Wubedi buzabilanga?

Bue tuzabidi ti miziki mfunu miba mu luzingu lu bana ba Iseli?

BANA ba Iseli beba zolanga buwombo miziki. Bibila kiyolukidi khumbu ziwombo bisadulu bi miziki ayi minkunga miomi babe yimbilanga. Minkanda miwombo mi Bibila mieta tubila minkunga. Mu kifuani nkanda wu Minkunga, nkanda wu Nkung’a Solomo, ayi nkanda wu Miamaniongo. Nkanda mosi widi mu dizina Music in Biblical Life, wutubidi ti bana ba Iseli beba sadilanga miziki mu mambu mawombo mu luzingu luawu.

Miziki mu luzingu lu kadika lumbu. Bana ba Iseli beba bulanga miziki mu diambu di monisa phila yoyi beba kukimuenanga. (Yes. 30:29) Baketo beba bulanga zindungu, yimbila mu zikhini ayi kina mu thangu beba biekanga pfumu, mu thangu yi minyengo, ayi mu thangu masodi beba nunganga mimvita. (Min. 11:34; 1 Sa. 18:6, 7; 1 Mtn. 1:39, 40) Bana ba Iseli beba yimbilanga phe minkunga mu diambu di monisa kiadi mu thangu mutu kafuidi. (2 Lus. 35:25) Mu kondo finda phaka, “bana ba Iseli beba yangalalanga buwombo miziki,” butubidi McClintock ayi Strong’s Cyclopedia.

Miziki mu nzo yi ntinu. Mintinu mi Iseli mieba zolanga buwombo miziki. Ntinu Sauli wutedisa Davidi ku nzo’andi muingi kam’budilanga miziki. (1 Sa. 16:18, 23) Kumanima, mu thangu Davidi kayiza ba ntinu, wuvanga bisadulu bibudilanga miziki, wufonda minkunga mimboti, ayi wukubika dingumba diodi dieba bulanga miziki mu kinlongo. (2 Lus. 7:6; Am. 6:5) Ntinu Solomo wuba ayi minyimbidi mi babakala ayi mi baketo ku nzo’andi yi kitinu.​—Mpo. 2:8.

Miziki mu tsambudulu. Diambu dilutidi mfunu, bana ba Iseli babe sadilanga miziki muingi bakembisa Yehova. Diawu, 4 000 ki minyimbidi mieba bulanga miziki mu kinlongo ki Yelusalemi. (1 Lus. 23:5) Beba bulanga sembali, bima bi minsinga biobi beta budila miziki, zingitale, ayi ziphungi. (2 Lus. 5:12) Vayi yisi ba ko kaka ti batu bobo bazaba bumboti mboti miziki bawu kaka beba kembisanga Yehova mu miziki. Bana ba Iseli bawombo beba yimbilanga mu thangu beba kuendanga mu minyengo mi kadika mvu ku Yelusalemi. (Nku. 120-134) Mu tadila minkanda mi Bayuda, bana ba Iseli beba yimbilanga Minkunga mi Hallela mu thangu yi bidia bi Pasika.

Kuidi bisadi bi Nzambi, miziki mfunu kaka mikala tii mu lumbu kiaki. (Zaki 5:13) Yimbila kuidi mu khati tsambudulu’eto. (Efe. 5:19) Miziki mieta tula ti tuba va kimosi ayi bakhomba zieto Bakristu. (Kol. 3:16) Ayi mieta tukindisa thangu tulembo dengana mambu maphasi. (Mav. 16:25) Miziki midi phila mosi yimboti yimonisina minu kieto ayi luzolo lueto kuidi Yehova.