Loza pheve yi buimi yi nza yayi
Batu bawombo lumbu kiaki mu nza yayi beta banzila ti bafueti kubatadila mu phila mosi yimfunu viokila batu bankaka ayi beta kukimona ti bawu kaka bafueni baka maluaku mamfunu. Buba ti beta kubatadila mu phila yi sipesiali, beta banzila ti bafueni kuawu kaka luta bue baka maluaku mankaka mawombo. Mayindu maphila yoyi masimbimini mu bumutu bubuimi ayi bobo bukondolo phutudulu matondo bobo bulembo luti monika mu bilumbu bitsuka.—2 Tim. 3:2.
Bukiedika, buimi disi ko diambu dimona. Adamu ayi Eva basobula mu bawu veka diambu dimboti ayi dimbimbi ayi yawu yitula ti badengana bivonza binneni. Bitandu biwombo kumanima, Ntinu Uzia wu Yuda kamuena ti niandi wuba wufuana mu vana malasi ku kinlongo, vayi wukivuna mu phila mosi yimbimbi. (2 Lus. 26:18, 19) Bobuawu phe Bafalisi ayi Basaduki, bawu beba wilukilanga ti badi batu bobo bakikununu kuidi Nzambi mu phila yimosi yi sipesiali mu bila kioki babela mu dikanda di Abalami.—Mat. 3:9.
Beto phe tulembo zingila va kimosi na batu bobo badi mavanga ma kinsuni ayi ma buimi, bumutu buawu bulenda kutuvukumuna tuba banga bawu. (Nga. 5:26) Beto phe tulenda tona yindula ti tuidi batu bobo bafueni baka maluaku mamfunu voti tulenda tomba ti batutadila mu phila mosi yi sipesiali. Bue tulenda mangina phila beni yoyi yi yindudila? Muingi tutona, tufueti sudika mbueno yi Yehova mu diambu beni. Zitsikudukusu ziwadi zi Bibila zieka kutusadisa.
Yehova niandi zebi mambu momo tufueti baka. Tutadila ndambu bifuani.
Mu khubukulu yi dikuela, bakala weta tomba ti bammonisina luzitu kuidi nketo’andi ayi nketo weta tomba ti bammonisina luzolo kuidi nnuni’andi. (Efe. 5:33) Bakala voti nketo bafueti baka mamboti ma luzolo luphinda lu mutu nioni kuelini yandi. (1 Ko. 7:3) Bambuta beta tomba ti bana bawu babatumukina ayi bana phe bafueti baka luzolo luwombo ayi lusadusu lu bambuta ziawu.—2 Ko. 12:14; Efe. 6:2.
Mu kimvuka, bakulutu bobo beta sala buwombo, bafueni baka luzitu lueto. (1 Tes. 5:12) Vayi basi ko luve lukukimona ti bawu balutidi bakhomba ziawu ba babakala ayi ba baketo.—1 Pi. 5:2, 3.
Nzambi wuvana ziguvernema zi batu luve lutomba ziphaku ayi luve lutomba luzitu kuidi batu bobo banyadila.—Loma 13:1, 6, 7.
Yehova weta kutuzola buwombo viokila mambu momo tueta mona ti mawu tufueni baka. Bo tuidi batu ba masumu, tsukulu’eto fua kaka. (Loma 6:23) Kadiambu ko Yehova weta kutuvana lusakumunu luwombo mu luzolo luandi lukuikama mu diambu di beto. (Nku. 103:10, 11) Kadika lusakumunu ayi maluaku mamboti momo tueta baka kuidi niandi, tueta kumabakila mu bila ki buphombo bu nlemvo’andi.—Loma 12:6-8; Efe. 2:8.
BUE BUMANGINA YONZUDILA PHEVE YI KINSUNI AYI YI BUIMI
Manga bumutu bu nza yayi. Mu kondo kuzaba, tulenda tona yindula ti tufueni baka lukumu viokila batu bankaka. Yesu wumonisa phila yoyi mavanga beni malenda thumbu kotila mu batu mu thangu kasadila kifuani kisadi kioki bafuta denali mosi. Bisadi binkaka bitona sala nsuka nsuka tii mu masika ayi muini wungolo; bankaka mu wola kuandi yimosi basadila. Nkangu wutheti wu bisadi wubanzila ti wawu wufuana baka mfutu wuwombo mu bila ki kisalu kingolo kioki basala. (Mat. 20:1-16) Mu sadila kifuani beni kioki, Yesu wumonisa ti balonguki bandi, bafueti yangalala mu mamboti momo Nzambi kayangididi kubavana.
Bisadi biobi bisala lumbu kimvimba, bibanzila ti bawu bafueni futu mfutu wuwombo
Ba phutudulu matondo ayi kadi kue banga kifu ki kue tombanga tombanga. (1 Tes. 5:18) Sokudila thumu Polo, nioni kasi tomba ko lusadusu lu kinsuni kuidi bakhomba ba Kolinto, kadiambu ko kaba luve lukulutomba. (1 Ko. 9:11-14) Tufueti yangalala lusakumunu lolo tum’baka ayi tufueti manga pheve yi kue tombanga tombanga.
Thumu Polo kasi tomba ko mu kingolo lusadusu lu zimbongo kuidi Bakristu ba Kolinto
Yonzula kadulu ki kukikulula. Mu thangu mutu kakukitudila thalu mu phila yiviokakana tezo, khumbu ziwombo weta kuiza kukimona ti fueni luta bue baka mambu mankaka viokila momo madi yandi. Kukikulula maku tusadisa tukuka mayindu maphila yoyi madi banga yimbu.
Kukikulula ku m’bikudi Danieli kuntula ti kaba luvalu kuidi Yehova
M’bikudi Danieli wumonisa kifuani kimboti mu diambu ditedi kukikulula. Dikanda diodi kabutukila, kitoko kiandi, diela diandi ayi maluaku mandi nginu mantuma kayindula ti niandi fueni tadulu mu phila yi sipesiali ayi fueni baka maluaku ma sipesiali. (Dan. 1:3, 4, 19, 20) Vayi Danieli wutatamana monisa kadulu ki kukikulula ayi kadulu beni kintula katatamana ba luvalu kuidi Yehova.—Dan. 2:30; 10:11, 12.
Tuloza pheve yi kinsuni ayi yi buimi yoyi nza yi lumbu kiaki yime mana tembikisa. Va buangu ki kubutudila, tutatamana baka mayangi mu kadika lusakumunu lolo Yehova keta kutuvana mu nzila yi buphombo bu nlemvo’andi.