Bika Kutomba Mamboti Maku Veka Dedi Basi Nza
Batu bawombo bantombanga baba vangilanga mambu mamboti ayi ba kuyimuenanga ti balutidi luvalu kena bankaka. Kheti bo ba kubavangila mamboti, bawu ba bue tombanga malutidi. Mayindu amomo madi kithuadi na zikhadulu zimbi zi bilumbu bitsuka Kibibila kintubila.—2 Ti. 3:2.
Kutomba mamboti mitu veka masa tonina ko mu thangu’itu. Adami ayi Eva batomba mamboti mawu veka ayi babaka makani ma batuadisa ziphasi ziwombo. Mimvu miwombo kuntuala, Ntinu Uzia musi Yuda wuyenda kue vika nkhailu ku tempelu kheti kasa ba ko nsua wu kuvanga mawu. (2 Lusa. 26:18, 19) Mvandi, bafalisi ayi basadusi baba muena ti baba nsua wu kutambula nlemvu wu Yave kibila baba mu nkuna wu Abalahami.—Mat. 3:9.
Tunzinganga na batu banluta tombanga to mamboti mawu veka. Mayindu amomo malenda ku tuvukumuna. (Nga. 5:26) Ayi tulenda tona kuyimuena ti tuidi bafuana muingi kutambula biyeku, voti bankaka bafueti ku tuzitisa. Mbi bilenda tusadisa kununga mayindu amomo? Muingi tubaka mvutu, tufueti visa theti mayindu ma Yave mu mambu amomo. Minsua miodi mi Kibibila milenda tusadisa mu mawu.
Yave to widi nsua wu kutuba mbi tufueni mu tambula. Mona mua bifuani.
Va dikuela vantombulu nkazi kukinzika nnuni, ayi nnuni kuzola nkazi. (Efe. 5:33) Bakuela bafueti ba keba keba kumonisa mabanza ma luzolo kuidi bankaka. (1 Ko. 7:3) Bana bafueti tumukina matata mawu, ayi matata bafueti monisa luzolo kuidi bana bawu ayi kuba sadisa.—2 Ko. 12:14; Efe. 6:2.
Vantombulu zikhomba kukinzika bakulutu ba kimvuka. (1 Te. 5:12) Vayi bawu basi ko nsua wu kuyadila zikhomba mu kimvuka.—1 Pet. 5:2, 3.
Nzambi wuvana luaku kuidi zimfumu zi luyalu lu kukongulanga ziphaku, ayi batu bafueti kuba kinzika.—Lom. 13:1, 6, 7.
Mu luzolo, Yave wu tuvananga biabioso tuntomba. Mu kuba batu ba masumu, lufua luawu mfutu tuidi bafuana muingi kutambula. (Lom. 6:23) Vayi mu kibila ki luzolo luandi lukuikama, Yave wu kutuvananga biuma biwombo bimboti. (Minku. 103:10, 11) Kadika kiyeku tuntambulanga kidi mbonosono yi mamboti malutidi ma Nzambi tukhambulu nsua wu kutambula.—Lom. 12:6-8; Efe. 2:8.
MBI BILENDA TUSADISA KUBIKA TOMBA MAMBOTE MITU VEKA
Bika kuyindula mu phila basi nza banyindudilanga. Malembe malembe tulenda tona kuyindula ti, befu to tuidi bafuana muingi kutambula biyeku, kubika kuandi bankaka. Yesu wutubila phila mayindu amomo mankuizilanga, mu kusadila kifuani ki bisadi baba tambulanga denario yimueka. Bankaka batona kusala vameni ayi basala kilumbu kioso va muinya, vayi bankaka kilokula kimueka to. Dingumba ditheti di batu batuba ti baba nsua wu kutambula zimbongo ziwombo mu kibila ki kisalu bavanga. (Mat. 20:1-16) Mu kusadila kifuani akiokio, Yesu wumonisa ti minlandikini miandi bafueti kuangalala mu biuma Yave ka kubavana.
Babakala basala kilumbu kimvimba, baba tomba mfutu wulutidi kena bankaka
Vutulanga matondo, bika kutomba malutidi. (1 Te. 5:18) Landakana kifuani ki mvuala Polo bo kadinda lusadusu kuidi zikhomba ku Kolintu kheti baba nsua wu kunsadisa. (1 Ko. 9:11-14) Tufueti vutulanga matondo mu biuma tuidi ayi kubika tomba bilutidi.
Mvuala Polo kasa kuika bankaka bansadisa mu zitsatu ziandi
Monisanga khadulu yi kukikulula. Bo mutu kantomba mamboti mandi veka to nandi wuku yimuenanga ti wulutidi kena bankaka. Diawu kukikulula kulenda sadisa.
Mbikudi Danieli wuba lunungu va meso ma Yave kibila wuyikulula
Mbikudi Danieli wumonisa kifuani kimboti ki kukikulula. Kikhulu kiandi, kitoko kiandi, nduenga ayi bisalu binkaka kazaba kuvanga, khanu mamvanga kuyimuena ti widi nsua wu kutambula biyeku bioso kaba. (Dani. 1:3, 4, 19, 20) Vayi Danieli wutatamana kukikulula ayi mu kibila akiokio nandi wuba luvalu luwombo va mesu ma Yave.—Dani. 2:30; 10:11, 12.
Diawu tubikanu kutomba mambote mitu veka dedi basi nza. Vayi tufueti kuangalalanga mu biuma bioso Yave ka tuvananga mu kibila ki mamboti mandi malutidi tukhambu fuana mu tambula.