Kikinina wutuadusu mu mbueno yi Nzambi mu diambu ditedi malavu

Mu kondo finda phaka, weta yangalala buwombo mu makaba mawombo ma Yehova, buba phe kiphuanza kio widi kisobula phila yo wulenda sadila makaba beni. Diambu dingitukulu, Bibila kitubidi ti vinyu didi dikaba di Nzambi, diawu kitubidi kutu: ‘Dipha divangulu mu diambu di monisa mutu khini, ayi vinyu yeta yangidika luzingu lu mutu.’ (Mpo. 10:19; Nku. 104:15) Mu kondo finda phaka, diawu tueta muena batu bankaka bayika muena ziphasi mu bila ki nua malavu mawombo. Mu buela, mu nza yimvimba, batu badi na mayindu ma mu phila mu phila, minsiku mi phila mu phila ayi bifu biviakana mu diambu ditedi nua malavu. Diawu, mbi bifueti sadisa Bakristu babaka zinzengolo zimboti mu diambu ditedi nua malavu?

Buba koso kuandi tueta zingila, voti buba kikhulu kio tuyonzukila, tubika mbueno yi Nzambi yidiatisa mabanza meto ayi zinzengolo zio tuela baka zitunatina mamboti.

Banga kuandi phila weta muena, batu bawombo mu nza beta nua malavu mawombo ayi mu thangu ka thangu. Batu bankaka beta nua malavu mu diambu bakitisa ntima ayi babika tatakana mu mayindu. Bankaka beta nua malavu mu diambu di banunga zithatukusu. Mu bibuangu biwombo, batu beta muena ti nua malavu mawombo yisi’andi mbimbi ko mu diambu di babakala.

Diawu, Bakristu badi na zindongi zinduenga zio zibedi kuidi Mvangi’awu wu luzolo. Mu kifuani, wutumonisini ziphasi zio zieta builukulu mutu nio weta nua malavu mawombo. Nanga tume teka tanga Zingana 23:29-35 yo yeta monisa ziphasi zio zieta builukulu mutu nio weta kolo malavu.a Daniel, nkulutu mosi wu Mukristu ku phutu, weta bambuka moyo phila yo luzingu luandi lubela tuamina kaba Mukristu wukiedika, tubidi ti: “Nua malavu mawombo kueta nata mutu mu baka zinzengolo zimbimbi ayi kumbikila zisuvenir zimbimbi.”

Bue mukristu kalenda sadila kiphuanza ki sobula mu diambu ditedi nua malavu ayi manga dengana ziphasi zio zieta builukulu batu bo beta kolo malavu? Sekele yidi ti tubika mbueno yi Nzambi yidiatisa mayindu ayi mavanga meto.

Tutula thalu mu mambu mo Bibila kitubidi mu diambu di malavu ayi bibila bio bieta pusa batu bankaka banua malavu.

ZITSIKUDUKUSU ZI BIBILA

Mbembo Nzambi yisi kandika ko nua malavu mu kondo viokisa viangu. Bibila kitubidi ti nua malavu yilenda ba diambu di zikhini. Bibila kitubidi ti: “Dia bidia biaku mu zikhini, ayi nua vinyu’aku mu ntima wu zikhini.” (Mpo. 9:7) Yesu wunua malavu mu maluaku mankaka, buawu bubela bisadi binkaka bikuikama bi Yehova.​—Mat. 26:27-29; Luka 7:34; 1 Tim. 5:23.

Diawu, Mbembo Nzambi yimonisini mu nianguka koso disuasanu didi mu nua malavu ayi kolo malavu. Yitubidi mboti mboti ti: “Lubika kolongo malavu.” (Efe. 5:18) Yitubidi ti “batu bankolongo malavu balendi baka ko buangu mu Kipfumu ki Nzambi.” (1 Ko. 6:10) Ninga, Yehova kandikidi nua malavu mawombo ayi kolo. Va buangu kilandakana mayindu ma bikhulu bieto, tufueti bika mbueno yi Nzambi yitudiatisa.

Bankaka beta banzila ti balenda kuawu nua malavu mawombo mu kambu kolo. Kosoko kidi vonza kinneni. Masonoko mamonisini bo buawu ti ba “mvika malavu” kueta tula ti bakala voti nketo kabebisa bikadulu biandi ayi kiphevi kiandi kifua. (Tito 2:3; Zin. 20:1) Kutu Yesu wukebisa batu ti “nua malavu mawombo” kulenda kakidila mutu kabika kota mu nza yimona yi Nzambi. (Luka 21:34-36) Mbi bilenda sadisa mukristu katina mintambu mio mikala mu nua malavu mawombo?

