Yesu Klisto nani kadi e?

1. Bue luzingu lu Yesu lutonina e?

Mu disuasanu ayi batu bankaka boso, Yesu wuba mu luzingu ku diyilu dede vangu ki kipheve tuamina kiza butuka va ntoto. (Yowani 8:23) Wuba vangu ki thete ki Nzambi, ayi wusadisa Nzambi mu vanga bima bioso binkaka. Niandi kaka wuvangu kumbu mosi kudi Yehova, diawu bantedidi Muana “wumosi-kaka-wulubutuku” wu Nzambi. (Yowani 1:14, NW) Yesu wuba mpe Ntubidi Nzambi. Diawu bantedidi “Phova,” voti “Diambu.”​—Tanga Zingana 8:22, 23, 30; Kolosai 1:15, 16.

2. Bila mbi Yesu kayizila va ntoto?

Nzambi wutuma Mwana andi va ntoto mu phila yo kabotudila luzingu luandi ku diyilu ayi kakotisila luawu mu vumu ki Maliya, muana nketo mosi Muyuda nioni kakasi zaba ko babakala. Diawu, dise di Yesu kasi ba mutu ko. (Luka 1:30-35) Yesu wuyiza va ntoto (1) mu diambu di longa kiedika kitadidi Nzambi, (2) mu diambu di kutuvana mbonosono phila yivangila luzolo lu Nzambi yi ba tuidi mu phasi, ayi (3) mu diambu di vana luzingu luandi lulunga dede “khudulu.”​—Tanga Matayi 20:28.

3. Bila tuidi mfunu khudulu?

Khudulu kidi kima ki mfunu kioki kifutulu mu diambu di kula mutu nio zengolo nkanu lufua. (2 Mose 21:29, 30) Mu thangu Nzambi kavanga batu, luzolo luandi luisi ba ko ti batu banunanga ayi bafuanga. Bue tuzabidi buawu e? Nzambi wukamba kudi Adamu, bakala dithete, ti niandi vola disumu wela fua. (Thonono 2:16, 17; 5:5) Diawu, enati Adamu kasi vola ko disumu, nginu kasi fua ko. Mu Bibila kembi ti lufua “luyizila” mu nza mu bila ki Adamu. Diawu, Adamu wubikila bana bandi boso disumu ayi nkanu andi, lufua. Tuidi mfunu wu khudulu muingi lu tubotula, mu nkanu lufua wowo Adamu katubikila.​—Tanga Loma 5:12; 6:23.

Nani wulenda futa khudulu mu diambu katu kula mu lufua? Bo tueta fua, tueta futa mu diambu di nkanu wu masumu meto veka kaka. Kadi mutu mosi wukondo lunga lenda futa mu diambu di masumu ma batu bankaka.​—Tanga Nkunga 49:7-9.

4. Bila mbi Yesu kafuila e?

Yesu kasi ba ko phila mosi ayi beto. Wuba mutu wu lunga. Diawu, kalendi fua ko mu diambu di masumu mandi, bila kasi vola kadi disumu dimosi ko. Yesu mu bila ki masumu ma batu bankaka kafuila. Nzambi wumonisa nzola yi wombo yo kadi kudi batu mu phila yoyi katumina Muana andi kafua mu bila kietu. Yesu phe wumonisa nzola mu bila kietu mu phila kakinzikila si’andi ayi kavanina luzingu luandi mu diambu di masumu metu.​—Tanga Yoane 3:16; Loma 5:18, 19.

Tala video Bila mbi Yesu kafuila?

5. Yesu mbi kalembo sadi mu bilumbu biabi e?

Mu thangu Yesu kaba va ntoto, wubelusa bambevo, wufulukisa bafua, ayi wusadisa batu baba mu phasi. Mu phila yoyo, wumonisa momo kela vanga mu bilumbu binkuiza mu diambu di batu boso ba luzitu. (Matayi 15:30, 31; Yoane 5:28) Yesu wufua, vayi Nzambi wumfulukisa dede mutu wu kipheve. (1 Petelo 3:18) Wuvingila va koko ku lubakala ku Nzambi na tee thangu Yehova kamvana ngolo yi yadila dede Ntinu mu ntoto wu mvimba. (Ebeleo 10:12, 13) Buabu, Yesu widi Ntinu ayi wulembo yadila ku diyilu. Ayi va ntoto, balongoki bandi balembo samuna nsamu beni wumbote mu nza yimvimba.​—Tanga Danieli 7:13, 14; Matayi 24:14.

Fioti fisiedi, Yesu makasadila ngolo andi yi kimfumu mu diambu di manisa ziphasi zioso ayi bobo beta bimisa ziawu. Batu boso bobo banlekila Yesu ayi bakuntumukina bela vuanda mu luzingu ku paladiso va ntoto.​—Tanga Nkunga 37:9-11.