Watheti wa Mintinu
1 Bo ntinu Davidi kayiza ba beni kiboba, kheti baba kumvungisilanga mavunga, vayi waba tatamananga kumona kiozi. 2 Diawu bisadi biandi bankambila: “Tunkuiza tomba muana nkietu mueka no kaka bundiniabu ko nyitu ayi nandi wunkuiza ba mfelimiꞌaku. Ayi wunkuiza lalanga va khonzuꞌaku muingi ngie ntinu wubakanga ndungitila yi mbazu.” 3 Diawu batombila mu bibuangu bioso bi Isaeli muana nkietu widi beni kitoko. Ayi Basola Abizague musi Suném ayi bannata kuidi ntinu Davidi. 4 Muana nkietu beni wuba beni kitoko, wuyiza ba mfelimi wu ntinu ayi waba kiebanga ntinu. Vayi ntinu kabasa bundananga ko yandi nyitu.
5 Mu thangu ayoyo, Adonia muana Hagite waba kukinangikanga mu kutuba: “Minu yinkuiza ba ntinu.” Nandi wutuma bankubikila dikalu di mintinu, batu bandiatilanga mu mimvalu ayi mvandi 50 di babakala muingi badumanga vantualꞌandi. 6 Vayi tatꞌandi Davidi kasa nsemba ko mu kunkamba mambu amama: “Kibila mbi widi mu kuvangila mambu amomo?” Adonia wuba beni kitoko ayi nandi wuba kilandu* ki Absaloni. 7 Adonia wuyoluka na Joabe muana Zeruia ayi Abiatali nganga nzambi. Bawu bakikinina kumvana lusalusu ayi kumbuela mioko. 8 Vayi Zadoki nganga nzambi, Benaia muana Jeoiada, ḿbikudi Natan, Simei, Reí ayi masodi balutidi mangolo ma Davidi, basa buela ko Adonia mioko.
9 Bosi Adonia wubonga mamemi ayi zingombi muingi kuvana minkhailu va dimanya di Zoeleti didi va ndeku En-Rogel. Nandi wutumisa zikhomba ziandi bana ba ntinu Davidi ayi bisadi bi Davidi baba basi Yuda. 10 Vayi kasa tumisa ko ḿbikudi Natan, Benaia ayi masodi malutidi mangolo ma Davidi. Mvandi kasa tumisa ko khombꞌandi Salomo. 11 Ḿbikudi Natan wukamba Bate-Seba mamꞌandi na Salomo: “Ngie wusa kuwa ko ti, Adonia muana Hagite weka ntinu? Mfumuꞌitu Davidi kasa zaba ko mambu amomo. 12 Diawu lemvuka, yuwa malongi yekuvana muingi wuvukisa luzingu luaku ayi lu muanꞌaku Salomo. 13 Yenda kuidi ntinu Davidi ayi nkamba: ‘A mfumu, bakana ko ngiewu wuleva phesi kuidi minu kisadi kiaku mu kutuba: “Muanꞌaku Salomo nandi wala ba ntinu va mvingiꞌama ayi nandi wala kala va kikundu kiama ki kimfumu?” Buabu kibila mbi Adonia kekila ntinu?’ 14 Bo wunkuiza yoluka na ntinu minu yinkuiza kota ayi yinkuiza ta kimbangi ti mambu wunkoluka madi makiedika.”
15 Bosi, Bate-Seba wukota kukivinga kiba ntinu. Ntinu wuba beni kiboba ayi Abizague musi Suném waba kunkiebanga. 16 Bate-Seba wufukama ayi wuyinika kizizi kiandi vantuala ntinu. Ntinu Davidi wunyuvula: “Mbi wuntomba?” 17 Bate-Seba wumvutudila: “Ngie veka ntinu wuleva phesi kuidi minu kisadi kiaku mu dizina di Yave Nzambiꞌaku mu kutuba: ‘Muanꞌama Salomo nandi wala ba ntinu va mvingiꞌama ayi nandi wala kala va kikundu kiama ki kimfumu.’ 18 Buabu Adonia weka ntinu, vayi ngie mfumuꞌama wusa zaba ko mawu. 19 Nandi bebonga mamemi ayi zingombi ziwombo ayi bevana minkhailu. Mvandi betumisa bana baku, Abiatali nganga nzambi, Joabe mfumu masodi, vayi kasa tumisa ko Salomo kisadi kiaku. 20 Buabu a ntinu dikabu dioso di Isaeli ngiewu bantala, muingi wuba kamba nani wunkuiza sola muingi kaba ntinu va mvingiꞌaku ayi kukala va kikundu kiaku ki kimfumu. 21 Ngie kukhambu vanga dioso diambu a mfumuꞌama, bo wala fua zaba kuaku ti minu ayi muanꞌama Salomo bala tutadila batu babalukila luyalu.”