YINDULANGA BILA MBI WEKA NUINA AYI TEZO MBI WEKA NUA

Kidi vonza kinneni mu bika bikhulu bio tuyonzukila bitutuadisa mu nduiwulu’eto yi malavu. Bakristu beta vanga mu nduenga mambu mo meta yangidika Yehova mu mambu matadidi bidia ayi malavu. Bibila kitubambudi moyo ti: “Diawu banza ti dia lundia voti nua lunua voti dioso kuandi diambu lumvanga, luvanga diawu mu diambu di nkembo wu Nzambi.” (1 Ko. 10:31) Tala mua ndambu biuvu ayi zitsikudukusu zi Bibila tueka ntadila:

Ndieta nua malavu mu diambu di yangidika batu bankaka? 2 Mose 23:2 yitubidi ti: “Kadi landakana batu bawombo mu diambu di zikhanu zimbimbi.” Yehova wulubula bana ba Iseli ti babika landakana batu bobo kabanyangidikanga ko. Lukindusu beni phe lutadidi bakristu ba lumbu kiaki. Beto bikila bakundi beto batuadisa mayindu meto tulenda tatuka kuidi Yehova ayi zitsikudukusu ziandi.​—Loma 12:2.

Ndieta nua malavu mu diambu di monisa batu ti ngolo ndidi? Mu bikhulu binkaka, batu bawombo beta nua malavu mawombo ayi beta kikinina diambu beni. (1 Pi. 4:3) Tutala diambu mbi 1 Kolinto 16:13 yitukindisidi tuvanga: “Luzibula meso, luba bakinda mu minu, luba bukhafi, luba batu bakinda.” Malavu meta tula mutu kaba mutu wukinda? Nana, buisi ko buawu. Malavu meta tula mutu kabotula diluaku diyindudila ayi kabika baka zinzengolo zimboti. Diawu, nua malavu kutulanga ko mutu kaba ngolo, meta kuiza tula mutu kaba wuvonga thangu ka thangu. Yesaya 28:7 yitubidi ti mutu nio wunuanga malavu mawombo wela zimbala ayi wela ta sakuba.

Zingolo zio zieta tutuma tuvanga mambu mamboti kuidi Yehova zieta ba ayi zieta monisa ti niandi wukutuvananga ngolo ayi ‘wunkitulanga nzila zieto ziba zifuana.’ (Nku. 18:32) Mukristu wusonga lenda tatamana ku kikenga ayi tula kipfuzi kingolo mu diambu di kakitanina mu mintambu milenda kum’buisa mu kipheve. Yesu wumonisa zingolo ziphila yoyi mu thangu kaba va mbata ntoto, ayi babe kun’zitisanga bila wuba mutu wukuikama ayi wuba kibakala.

Mandi nua malavu mu diambu di nunga mambu mo malembo thatisa? Nsoniki wu nkunga wunduenga wusonika ti: “Mu thangu mayindu maba mawombo mu minu, mbombolo’aku [Yehova] yindatina khini.” (Nku. 94:19) Enati wulembo kukitatikisa, tomba lusadusu kuidi Yehova, bika mu nzila yi malavu. Phila yimboti yi kubutudila yidi mu luta lombanga lusambulu thangu ka thangu kuidi Yehova. Mu buela, batu bawombo bame mona ti tomba zindongi zio zifueni kuidi nkundi nio meyonzuka mu kipheve mu khati kimvuka mfunu wombo yikala. Mu kiedika, nua malavu mu diambu di nunga zithatukusu kulenda bebisa bikadulu bi mutu ayi vongisa nzengolo’andi yi vanga mambu mamboti. (Hos. 4:11) Daniel, nio tutubidingi vathonono, tubidi ti: “Ndinuanisa zithatukusu zi mayindu ayi kifu ki kukimona ti ndidi mutu mbimbi. Ndieba nuanga mu diambu di kulula zithatukusu, vayi mambu mayiza luta bue buelama ayi ndizimbisa bakundi bama ayi luzitu lo babe kuphananga.” Tsuka tsuka mbi bisadisa Daniel? Wubuela ti: “Ndisudika ti phuila yiba kuidi minu ti Yehova kaba va ndambusu’ama, vayi bika malavu. Ndiyiza ba wufuana mu nuanisa mambu mama ayi ndimanunga.” Diawu, Yehova wukala thangu ka thangu mu diambu di kutusadisa, buba ti diambu dio dilembo ku tutatikisa dieka mmonika ti disiedi ko vuvu.​—Flp. 4:6, 7; 1 Pi. 5:7.

