matata mandi bamona!