Baka zinzengolo ziozi zinyangidika Yehova

1. Mambu mbi maphasi beto boso tueta dengana?

TUETA baka zinzengolo kadika lumbu. Zinzengolo zinkaka zikala ko phasi mu kuzibaka, banga dia va nsuka voti dedikisa thangu yikue lekila. Mambu mankaka phasi makala mu kumabakila nzengolo. Malenda vanga diambu mu buvini bueto, mu zikhini zieto, kuidi batu bobo tueta zola voti mu tsambudulu’eto. Tueta tomba ti zinzengolo ziozi tum’baka zitunatina mamboti, buba kuidi beto veka ayi kuidi dikanda dieto. Dilutidi mu mambu moso, tueta tomba ti zinzengolo zieto ziyangidika Yehova.​—Loma 12:1, 2.

2. Mbi wulenda tula muingi wubaka zinzengolo zinduenga?

² Mawu luta baka zinzengolo zinduenga, 1) ngeyo tombanga zaba diambu bumboti, 2) ngeyo tombanga zaba diyindu di Yehova mu diambu beni, ayi 3) ngeyo yindulanga bumboti mboti mu diambu beni. Disolo diadi madi tubila mambu beni momo, ayi madi tusadisa phe tuzaba phila yoyi tulenda sadila maluaku meto masuasikisila mambu.​—Zin. 2:11.

TOMBANGA ZABA DIAMBU BUMBOTI

3. Sudikisa bila kioki wufueti keta tombila zabanga diambu bumboti tuamina wubaka nzengolo.

³ Diambu ditheti wufueti vanga muingi wubaka nzengolo yimboti didi: Wufueti keta zaba bumboti mboti diambu diodi weka m’bakila nzengolo. Bila mbi dididi diambu dimfunu? Yindula buna mutu nioni wulembo bedi kimbevo kingolo webati munganga muingi kankonga. Munganga maka baka nzengolo yikumvana bilongo mu kambu keta kunkonga voti mu kambu kunyuvula biuvu? Nana, kalendi ko kubutudila. Ngeyo phe mawu baka nzengolo yimboti ngeyo keta tomba zabanga bumboti mboti mambu momo madi nguizani ayi diambu diodi tidi bakila nzengolo. Bue wulenda kubutudila?

4. Mu nguizani ayi Zingana 18:13, bue wulenda bela sikididi ti zebi bumboti mboti diambu diodi tidi bakila nzengolo? (Tala phe foto.)

⁴ Khumbu ziwombo wulenda zaba diambu bumboti mboti mu yuvulanga biuvu. Yindula buna enati batedisidi mu feti mosi. Mawu ba mu feti beni? Enati wisi zaba ko mutu nioni wun’diatisa feti beni ayi zikhubukulu ziozi zidi mu feti beni, wulenda yuvula mutu nioni wutedisidi biuvu biabi: “Thangu mbi ayi kue feti beni yela bela? Batu bakua bela ba kuna? Banani bela tuadisa feti beni? Banani bela ba kuna? Mambu mbi mela salama mu feti beni? Bela vana batu malavu mangolo mu feti beni?” Mimvutu mu biuvu beni biobi, miela kusadisa wubaka nzengolo yimboti.​—Tanga Zingana 18:13.

5. Mbi wufueti tula ngeyo thumbu zaba mambu bumboti mboti?

⁵ Ngeyo mana zaba mambu bumboti mboti, yindula bumboti mambu moso momo matadidi nzengolo yoyi tidi baka. Mu kifuani, nzengolo mbi mawu baka ngeyo zaba ti ku feti beni kuela ba na batu bobo ka bazitisanga ko zitsikudukusu zi Bibila voti ngeyo zaba ti mu feti beni bela kabula malavu mangolo mu divunzi? Bue wummuena, feti beni yilenda sukila mu divunzi? (1 Pi. 4:3) Voti mbi wufueti tula enati feti beni mayi kakidila wubika kuenda mu lukutukunu lu kimvuka kieno voti enati mayi kakidila wubika kuenda mu kisalu ki tsamununu? Ngeyo mana tadila bumboti mboti biuvu beni biobi, mayi sadisa wubaka nzengolo yimboti. Vayi kuidi diaka ayi diambu dinkaka wufueti vanga. Mezaba buabu phila buididi diambu beni, wukiyuvula, bue Yehova kakudimuena?​—Zin. 2:6.