Enati thangu zinkaka weta nua malavu, bila mbi ka wulendi tadila ko mboti mboti biuvu biabi, ‘Khomba mosi wu dikanda voti nkundi’ama wulembo kukitatikisa mu diambu di nduiwulu’ama yi malavu?’ Enati buawu buididi, kiawu kilenda ba dimbu kilembo monisa ti wulembo yonzula kifu kimosi kimbimbi voti diambu dimosi wukambu sudika. ‘Ndilembo nua malavu viokila banga phila yo ndieba nuinanga mu thama?’ Phila beni yoyi yilenda tula ti buba mutu kasi’andi mvika malavu ko kaba mu nzila beni yo yiba mvika malavu. ‘Phasi ndieta mona mu bika nua malavu mu mua ndambu bilumbu voti mu bilumbu biwombo?’ Enati buawu buididi, nua malavu yilenda ba kifu kio kikotidi mu mianzi miaku voti buvika kuidi ngeyo. Yilenda sundula ti lusadusu lu minganga lulenda ba mfunu mu diambu di nunga thatukusu beni.

Mu tadila bivonza ayi zithatukusu zio zieta ba mu nua malavu, bakristu bankaka babaka kuawu nzengolo yi kambu bue manua. Bankaka balenda kuawu baka nzengolo yi kambu nua bila malavu beni bakadi kuawu kumayangalala. Enati mutu mosi mu bakundi baku beki nzengolo yoyi, wulenda kummonisina zanti, mu kikinina nzengol’andi, mu kambu kumvueza.

Thangu zinkaka wulenda mona ti didi diambu dinduenga mu kukitudila zindilu. Mukristu mosi lenda kukitudila ndilu mu tezo ki malavu kio kafueti nua. Voti kalenda kukitudila zindilu mu phil’andi yo kakuiza nuina malavu, nanga khumbu mosi mu sabala voti fioti fioti mu thangu keka n’dia. Bankaka bakitudila zindilu mu diambu di ntindu wu malavu mo maka nua, nanga vinyu voti biere mu phila yimboti vayi kadi nua zitsueke (whisky) voti malavu mangolo mo beta sangisa. Mutu enati niandi veka mekitudila zindilu mu nduiwulu’andi yi malavu, yela sie bandi phasi ko kasadila nzengol’andi. Mukristu nio meyonzuka mu kipheve kalendi ko kukitatikisa mu phila yoyi batu bankaka bakuiza banzila nzengolo yo kabeki.

Mu thangu tubeki nzengolo mu diambu ditedi nua malavu, tufueti tadila phe phila yo batu bakuiza kimuena. Loma 14:21 yitubidi ti: ‘Mboti kuandi mu kambu dia nsuni, mu kambu nua vinyu voti mu kambu vanga mambu moso momo malenda buisa khombꞌaku.’ Bue wulenda sadila ndongi beni yoyi? Monisa luzolo lu kikhomba. Enati mueni ti nua malavu kulenda tesa mutu nkaka sakuba, luzolo lueta kutuma wubika kuandi nua? Mawu monisa ti wulembo monisa luzitu mu ziphuila zi batu bankaka mu tomba mamboti mawu, bika mo maku veka.​—1 Ko. 10:24.

Diambu dinkaka, Leta kalenda tula minsiku mio milenda tuadisa nzengolo yi mukristu. Minsiku beni milenda tubila mimvu mio mintombana muingi mutu kanua malavu voti milenda kandika mutu kabika nata ditoma voti kasadila masinu mankaka enati nkuiti kadi.​—Loma 13:1-5.

Yehova wutuvana kiphuanza ki yangalala mu makaba mo katuvana. Dikaba beni didi kiphuanza ki sobula mbi matu dia ayi mbi matu nua. Zitsobodolo zieto zimonisa ti tulembo yangalala mu kiphuanza beni mu ku busadila mu yangidika Dise dieto di mazulu.