Bila mbi Nzambi kadi ayi khubukulu?

1. Bila mbi Nzambi kakubikila basi Isaeli mu thama?

Nzambi wukubika batu ba dikanda di Abalayama ayi wubavana minsiku. Wutedila dikanda beni “Isaeli,” ayi wubavana yeku ki tanina lusambulu lu kiedika ayi mbembo Nzambi. (Nkunga 147:19, 20) Mu diawu, batu ba makanda moso balenda baka mambote mu nzila Isaeli.​—Tanga Thonono 22:18.

Nzambi wusola basi Isaeli mosi baba zimbangi ziandi. Disolo di dikanda beni dimonisa bue balenda bakila mamboti ti balandikini minsiku mi Nzambi. (5 Mose 4:6) Diawu, mu nzila Isaeli, batu bankaka balenda zaba Nzambi yikiedika.​—Tanga Yesaya 43:10, 12.

2. Bila mbi baklisto bakiedika badi bakubama?

Ku manima, Yehova wuyekula basi Isaeli, ayi wuvanga kimvuka ki baklisto. (Matayi 21:43; 23:37, 38) Lumbu kiaki, va buangu ki basi Isaeli, baklisto bakiedika bansadila Yehova dede zimbangi ziandi.​—Tanga Mavanga 15:14, 17.

Yesu wukubika minlongoki miandi muingi basamuna ayi bakitula batu mu makanda moso minlongoki. (Matayi 10:7, 11; 24:14; 28:19, 20) Mu bilumbu biabi bitsuka bi mambu ma thangu yayi, kisalu beni kilembo salama muphila yo kayi salimini ko. Tona mutu kavangama va ntoto, bosi khumbu yi theti Yehova kakubikisidi zimilio zi batu babedi mu makanda moso mu lusambulu lu kiedika. (Tsongolo 7:9, 10) Baklisto bakiedika bakubimini mu kindasana ayi mu salasana. Mu nza yimvimba, babeki manaka mamosi ma malongi ma Bibila mu zikhutukunu ziawu.​—Tanga Ebeleo 10:24, 25.

3. Bue khubululu yi Zimbangi zi Yehova yi tonina mu bilumbu bietu?

Mu mimvu 1870, mua ndambu batu batona longuka Bibila bayiza zaba diaka malongi ma kiedika ma Bibila mo mazimbala thama. Bayiza bakusa ti Yesu wukubika kimvuka ki baklisto muingi kisamuna nsamu wumbote; diawu batona kisalu kinene ki samuna nsamu wumbote wu Kimfumu mu makanda moso. Mu mvu 1931, bakibieka zina di Zimbangi zi Yehova.​—Tanga Mavanga 1:8; 2:1, 4; 5:42.

4. Bue Zimbangi zi Yehova bakubukulu e?

Mu thangu baklisto batheti, bimvuka bi buklisto bi mabuala mawombo bituadusu kudi kimvuka kintuadisi kio kikikinina ti Yesu widi Mfumu yi kimvuka. (Mavanga 16:4, 5) Phila mosi phe bilumbu biabi, Zimbangi zi Yehova batuadusulu kudi Kimvuka Kintuadisi kio kidi kimvuka ki bankulutu bayela mu kipheve. Kimvuka beni kilembu tuadisa zibiro zi filiale zi Zimbangi zi Yehova zio zilembu sadi kisalu ki bangula minkanda mio mieta tubila Bibila mu zindinga viokila 700, zibiro zio zieta bimisa minkanda beni, ayi zibiro zio zieta kabula miawu. Mu phila yoyi, Kimvuka Kintuadisi kieta sadila Masonoko muingi mu kindisa ayi tuadisa bimvuka viokila 110000 mu nza yimvimba. Mu kadika kimvuka, babakala bobo beta dukisa mambu momo meta lombo beta baka kiyeko ki bankulutu, voti minkengidi. Babakala beni beta tanina kimvuka ki Nzambi mu luzolo loso.​—Tanga 1 Petelo 5:2, 3.

Zimbangi zi Yehova bakubimini mu samuna nsamu wumbote ayi kitula batu minlongoki. Tueta samuna nzo ka nzo, dede zintumwa zi Yesu. (Mavanga 20:20) Weta lomba bo banzolanga malongi ma kiedika balonguka Bibila. Vayi, Zimbangi zi Yehova tuisi ko khubukulu kaka. Tuidi phe dikanda dimosi di Dise mosi di luzolo. Tuidi bakhomba ba babakala ayi ba banketo bo beta kukibanzila. (2 Tesalonika 1:3) Bobo batu ba Yehova badi bakubama muingi mu yangidika Nzambi ayi mu sadisa bato bankaka, bavengi dibuta dimosi di batu dilutidi kiese va ntoto.​—Tanga Nkunga 33:12; Mavanga 20:35.