YINDULA PHILA YOYI YEHOVA KAMMUENA DIAMBU BENI

6. Mu tadila Zaki 1:5, bila mbi tufueti sambidila mu diambu di tubaka lusadusu lu Yehova?

⁶ Lomba Yehova kasadisa wuzaba diyindu diandi. Yehova wutuveni tsila yikutuvana nduenga yisuasikisila mambu muingi tuzaba ti keni nzengolo yoyi tum’baka mayi nyangidika. Weta vana nduenga beni mu “luzolo kuidi batu boso ayi mu kambu tsembolo.”​—Tanga Zaki 1:5.

7. Bue wulenda zabila diyindu di Yehova? Vana kifuani.

⁷ Ngeyo thumbu sambila Yehova mu diambu di katuadisa, luta tudi thalu mu mvutu’andi. Tubonga kifuani: Enati zimbidi ku buala bu kinzenza, wulenda lomba lusadusu kuidi wumosi mu batu bobo beta vuanda ku buala beni. Vayi mawu m’bika tuamina kavana mvutu? Wedi kubutudila ko. Mawu landakana bumboti mboti lutuadusu lolo kakuvana. Bobuawu phe, kumanima matomba nduenga kuidi Yehova, tomba zaba mvutu’andi mu nzila yi minsiku ayi mu zitsikudukusu zi Bibila ziozi zitadidi diambu diodi tidi bakila nzengolo. Mu kifuani, mu thangu beki nzengolo mu kuenda mu feti banga yoyi tutubidi mu ziparagrafi ziozi zime vioka, wulenda tadila mambu momo Bibila kitubidi mu diambu di zifeti zi divunzi, mu diambu ditedi bakundi bambimbi ayi mu mfunu wutula minluta mi Kipfumu ki Nzambi va buangu kitheti viokila ziphuila ziaku.​—Mat. 6:33; Lom. 13:13; 1 Ko. 15:33.

8. Mbi wulenda tula enati phuila yi lusadusu widi muingi wuzaba mambu momo wuntomba? (Tala phe foto.)

⁸ Kadiambu ko buawu, thangu zinkaka wulenda ba phuila yi lusadusu muingi wuzaba mambu momo wuntomba. Wulenda baka mayindu kuidi khomba mosi wubakala voti wunketo nioni wuyonzuka mu kipheve. Vayi wulenda phe baka mamboti mu tula zithombolo zi ngeyo veka. Mu bisadulu bieto bithombolo muidi na mambu mawombo mamfunu, banga mu Buku ya bolukiluki mpo na Batatoli ya Yehova ayi mu buku Batoli ya Biblia mpo na bomoi ya bakristo. Kadi zimbakana ti lukanu luaku luidi lubaka nzengolo yoyi yinyangidika Yehova.

9. Bue tulenda bela sikididi ti nzengolo yoyi tum’baka mayi yangidika Yehova? (Efeso 5:17)

⁹ Bue tulenda bela sikididi ti nzengolo yoyi tum’baka mayi yangidika Yehova? Diambu ditheti, tufueti keta kun’zaba bumboti, bila Bibila kitubidi ti, “Zaba Nioni Lutidi Busantu, diawu diela.” (Zin. 9:10) Ninga, phisulu yikiedika yeta ba mu nzayilu yi bikadulu bi Yehova, mu zaba lukanu luandi ayi mu mambu momo keta zola voti momo keta lenda. Wukiyuvula, ‘Mu zaba ti nzengolo yoyi ndim’baka vantuala Yehova ndikuyibakila, nzengolo mbi ndifueti baka yoyi yikunyangidika?’​—Tanga Efeso 5:17.