22 Bo Bate-Seba kaba koluka na ntinu, ḿbikudi Natan wuvitila. 23 Muna thangu beni, bazabikisa ntinu: “Ḿbikudi Natan mavitila.” Natan wukota kuba ntinu, wufukama ayi wuyinika kizizi kiandi vantual’andi. 24 Ḿbikudi Natan wuyuvula ntinu: “A ntinu bukiedika kuandi ti ngie wutuba mambu amama: ‘Adonia nandi wala phinginina mu luyalu ayi nandi wala kala va kikundu kiama ki kimfumu?’ 25 Kibila bubu nandi makevana minkhailu miwombo mi zingombi ayi mamemi. Ayi mvandi betumisa bana boso ba ntinu, zimfumu zi masodi ayi Abiatali nganga nzambi. Bawu badi mu kudia, kunua ayi badi mu kutuba: ‘Tuzitisanu ntinu Adonia.’ 26 Vayi nandi kasa thumisa ko minu kisadi kiaku, kasa tumisa ko Zadoki nganga nzambi, Benaia muana Jeoiada. Ayi mvandi kasa tumisa ko Salomo kisadi kiaku. 27 Bukiedika ti ngie veka ntinu bemvana nsua wu kuvanga mambu amomo, mu khambu kutsabikisa minu kisadi kiaku? Nani wunkuiza kala va kikundu kiaku ayi nani wunkuiza kuvinginina mu luyalu?”
28 Bo ntinu Davidi kamana kukuwa mambu amomo, nandi wutuba: “Kambanu Bate-Seba kiza.” Bantela, nandi wukota ayi wutelama vantuala ntinu. 29 Ayi ntinu Davidi wuleva phesi mu kutuba: “Yinleva phesi mu dizina di Yave no wuphukisa mu ziphasi ziama zioso, 30 ti dedi bo yi kulevila phesi mu dizina di Yave Nzambi yi Isaeli mu kutuba: ‘Muanꞌaku Salomo nandi wala ba ntinu va mvingi’ama ayi nandi wala kala va kikundu kiama ki kimfumu,’ mawu yemvanga mu kilumbu akiki.” 31 Bosi Bate-Seba wufukama ayi wuyinika kizizi kiandi vantuala ntinu ayi wutuba: “Bika ngie mfumuꞌama ntinu Davidi wuzinga thangu zioso.”
32 Muna thangu beni, ntinu Davidi wutuba: “Telanu Zadoki nganga nzambi, ḿbikudi Natan ayi Benaia muana Jeoiada. Bo Bayenda kue batela, bawu bakota ayi batelama vantuala ntinu. 33 Ntinu Davidi wuba kamba: “Yendanu va kimueka na bisadi biama, lufueti makisa muanꞌama Salomo va mbata phundꞌama ayi nengumunanu nandi ku Giom. 34 Bo lunkuiza vitila kuna, Zadoki nganga nzambi ayi ḿbikudi Natan bankuiza bieka Salomo ntinu wu Isaeli. Bosi lufueti sika phunzi* ayi mufueti tuba mu mbembu yinangama: ‘Zitisanu ntinu Salomo.’ 35 Bosi lufueti kuiza yandi va kimueka bo kankuiza kala va kikundu kiama ki kimfumu. Nandi wunkuiza ba ntinu va mvingi’ama, ayi minu yinkuiza ḿbieka ntuadisi wu Isaeli ayi wu Yuda.” 36 Muna thangu beni, Benaia muana Jeoiada wukamba ntinu: “Amém, bika Yave Nzambi yi mfumuꞌama kata kimbangi mu mawu. 37 Dedi bo Yave ka kusakumunina ngie mfumuꞌama, bika mvandi kasakumuna Salomo ayi kavanga muingi luyalu luandi luluta kena luyalu luaku ngie mfumu Davidi.”
