Biuvu bi mintangi

Bue bubela zangama ku veranda yi kinlongo ki Solomo?

Veranda yiba nzila yikotila va buangu ki busantu ki kinlongo. Mu tadila Bibibila bi mbangudulu yi Libongoli ya Mokili ya sika bio bitotuka tuamina 2023, “veranda yintuala, kula kuandi kuba ku 20 ki zikude yoyi yidedikini ayi tola ku nzo, ayi zangama ku veranda kuba 120 ki zikude.” (2 Lus. 3:4) Zimbangudulu zinkaka zimonisini phe ti veranda beni “120 ki zikude” yiba mu zangama, koko kunsundula banga nzo yidi yizangama mu 53 ki zimetre!

Vayi mbangudulu yi Libongoli ya Mokili ya sika yi 2023 yitubidi mu diambu ditadidi veranda yi kinlongo ki Solomo ti: “Zangama kuandi kuba ku 20 ki zikude,” yoyi yitudidi nduka nduka 9 ki zimetre).a Tutadila mua ndambu bibila biobi tubaludila mambu beni.

Basi tubila ko zangama ku veranda mu 1 Mintinu 6:3. Mu verse yayi, nsoniki Yelemia yolukidi kaka kula ayi bunneni bu veranda beni, kasi yolukila ko zangama kuandi. Mu kapu kio kilandikini, yolukidi bumboti mboti bima binkaka biobi binyitukisa biobi biba mu kinlongo beni, banga lundulu kinneni ki nlangu ki sengo, kumi ki zishario zi binsongo (cuivre), ayi makunzi muadi ma binsongo. (1 Mtn. 7:15-37) Enati veranda beni yiba viokila 50 ki zimetre mu zangama ayi yiviokila bibuangu binkaka bi kinlongo, bila mbi Yelemia kasi yolukila ko zangama kuandi? Buba kumanima ma zikhama zi mimvu, minsoniki mi Bayuda mituba ti veranda beni yisi luta ba ko yizangama viokila bibuangu binkaka bi kinlongo ki Solomo.

Basipesialiste beta kukiyuvula enati bibaka bi kinlongo bilenda nunga simbidila zitu ki veranda yi 120 ki zikude mu zangama. Mu thangu thama, zinzo zi matadi ayi zibiliki zio ziba zikunzama ngolo, banga mielo mi kinlongo ku Ngipiti, miba minnenni kuwanda ayi kuyilu miba misuenga. Vayi kinlongo ki Solomo disuasanu kiba. Basi sipesialiste batuba ti bibaka beni bi kinlongo bisi vioka ko 6 ki zikude, voti 2,7 ki zimetre mu phiba. Mutu mosi weba longukanga isituare yi Architecture mu dizina di Theodor Busink wuyiza sudika ti: “Mu tadila phiba yi bibaka bikhotolo ku kinlongo, veranda yilendi ko ba 120 ki zikude mu [zangama].”

Nanga basi kopa ko bumboti 2 Lusansu 3:4. Buba ti zimaniskri zinkaka zithama basonika “120” mu verse yayi, vayi mu zimaniskri zinkaka ziozi batu beta tudila ntima, mu kifuani Codex Alexandrinus yi tandu ki 5 ayi Codex Ambrosianus yi tandu ki 6, ziawu zitubidi ti yiba yi “20 ki zikude.” Bila mbi nsoniki mosi katudila nzimbala mu sonika “120”? Bikuma “khama” ayi “kude” bieta dedakana buwombo mu Kiebelewo. Bulendakana nsoniki beni wusonika kuma “khama” va buangu ki “kude.”

Ka diambu ko tulembo tudi ngolo mu sudika mambu beni mafioti fioti mo matadidi kinlongo ki Solomo ayi tomba zaba phila yoyi kiawu kibela mu bukiedika, tueta luta tula thalu’eto mu tsundu yoyi kinlongo beni kieba monisanga​—kinlongo kinneni ki kipheve. Tuidi na phutudulu matondo kuidi Yehova nioni wutedisa bisadi biandi bioso mu kunsambidila mu kinlongo beni!​—Ebe. 9:11-14; Tso. 3:12; 7:9-17.