10. Bila mbi zitsikudukusu zi Bibila zilutidi mfunu viokila mambu ma dikanda dieto voti kikhulu ki buala bueto?

¹⁰ Muingi tuyangidika Yehova, thangu zinkaka tufueti niongisa bakhomba zieto voti bakundi beto. Mu kifuani, dise voti ngudi nioni kasi kuandi ko mayindu mambimbi kalenda kuika muan’andi wunketo mu kingolo kakuela bakala nioni widi zimbongo ziwombo voti nioni wulenda kubafuta fakitire yi dikuela yithalu buba ti kasi ko kipheve. Bukiedika, batidi ti muan’awu kaba mu luzingu lumboti lu kinsuni, vayi wela kunsadisa katatamana yonzuka mu kipheve? Bue Yehova keta muena diambu beni? Mvutu widi mu Matayi 6:33. Mu verse beni, bakindisidi Bakristu “batomba theti Kipfumu ki Nzambi.” Kadiambu ko tueta zitisa bambuta zieto ayi batu ba buala bueto, yangidika Yehova diawu diambu dilutidi mfunu kuidi beto.

YINDULANGA BUMBOTI MBOTI MU DIAMBU BENI

11. Kadulu mbi kioki kidi mu Filipi 1:9, 10 maki sadisa wuyindulanga bumboti mboti mu diambu?

¹¹ Ngeyo thumbu bakula zitsikudukusu zi Bibila ziozi zitumini wubaka nzengolo, wufueti yindula bumboti mboti diambu beni. (Tanga Filipi 1:9, 10.) Kadulu kisuasikisa mambu maki sadisa wukizabilanga diambu diodi nzengolo’aku yilenda bimisa. Thangu zinkaka mutu weta baka nzengolo mu nsualu nsualu. Vayi, yisi ko ti zinzengolo zioso zikala ko phasi mu kuzibaka. Suasikisa mambu maku sadisa wubaka zinzengolo zinduenga, buba mu mambu maphasi.

12-13. Bue suasikisa mambu kulenda kusadisila wubaka nzengolo yinduenga mu diambu ditedi kisalu ki kinsuni?

¹² Yindula buna diambu diadi. Bulendakana kisalu wulembo tombi mu diambu di wudukisa ziphuila zi dikanda diaku. Bamonisini bisalu biodi. Mawu yindula bumboti mboti mambu momo matedi kisalu beni, ntindu wu kisalu beni, thangu yi kukisadila, thangu yi manisina kisalu beni ayi mambu mankaka nkaka. Mu tala, bisalu beni bia bibiodi, bisi kuandi ko bisalu bimbimbi kuidi Mukristu. Bulendakana mawu sobula kimosi bila wukiyangididi mu phila yoyi kididi voti bila kieta futa zimbongo ziwombo. Vayi kuidi na mambu mankaka momo wufueti keta yindula bumboti mboti tuamina wubaka nzengolo.

¹³ Mu kifuani, mu bisalu beni bia bibiodi kuidi na kisalu kioki kidedikini ayi thangu yi lukutukunu lu kimvuka kieno? Mu bisalu beni bia bibiodi, kuidi na kisalu kioki maki tula ti wubika bue baka thangu yisadisila dikanda diaku diba mu lutanunu, diba mu mayangi voti diba dikinda mu kipheve? Kukiyuvula biuvu beni biobi maku sadisa wuluta tula “mambu momo malutdi mfunu” banga tsambudulu’aku ayi ziphuila zi dikanda diaku va ntuala viokila mamboti ma kinsuni. Yawu mayi tula ti wubaka nzengolo yoyi Yehova kakuiza sakumuna.

