Kisalu mbi bisadi mu kisalu beta sala?

Bibila tubidi bimvuka biodi bi baphangi ba bakala bo badi biyeko mu khati kimvuka: “minkengidi ayi bisadi mu kisalu.” (Filipi 1:1) Khumbu zi wombo, kadika kimvuka kikala ayi bakulutu ayi bisadi mu kisalu biwombo mu diambu di sadisa kimvuka. Kisalu mbi bisadi mu kisalu beta sala mu diambu di mambote meto?

Beta sadisa kimvuka ki bakulutu. Bisadi mu kisalu bioso, yiba bantuenia voti bambuta, nguizani yi mbote bakala ayi Yehova. Diawu, bafueni tudulu ntima, ayi beta sala kisalu mu ntima woso. Beta sala bisalu bi phila mu phila mu matedi bongisa bima ayi mambu mankaka mu kimvuka. Yawu yeta tula ti bakulutu bakivana mu yeko kiawu ki longa ayi tanina baphangi zi kimvuka.

Beta sala bisalu bio bieta kutusadisa. Bisadi mu kisalu bankaka beta baka kiyeko ki yamba batu boso bankuiza ku zikhutukunu zi kimvuka. Bankaka beta tadila mambu ma mikro ayi miziki, kabula minkada, lunda zimbongo zi kimvuka, vana baphangi ziterituare zi samunina. Beta buela phe mioko mu bongisa Nzo yi Kimfumu muingi yiba kitoko. Bakulutu balenda kubatuma basadisa baphangi bobo beka biboba. Bisadi mu kisalu beta kikinina sala kioso kisalu babaveni. Diawu baphangi boso ba kimvuka beta kubakinzika mu kisalu kiawu kingolo ayi pheve awu yi mbote.—1 Timoteo 3:13.

Badi bifuani bi mbote bio tufueti landakana. Bisadi mu kisalu beta sobulu bila nguizani mbote badi ayi Nzambi. Beta kindisa minu kieto mu thangu beta tula masolo mu zikhutukunu. Kifuani kiawu mu kisalu ki samuna kieta kutukindisa tusamuna mu kimfuzi. Bobo beta sala kithuadi ayi bakulutu, yeta tula ti kimvuka kimvimba kiba mu kiese ayi mu lubundanu. (Efeso 4:16) Tsukatsuka, bawu phe beta dedikisa mambu momo metalombu muingi baba bakulutu.

• Bikadulu mbi bisadi mu kisalu bafueti ba?

• Mbi beta tula mu diambu di mambu madiata mbote mu kimvuka?