38 Bosi Zadoki nganga nzambi, ḿbikudi Natan, Benaia muana Jeoiada, zikeretita ayi peletite bayenda ayi bamakisa Salomo mu phunda yi ntinu Davidi ayi bannata ku Giom. 39 Zadoki nganga nzambi wuyenda kue landa malasi maba mu phoka yiba ku tenda ayi wudukula mawu ku ntu Salomo. Bosi batona kusika phunzi* ayi dikabu dioso baba tuba mu mbembu yinangama: “Zitisanu ntinu Salomo.” 40 Bosi dikabu dioso batombuka yandi. Bawu baba kue sikanga ziflauta ayi baba beni mu mayangi. Ayi mu kibila ki biyoko babe vanga, ntoto waba titubuka.
41 Bo Adonia ayi batu boso katumisa bamana kudia, bawu bayuwa biyoko. Bo Joabe kayuwa biyoko bi phunzi*, nandi wutuba: “Kibila mbi divula dima wadila ntengu ntengu?” 42 Ava kamana kutuba, Yonatan muana Abiatali nganga nzambi wuvitila. Adonia wutuba: “Kota ngie widi mavanga mamboti yidi lufiatu ti zitsangu zimboti matuala.” 43 Vayi Yonatan wukamba Adonia: “Yisa tuala ko zitsangu zimboti. Mfumuꞌitu ntinu Davidi mabieka Salomo ntinu. 44 Mvandi ntinu Davidi befila Zadoki nganga nzambi, ḿbikudi Natan, Benaia muana Jeoiada, zikeretita ayi zipeletite banata Salomo. Ayi babe mmakisa vambata phunda yi ntinu Davidi. 45 Zadoki nganga nzambi ayi ḿbikudi Natan bama kuenda ku Giom ayi bama bieka Salomo ntinu. Bosi babe nanguka kuna mu mayangi ayi divula dioso dieka ntengu ntengu, diawu lube kuwila lusuku alolo. 46 Mvandi bama kadisa Salomo va kikundu ki kimfumu. 47 Diambu dinkaka diakadi: Bisadi bi ntinu Davidi babe kuenda vantualꞌandi ayi babe tuba: “Bika Nzambiꞌaku kavanga dizina di Salomo diluta tambula nzitusu kena dizina diaku ngie mfumu ayi bika luyalu lu Salomo luluta kena luyalu luaku. Bosi ntinu Davidi befukama vakika. 48 Ayi betuba: “Bika Yave Nzambi yi Isaeli kazitusu, kibila nandi besola mutu bubu no bekala va kikundu kiama ki kimfumu ayi nandi bephana luaku lu kumona mambu moso amomo.’”
49 Batu boso Adonia katumisa bayiza ba mu boma, batelama ayi bayenda kuawu. 50 Adonia mvandi wuyiza ba mu boma mu kibila ki Salomo. Mu kibila akiokio, nandi wutelama ayi wuyenda kue buila ziphoka zi kikumu. 51 Bosi bakamba ntinu Salomo mambu amama: “Adonia widi mu boma mu kibila ki ntinu Salomo ayi bekuenda kue buila ziphoka zi kikumu ayi betuba: ‘Ntinu Salomo kafueti leva phesi ti kasinkuiza phonda ko minu kisadi kiandi.’” 52 Diawu ntinu Salomo wutuba: “Na kuvanga mambu mamboti, ne nlengi mueka widi ku ntu’andi wala doduka va tsi, vayi na kuvanga mambu mambi, buna yala tuma bamvonda.” 53 Bosi ntinu Salomo wutuma muingi bankulula va kikumu. Adonia wuyenda kuba ntinu Salomo ayi wufukama vantuala ntinu. Ayi ntinu Salomo wunkamba: “Yenda ku nzoꞌaku.”