DILONGI 27
Bue lufua lu Yesu lulenda tuvukisila?
Mu bila kikambu kutumamana ku bambuta beto batheti, beto boso tuidi bavika ba disumu, ba ziphasi ayi lufua.a Vayi tuisi kambu ko vuvu. Yehova wukubika mu kutukula mu masumu ayi lufua mu nzila yi muan’andi Yesu. Bibila kilembo tulongi ti, mu nzila yi lufua lu Yesu muawu tubakila khudulu. Khudulu yidi thalu yo yifutulu mu diambu di kula mutu. Thalu yo Yesu kafuta yidedikini ayi luzingu luandi lu kimutu luduka. (Tanga Matayi 20:28) Thangu kabika luve lo kaba luzinga mvu ka mvu va ntoto, Yesu wutuvana diluaku dibaka kima kio Adamu ayi Eva bazimbisa. Wumonisa diaka phila mbi Yehova ayi niandi beta tuzodila. Dilongi diadi madi tubuela phutudulu matondo mu mambu mo Yesu katuvangila.
1. Mamboti mbi lufua lu Yesu lulembo tunatina tona thangu yayi?
Bo tuidi batu ba masumu, khumbu ziwombo tueta vanga mambu mo ka mayangidikanga ko Yehova. Vayi tulenda kueto tatamana ba bakundi ba Nzambi ti tuniongini bukiedika masumu meto, lomba nlemvu mu nzila yi Yesu Kristu ayi tula ngolo mosi tubika bue vutukila masumu beni. (1 Yowani 2:1) Bibila kitubidi ti: “Kristu wumona phasi mu khumbu yimosi mu diambu di masumu, niandi mutu wusonga, wufua mu diambu di batu bobo bakambulu basonga muingi ka tunata kuidi Nzambi.”—1 Piela 3:18.
2. Mu bilumbu binkuiza mamboti mbi lufua lu Yesu lukuiza tunatina?
Yehova wutuma Yesu Kristu va ntoto mu diambu di kavana luzingu luandi luduka ayi “woso mutu wukunwilukila kabika bungana vayi kabaka luzingu lukalumani.” (Yowani 3:16) Mu nzila nkailu wu Yesu, Yehova weka nduka bongisa mambu moso mo kambu kutumamana ku Adamu kume bimisa. Yawu yinsundula ti tuidi na minu mu nkailu beni, tulenda ba na diluaku dizinga mvu ka mvu ku paladiso va ntoto.—Yesaya 65:21-23.
TUVISA MBOTI MBOTI
Tutala diaka bila mbi Yesu kavanina luzingu luandi ayi bue ditutadidi mosi mosi mu beto.
3. Lufua lu Yesu lulembo tukudi mu disumu ayi mu lufua
Tala VIDEO ayi vana mvutu mu kiuvu kiaki kilandikini.
Mamboti mbi Adamu kazimbisa mu kambu kuandi kutumamana?
Tanga Loma 5:12 ayi vana mvutu mu kiuvu kiaki:
Mambu mbi mambimbi disumu di Adamu dime tunatina?
Tanga Yowani 3:16 ayi vana mvutu mu kiuvu kiaki:
Bila mbi Yehova katumina muan’andi va ntoto?
Adamu wuba mutu wuduka. Mu kambu kuandi kutumamana, beto boso tuyika mimvika mi disumu ayi lufua
Yesu wuba mutu wuduka. Mu nzila tumamana kuandi, tuidi na vuvu kikulu mu kambu kulunga ayi baka luzingu lu mvu ka mvu
4. Yesu wufua mu diambu di batu boso
Tala VIDEO ayi vana mvutu mu kiuvu kiaki kilandikini.
Bue lufua lu mutu mosi lulenda kudila batu boso?
Tanga 1 Timote 2:5, 6 ayi vana mvutu mu kiuvu kiaki:
Adamu wuba mutu wuduka. Mu bila ki disumu diodi kavanga beto boso tuyika bavika ba disumu ayi lufua. Bila mbi tulenda tubila ti Yesu wuvana “khudulu yo yifuana” ayi diluaku mbi yituveni?
5. Khudulu didi dikaba dituveni Yehova
Mona khudulu banga dikaba dio Yehova kaveni mosi wumfikama. Tanga Ngalatiya 2:20 ayi vana mvutu mu kiuvu kiaki:
Mbi bitula ti thumu Polo kamona ti khudulu yidi banga dikaba diodi Yehova kaveni?
Adamu bu kasumuka wuyiza zengulu nkanu wu lufua ayi bana bandi boso. Vayi Yehova wutuma Yesu Kristu katuvana nzila yibakila luzingu lu mvu ka mvu.
Thangu weka ntanga ziverse zia zilandikini, yindula phila yo Yehova kamuena thangu muan’andi keba mona ziphasi. Tanga Yowani 19:1-7, 16-18 ayi vana mvutu mu kiuvu kiaki:
Mbi yilenda kutula mu yindula mambu mo Yehova ayi yesu bavangila?
BALENDA KUYUVUSA: “A vayi bue ko lufua lu mutu mosi lueka mvukisila batu boso?”
Mbi wulenda vutula?
MU BUKHUFI
Mu nzila yi lufua lu Yesu, Yehova kalenda lemvukila masumu meto ayi tuidi na vuvu kizinga mvu ka mvu.
Phutukulu
Bila mbi Yesu kafuila?
Bila mbi Bibila kintubila ti luzingu lu Yesu luidi “khudulu yo yifueni?”
Mamboti mbi lufua lu Yesu lulenda kunatina?
TALA MAMBU MANKAKA
Bila mbi tufueti tubila ti luzingu luduka lu Yesu luidi khudulu?
“Ndenge nini mbeka ya Yesu ezali ‘lisiko mpo na bato mingi’?” (Lisolo oyo ezali na Internet)
Muingi tuvuka, tufueti sukila kaka mu ba luwiluku kuidi Yesu?
“Ndenge nini Yesu abikisi biso?” (Lisolo oyo ezali na Internet)
Yehova weta lemvukila masumu manneni?
“Biyano na mituna ya Biblia” (Linɔ́ngi ya Mosɛnzɛli ya 01/05/2013)
Tala phila nkayilu wu Kristu wusadisila bakala dimosi kabalula bumutu buandi.
“Nazali lisusu te moombo ya mobulu” (Lisolo oyo ezali na Internet)
a “Disumu” dinsundula bundula nsiku, ayi dinsundula diaka; kambu kuduka ko Adamu ayi Eva batutambikisa.