14. Mu phila mbi suasikisa mambu ayi monisa luzolo maku sadisila wubika tesa batu bankaka sakuba?

¹⁴ Suasikisa mambu kueta kututuma phe tuyindula phila yoyi nzengolo’eto yilenda vangila diambu kuidi batu bankaka muingi tubika “tesa batu bankaka sakuba.” (Flp. 1:10) Suasikisa mambu mfunu phe kuidi mu thangu tulembo baki zinzengolo mu mambu banga phuatulu ayi mbongusulu nitu. Mu kifuani, tulenda yangalala ntindu mosi wu phuatulu voti wu mbongusulu nitu. Vayi diambu mbi madi salama mu thangu bakhomba ba kimvuka voti bobo bakambulu mu kimvuka batedi sakuba mu bila ki phuatulu’aku ayi mu bila ki mbongosolo’aku nitu? Suasikisa mambu maku tusadisa tuzitisa phil’awu yoyi beta kukimuena. Luzolo malu tutuma tutomba mamboti ma ‘batu bankaka’ ayi tuzaba vovo vasukidi zindilu zieto. (1 Ko. 10:23, 24, 32; 1 Tim. 2:9, 10) Yawu mayi tula ti tubaka nzengolo yoyi yimmonisa luzolo lueto ayi luzitu mu diambu di batu bankaka.

15. Diambu mbi wufueti keta yindula tuamina wubaka nzengolo yimfunu?

¹⁵ Enati nzengolo yimfunu weka m’baka, yindula mambu momo mantombana muingi wudukisa nzengolo beni. Yesu wutulonga ti “tuyindulanga thalu.” (Luka 14:28) Diawu, yindulanga zinthangu, mbakulu, ayi zingolo ziozi zintombana muingi wudukisa nzengolo beni. Mu mambu mankaka, wulenda solula ayi batu ba dikanda diaku muingi wuzaba diambu diodi wumosi mosi kafueti vanga mu dukisa nzengolo beni. Bila mbi kukiyindudilanga mambu momo meta tombana muingi wudukisa nzengolo dididi diambu dimfunu? Yawu yilenda tula wuzaba ti keni mu nzengolo yoyi tidi baka muidi na mambu momo wufueti bongisa voti ti kuidi na phila yinkaka yimboti yidukisila nzengolo beni. Ayi mu thangu kotisidi batu ba dikanda diaku mu nzengolo beni ayi ngeyo wa mayindu mawu, yawu mayi tula ti babuela mioko mu kondo mona phasi muingi nzengolo beni yilungana.​—Zin. 15:22.

BAKA NZENGOLO YOYI YELA NUNGA

16. Mambu mbi wufueti vanga momo makuiza sadisa muingi wubaka nzengolo yoyi yela nunga? (Tala ankadre “Phila yi bakila zinzengolo zinduenga.”)

¹⁶ Ngeyo sadila mambu momo tume longuka mu disolo diadi, mawu ba wukubama mu baka nzengolo yinduenga. Mezaba mambu momo meta tombana ayi mezaba zitsikudukusu ziozi mazi sadisa wubaka nzengolo yoyi yinyangidika Yehova. Buabu wulenda lomba Yehova kasadisa wunungisa nzengolo’aku.

17. Diambu mbi dingudi dilenda kusadisa wubaka nzengolo yimboti?

¹⁷ Buba ti mebaka zinzengolo ziwombo ziozi zinunga mu thama, bambuka moyo ti diambu dimfunu diodi dilenda kusadisa muingi wubaka nzengolo yimboti didi ti kadi tudila madiela maku ayi nzayilu’aku ntima, vayi tudila nduenga yi Yehova ntima. Niandi kaka lenda kuvana nzayilu yikiedika, phisulu ayi diela disuasikisila mambu. Mamoso momo mawu mambu meta nata nduenga. (Zin. 2:1-5) Yehova kalenda kusadisa wubaka zinzengolo ziozi zikunyangidika.​—Nku. 23:2, 3.