Buidi Wulenda Bela Nkundi Wumboti?
MANA viokila mu mambu maphasi mu khambu tambula lusalusu lu bankaka? Tuidi mu kuzingila “mu thangu ziphasi” zilenda ku tutuadisa kiunda. (2 Ti. 3:1) Diawu, vasintombulu ko kununga ziphasi zi luzingu befu veka. Kibibila kintubila nkinza wu kuba bakundi bamboti mu ‘thangu ziphasi.’—Zinga. 17:17.
BAKUNDI BAMBOTI BALENDA KUSADISA
Kheti bo kaba mu buloku, mvuala Polo wutatamana kuvanga kisalu ki kusamuna mu lusalusu lu bakundi bandi bakuikama
Mvuala Polo wutambula lusalusu luwombo kuidi bakundi bandi mu ziviage kabe vanganga. (Kolo. 4:7-11) Bo Polo kaba mu buloku ku Loma, bakundi bandi bansadisa mu bisalu kabasa nunganga ko kuvanga naveka. Dedi, Epafoloditu wunata biuma zikhomba ku Filipi bafila kuidi mvuala Polo. (Fil. 4:18) Tikiku wunata minkada mi mvuala Polo kuidi zikhomba mu bimvuka. (Kolo. 4:7) Mu lusalusu lu bakundi bandi, mvuala Polo wuvanga kisalu kiandi ki kusamuna kheti wuba mu buloku. Buidi ngie wulenda bela nkundi wumboti?
Vadi bifuani biwombo bubu bimmonisa nkinza wu kuba nkundi wumboti. Dedi, tala kifuani ki khomba mueka yinkietu wuba nkundi wumboti wu yaya Elisabet, ntuami ntuala waba kalanga ku Espanha. Bo mam’andi bambakula kimbevu ki cancer, khomba beni wufila kuidi Elisabet zi mensage ziwombo zi matangu ma Kibibila ma khindusulu. Elisabet wutuba: “zi mensage aziozio zikhindisa beni ayi yabasa kuyimuenanga ko minu veka.”—Zinga. 18:24.
Tulenda kindisa kikundi kitu na zikhomba mu kuba sadisa mu bisalu bi kimvuka. Dedi, tulenda kuyivana muingi kusadisa zikhomba zi manuna, kukuenda mu zikhutukunu voti mu kisalu ki kusamuna. Tulenda baka khindusulu mu kuvanga mawu. (Lom. 1:12) Mvandi vadi zikhomba zinkaka bakhambu nunganga kubasika ku nzo. Buidi tulenda bela bakundi bamboti kuidi bawu?
BA NKUNDI WUMBOTI KUIDI BO BAKHAMBU NUNGA KUBASIKA KU NZO
Zikhomba zinkaka banunganga ko kulandakana zikhutukunu ku nzo Kintinu, mu kibila ki kimbevu kingolo voti mambu mankaka maphasi. Tala kifuani ki yaya David, babakula kimbevu ki cancer. Nandi wutambula mbukulu mu kuvioka sambanu di zingonda. Ayi mu thangu ayoyo nandi ayi nkazi’andi Lidia, baba landakananga zikhutukunu ku nzo mu zoom.
Buidi zikhomba zi kimvuka bankindisila? Kutsuka kadika lukutukunu, zikhomba baba kolukanga yawu mu videoconferência. Bo yaya David ayi Lidia baba vananga mimvutu mu zikhutukunu, zikhomba baba kuba filanga zimensage zi khindusulu. Mu kibila akiokio, yaya David ayi yaya Lidia babasa kuyimuena ko baveka.
Sadisa batu bakhambu nunga kubasika ku nzo bavanga kisalu ki kusamuna
Tulenda vanga thuadusulu muingi kusamuna na zikhomba bakhambu nunga kubasika ku nzo. Befu kubalula mua mambu muingi kuba sadisa, tunkuiza bamonisa ti, tuba vuanga nkinza kheti mu mambu maphasi bamviokila. (Zinga. 3:27) Buidi wummuena kuba sadisa kusonika minkanda voti kuvana kimbangi mu telefone? Zikhomba bakhambu nunga kubasika ku nzo, balenda landakana lukutukunu lu kubasika mu kisalu ki kusamuna mu videoconferência. Yaya David ayi yaya Lidia bazola beni mawu. Yaya David wutuba, “kuba na zikhomba mu dingumba ditu di kisalu ki kusamuna, dikindisa beni kiminu kitu.” Boti kuba, khumbu zinkaka tulenda nata nlonguk’itu wu Kibibila kuidi khomba khambu nunga kubasika ku nzo, muingi kalandakana ndongukulu yi Kibibila.
Befu kusala vakimueka na zikhomba bakhambu nunga kubasika ku nzo, tulenda nunga kumona zikhadulu ziawu zimboti ayi kuluta kuba fikama. Dedi bo wummona phila bawu bansadilanga diambu di Nzambi muingi kunyikuna mintima mi batu, ngie wunkuiza luta zola kuba yawu. Bo tunsala vakimueka na zikhomba zitu zi kipheve, tumbakanga luaku lu kubaka bakundi bamboti.—2 Ko. 6:13.
Mvuala Polo wubaka khindusulu kuidi nkundi’andi Titu. (2 Ko. 7:5-7) Kinongo akiokio kitulonga ti, tulenda bomba bankaka kubika kuandi to mu mambu tunkoluka vayi mvandi mu kuba yawu ayi kuvanga mamoso tunnunga muingi kuba sadisa.—1 Yoa. 3:18.
BA NKUNDI WUMBOTI MU THANGU ZIKHUAMUSU
Zikhomba zitu ku Russia badi kifuani kimboti matedi kuyisadisa bawu na bawu. Tala mambu mamonikina yaya Sergey ayi nkazi’andi Tatyana. Bo bapolice bafuandubula nzo’awu, baba nata ku esquadra muingi kuba vana biuvu. Tatyana nandi mutu wutheti babasisa. Yaya Sergey wutuba: “Bo Tatyana kavutuka ku nzo, khomba mueka wunkietu mu thinu wuyenda kuentala. Ayi, zikhomba ba tusadisa kuludika biuma bioso ku nzo’itu.”
Sergey wubue tuba: “Yinzolanga beni mambu mantuba Zingana 17:17: ‘Nkundi wukiedika wummonisanga luzolo thangu zioso, ayi widi khomba wubutuka mu thangu ziphasi.’ Yiluta mona mambu amomo kusalama mu minu, mu thangu ayoyi yi ziphasi. Yave wutsadisa mu nzila bakundi bama.”a
Tuntombanga lusalusu lu bakundi, bulutidi bo tumviokila mu mambu maphasi. Tuala luta tomba lusalusu luawu mu thangu ziphasi zingolo. Diawu, tuvanganu mangolo muingi tuba bakundi bamboti bubu.—1 Pet. 4:7, 8.
a Tala dilongi didi mu jw.org “Jeová Providenciou Amigos Que Não Têm Medo de Ficar do Meu Lado.”