Buna kamana longisa mvu wumweka ayi ndambu, Yesu wutomba kusola bafweni sala yandi mu kithwadi mwingi kulonga ayi kudiatisa bimvuka bitheti bi thangu yina. Yesu wuba tomba lusalusu lu Yave mwingi kabaka lukanu beni. Buawu kayendila naveka ku mongo ayi wusambila builu bumvimba. Va meni, wutumisa minlandikini myandi ayi wusola 12 di bapostolo. Ngye wuntebuka moyo mazina mawu? Mazina mawu maba: Petelo, Andele, Zaki, Yoane, Filipi, Balitelemi, Toma, Matai, Zaki (mwana Alafayi), Tade, Simoni ayi Yuda Isikalioti.

Va thonono 12 di bapostolo beni baba kwendanga ayi Yesu kulonga. Vayi bo kaba monisina phila bafweti longila, bosi wuba kamba benda longa baveka. Yave wubavana mangolo ma kukukila zipheve zimbi ayi kubelusa baba bela.

Yesu wuba lufyatu mu bawu ayi wuba kubatedilanga bakundi bandi. Angi Bafalisi baba landakananga ko mambu bapostolo baba longisanga bila bawu baba tubilanga ti bapostolo basa vyokila ko mu bikola byawu. Vayi bawu baba batu bobo Yesu kamonisa phila bafweti longila. Bapostolo, baba mu thangu zyoso zi nkinza mu luzingu lu Yesu, ava kafwa ayi bo kavulubuka. Buka Yesu, bapostolo bawombo baba basi Ngalili, banka baba bakwela.

Bapostolo baba batu basumuka, buawu basa vanganga ko thangu zyoso mambu mafweni. Baba tubanga mambu mu khambu yindula, basa ba ko mvibudulu ayi baba bakanga makani makhambu fwana. Thangu zinkaka baba tombanga kuzaba nani mu bawu wuluta nkinza. Vayi bawu baba batu bamboti ayi baba luzolo luwombo kwidi Yave, bila kumbusa lufwa lu Yesu, kimvuka ki baklisto kivangimina mu lusalusu luawu.

Mu thangu Yesu kamana sola 12 di bapostolo, Nandi wumona ti batu bawombo baba kuntelimina. Bawu babasikila muma muwombo, buka Ngalili, Yuda, Tilo, Sidoni, Sili ayi mu mavula maba ku disimu dinka di Yolidani. Bankaka baba batu babela voti baba mu lutumu lu ziphevi zimbi, vayi Yesu wubelusa baboso. Bosi Yesu wukala va mbata mongo ayi wutona kulonga. Nandi wuba zabikisa mbi bafweti vanga mwingi baba bakundi ba Nzambi. Wubalonga ti bafweti zola Yave kibila tulendi zingila ko mu zingolo zitu. Nandi wubakamba mvandi ti tulendi tuba ko ti tunzolanga Yave befu khambu zola batu boso.

Yesu wutuba: ‘Tubika to kuzola bakundi bitu angi tufweti zola mvandi zimbeni zitu ayi kuba lemvukilanga mu ntima woso. Ti mutu bakini yaku mambu, yenda mu thinu mwingi muyoluka ayi mudedikisa mambu beni. Vangila bankaka ma wutidi ba kuvangila.’

Yesu wubavana mvandi malongi mamboti matedi bu kusadila bisalu binsuni. Nandi wuba kamba: ‘Kuba bukundi na Yave kulutidi nkinza ke kuba zimbongo ziwombo. Mwivi kalenda kwiba kwandi zimbongo zyaku, vayi kalendi kwiba ko kikundi kyaku na Yave. Bika kutatubuka mu matedi mbi wundya, wunnwa ove wumvwata. Talanu zinuni, Nzambi wuba vananga bidya. Kutatubuka kusadisanga ko mutu kuzinga bilumbu biwombo. Lutebukanganu moyo ti Yave zebi byuma luntomba.’

Batu beni bayituka mu philia Yesu kaba balongilanga, kibila minlongi mi binganga basa longanga ko buka nandi. Kibila mbi Yesu kaba longilanga buboti? Kibila mamoso kalonga mafumina kwidi Yave.