DILONGI 10
Bue wulenda zabila tsambudulu yi kiedika?
1. Dibundu di kiedika didi kaka dimosi e?
“Lulubukila mimbikudi mi luvunu.”—MATAYI 7:15.
Yesu tsambudulu mosi kaka yi kiedika kalonga minlongoki miandi. Yidi dede nzila yo yinatanga batu mu moyo wu mvu ka mvu. Yesu wutuba ti: “Batu fioti kuandi beti kuyibakulanga.” (Matayi 7:14) Nzambi weta zola kaka tsambudulu yo yinlandakananga Phova andi yo yidi yi kiedika. Minsambidi mi kiedika babundini mu minu kimosi.—Tanga Yoane 4:23, 24; 14:6; Efeso 4:4, 5.
Tala video Nzambi weta kikinina mabundu moso?
2. Mbi Yesu katuba mu diambu di baklisto ba luvunu?
“Bambanzilanga ti bazebi Nzambi vayi bantunukanga Nzambi mu mavanga mawu.”—TITO 1:16.
Yesu wutuba ti mimbikuki mi luvunu miela bebisa kimvuka ki baklisto. Mu kubatala, bamonikanga dede minsambidi mi kiedika. Mabundu mawu meta tuba ti madi ma buklisto. Vayi lenda kuaku zaba batu ba phila yoyi mu mavanga mawu. Tsambudulu yi kiedika kaka yimonisanga baklisto ba kiedika bobo bazabini mu bikadulu biawu bi kiedika ayi mavanga mawu.—Tanga Matayi 7:13-23.
3. Bue lenda zabila minsambidi mi kiedika?
Tutadila mambu matanu mafuete tusadisa muingi tubazaba:
Minsambidi mi kiedika beta wilukila ti Bibila Phova Nzambi. Beta tula zingolo mu zitisa minsiku mi Bibila mu luzingu luawu. Diawu, minsambidi mi kiedika basuasini ayi mabundu momo malonganga zingindu zi batu. (Matayi 15:7-9) Minsabidi mi kiedika beta sadila mambu momo beta longa.—Tanga Yoane 17:17; 2 Timoteo 3:16, 17.
Minlongoki mi Yesu mi kiedika beta zitisa dizina di Nzambi, Yehova. Yesu wuzitisa dizina di Nzambi mu phila kamonisina batu dizina beni. Wusadisa batu bazaba Nzambi ayi basambila ti dizina di Nzambi diba dinlongo. (Matayi 6:9) Ku buala buaku, dibundu mbi dinlonganga dizina di Nzambi e?—Tanga Yoane 17:26; Loma 10:13, 14.
Baklisto ba kiedika beta samuna Kimfumu ki Nzambi. Nzambi wutinda Yesu kasamuna nsamu wumbote wu Kimfumu. Kimfumu ki Nzambi kiawu vuvu kimosi kaka mu diambu di batu. Yesu wutatamana tubila Kimfumu beni na tee lumbu ki lufua luandi. (Luka 4:43; 8:1; 23:42, 43) Wutuba phe ti minlongoki miandi bela samuna Kimfumu beni. Enati mutu mosi wizidi mukusamunina Kimfumu ki Nzambi, mutu beni lenda ba muisi dibundu mbi e?—Tanga Matayi 24:14.
Minlongoki mi Yesu basi ko basi nza yayi yi mbimbi. Lenda kuaku kubazaba mu phila beta mangina kota mu mambu ma politiki ayi mu mathata ma buala. (Yoane 17:16; 18:36) Buela, balandakananga ko bikadulu ayi mavanga mambimbi ma basi nza yayi.—Tanga Yakobi 4:4.
Baklisto ba kiedika beta zolasana buwombo. Phova Nzambi yeta kubalonga ti bafueti zitisa batu ba makanda moso. Kadiambu ko mabundu ma luvunu meta buela mioko mu mimvita mi makanda khumbu zi wombo, minsambidi mikiedika batulanga ko bobo. (Mika 4:1-3) Baklisto beta yangalala mu vana thangu ayi bima biawu mu sadisa ayi mu kindisa bankaka.—Tanga Yoane 13:34, 35; 1 Yoane 4:20.
4. Lenda zaba sobula dibundu dikiedika e?
Dimbundi mbi dio malongi mawu meta ba mu Phova Nzambi, dizitisanga dizina di Nzambi, ayi dinsamunanga ti Kimfumu ki Nzambi kiawu kaka vuvu kimosi mu diambu di batu? Dimbundu mbi dio minkuikisi miandi badi nzola ayi beta manganga mimvita? Bue wumbanza e?—Tanga 1 Yoane 3:10-12.