Bila mbi Nzambi kabikidi ziphasi ayi mambu mambimbi?

1. Bue butonina ziphasi e?

Mambu ma mbimbi matonina va ntoto thangu Satana katuba luvunu lu thete. Satana wuba nzelu yimbote, vayi “kasia zingila ko mu kiedika.” (Yoane 8:44) Wuzomina lusambulu lolo lufueti vanu kudi Nzambi kaka. Satana wuvuna Eva, nketo wu thete, ayi wunkikinisa mu kunzitisa niandi bika Nzambi. Adamu phe wulandakana Eva mu zitisa Satana bika Nzambi. Nzengolo yi Adamu yinata ziphasi ayi lufua.​—Tanga Thonono 3:1-6, 19.

Thangu Satana kavukumuna Eva mu manga zitisa Nzambi, wutonisa butomboki bu manga luyalu lu Nzambi, wubimisa ziphaka mu kiyekua kiandi ki ba Nio Wulutidi Mu Mamoso. Batu bawombo batidi kuawu Satana ayi bamengi kuawu Nzambi ka ba Mfumu awu. Diawu, Satana kayikila “mfumu yi nza.”​—Tanga Yoane 14:30; 1 Yoane 5:19.

2. Bivangu bi Nzambi biba bimbimbi?

Bima bioso Nzambi kavanga bidi bilunga. Batu ayi banzelu bo Nzambi kavanga baba ayi diluaku di zitisa Nzambi mu mambu moso. (5 Mose 32:4, 5) Nzambi wutuvanga ayi kimpuanza ki sola sala mambu mambote voti mambimbi. Kimpuanza beni kieta tuvana diluaku di monisa ti tueta zola Nzambi.​—Tanga Yakobi 1:13-15; 1 Yoane 5:3.

3. Bila mbi Nzambi kabikidi ziphasi na tee lumbu kiaki?

Yehova bikidi mua thangu kudi batu bo bantombokila luyalu luandi. Bila mbi e? Samu di monisa ti zingolo zioso batu balenda vanga mu kukiyadila bawuveka mu kondo lutuadusu lu Nzambi zilendi kubanatina mambote ko. (Mpovi 7:29; 8:9) Mimvu 6000 mio batu bamekukiyadila mimonisini mbotimboti ti batu basinunga ko. Luyalu lu batu luisi nunga ko manisa mvita, mambu ma mbimbi, kondo kulunungu, ayi bimbevo.​—Tanga Yelemia 10:23; Loma 9:17.

Mu disuasanu di luyalu lu batu, luyalu lu Nzambi lunvana mambote kudi batu bo bazodidi luyalu luawu. (Yesaya 48:17, 18) Fioti fisiedi, Yehova makasukisa ziguvernema zioso zi batu, vayi batu bobo kaka bakikinini luyalu lu Nzambi bela siala va ntoto.—Yesaya 11:9.​—Tanga Danieli 2:44.

Tala video Bila mbi Nzambi kabikidi ziphasi zi ba?

4. Diluaku mbi mvibudulu wu Nzambi wutuveni?

Satana wutuba ti kadi mutu lenda sadila Yehova mu nzola yi kiedika. Mawu kikinina monisa ti Satana wuvuna? Ninga, lenda monisa ti Satana wuvuna! mvibudulu wu Nzambi wutuveni diluaku di monisa ti tuzodi luyalu lu Nzambi voti lu batu. Mambi mo tutavanga mu luzingu luetu mau mamonisa luyalu tutidi.​—Tanga Yobi 1:8-12; Zingana 27:11.

5. Bue tulenda sodila Nzambi kaba Mfumu ‘eto?

Tulenda sola Nzambi kaba Mfumu’eto ti tulembu tombi ayi kukivana mu lusambulu lukiedika lo lunguizani ayi Bibila, Phova Nzambi. (Yoane 4:23) Tulenda monisa ti tumengi luyalu lu Satana ti tukadi kota mu mambu ma politiki ayi mu mimvita, boso Yesu.​—Tanga Yoane 17:14.

Satana weta sadila zingolo ziandi mu tuma batu mu bisalu bitsoni ayi bimbimbi. Thangu tumanga bisalu beni, bakundi ayi bakomba zietu balenda kutuvueza ayi kutumanga. (1 Petelo 4:3, 4) Mu diawu, tufueti sobula: Matukala va kimosi ayi batu bo banzolanga Nzambi? Matuzitisa minsiku miandi minduenga ayi minzola? Beto vutula ninga, matumonisa ti Satana wuvuna bo katuba ti kadi mutu lenda zitisa Nzambi niandi baka zinzomono.​—Tanga 1 Kolinto 6:9, 10; 15:33.

Nzola yo Nzambi kadi kudi beto yikutumonisa ti makamanisa mambu mambimbi ayi ziphasi. Batu bo bamonisa ti beta kikinina mambu mama bela baka luzingu lu mvu ka mvu va ntoto.​—Tanga Yoane 3:16.