DISOLO DI NDONGOKOLO 15
NKUNGA 30 Tata na ngai, Nzambe na ngai, mpe moninga na ngai
Kuidi beto “Didi diambu dimboti mu fikama Nzambi!”
“Kuidi minu, didi diambu dimboti mu fikama Nzambi.”—Nku. 73:28.
MU BUKHUFI
Tueka nlonguka phila yoyi tulenda fikiminina Yehova ayi tulenda bakila mamboti ma kubutudila.
1-2. a) Zingolo mbi wulenda tula muingi wuyonzula kikundi kingolo ayi mutu? b) Mbi tueka ntubila mu disolo diadi?
WIDI NA nkundi nioni weta luta zola buwombo? Bue wuyonzudila kikundi ayi niandi? Bulendakana wuviokisa thangu ayi niandi, zebi ziphasi ziandi ayi zebi mambu momo keta zola ayi momo ka kazolanga ko. Wubakula bikadulu biandi bilutidi bimboti biobi weta yangalala sokudila. Mambu beni momo mawu matula ti wun’zola buwombo.
2 Thangu yeta tombana ayi zingolo muingi wuyonzula kikundi kingolo ayi mutu. Tulenda tuba ti buawu phe bukadila mu diambu di mutu kayonzula kikundi kingolo ayi Yehova Nzambi. Mu disolo diadi tueka ntubila phila yoyi tulenda bela pfika pfika ayi Nzambi’eto ayi phila yoyi tulenda bakila mamboti mu kubutudila. Ditheti theti, tuteka tadila bibila biobi bikutumonisa ti didi diambu dimboti mu fikama nkundi nioni lutidi bakundi boso, Yehova.
3. Bila mbi tufueti yindudila mu buphinda mamboti momo tueta baka mu ba pfika pfika ayi Yehova? Sudikisa.
3 Mu kondo finda phaka, weta kikinina ti didi diambu dimboti mu ba pfika pfika ayi Yehova. Vayi yindudila mu buphinda bumutu buandi bumboti kulenda kututuma tuluta ba pfika pfika kuidi niandi. (Nku. 63:6-8) Mu kifuani, dia bumboti, tula ngala sisi, tula phundulu mu phila yimboti ayi nua nlangu wufuana, madi mambu mamboti mu diambu di beto. Vayi batu bawombo ka bakipang’awu ko mambu beni momo ayi bataninanga ko buvini buawu. Vayi bobuawu bobo tunluta yindudila phila yoyi bifu bimboti bieta tunatina mamboti, buawu tueta luta tatiminina ba na biawu. Bobuawu phe, bulendakana tuzebi ti ba pfika pfika kuidi Yehova didi diambu dimboti mu diambu di beto, vayi yindudila mamboti momo tulenda baka mu kubutudila kulenda tutuma tutatamana ba pfika pfika ayi Nkundi’eto.—Nku. 119:27-30.
4. Banga phila buididi mu Minkunga 73:28, nsoniki wu minkunga bue kakimuena?
4 Tanga Minkunga 73:28. Nsoniki wu Minkunga 73 mu dikanda di balevi kaba ayi wusobulu muingi kaba nyimbidi ku kinlongu ki Yehova. Bulendakana wuyangalala sambila Yehova mu bukuikama boso mu mimvu miwombo. Vayi, weba monanga thangu zioso phuila yi kukibambula moyo ayi bambula moyo batu bankaka ti didi diambu dimboti mu diambu di niandi ayi bawu mu “fikama Nzambi.” Mamboti mbi mankaka makala mu kubutudila?
“FIKAMA NZAMBI” KUETA NATA MAKHINI
5. a) Bila mbi ba pfika pfika kuidi Yehova kueta tunatina makhini? b) Banga phila buididi mu Zingana 2:6-16, vana bifuani biobi bilembo monisa bumboti mboti phila nduenga yi Yehova yilenda kunatina mamboti ayi yilenda kutanina.
5 Bobuawu bobo tunluta fikimina kuidi Yehova, buawu phe tuela luta bela mu zikhini. (Nku. 65:4) Buawu buididi, bila kuidi na bibila biwombo biobi bieta monisa diambu beni. Mu kifuani, mu thangu tulembo tangi mambu momo madi mu Bibila ayi tukumasadila, tueta kuiza ba nduenga. Nduenga beni yeta kutusadisa tubika vukumuka mu mambu mambimbi ayi tubika tula zinzimbala zinneni. (Tanga Zingana 2:6-16.) Diawu, Bibila kieta tubila ti: “Mayangi kuidi mutu nioni beki nduenga, ayi kuidi mutu nioni beki phisulu.”—Zin. 3:13.
6. Mbi bitula ti nsoniki wu minkunga kazimbisa zikhini ziandi?
6 Bukiedika, bakundi ba Yehova balenda ba phe mu zithangu zikiadi. Nsoniki wu Minkunga 73 wuzimbisa zikhini ziandi mu thangu kabikila nzila mayindu mambimbi mamvuata. Wuyiza ba nganzi ayi nzinunu bila mu mayindu mandi weba yindulanga ti batu bambimbi bobo beba kipang’awu ko Nzambi ayi zitsikudukusu ziandi, baba mu luzingu lukondolo ziphasi. Mu mayindu mandi manzimbala, keba banzilanga ti batu ba kikhesi ayi batu ba luniemo, bawu baba kaka mimvuama ayi bawu baba kaka mu buvini bumboti bu nitu ayi bawu baba phe mu lutanunu mu kondo dengana mambu maphasi. (Nku. 73:3-7, 12) Nsoniki beni wu minkunga wuyiza kitatikisa buwombo mu mayindu ayi mu thangu mosi plina, wukiyuvula ti zingolo ziozi katula mu diambu di sadila Yehova keni ziela kunnatina kuandi mamboti. Mu kiadi kioso wutuba ti: “Bukiedika, mu phamba kuandi ndikebidi ntim’ama wuvedila, mu phamba kuandi ndisukudi mioko miama mu monisa kambu kuama ku bila.”—Nku. 73:13.
7. Bue tulenda nungina zithangu zikiadi ziozi zilenda botula makhini meto? (Tala phe foto va baba.)
7 Nsoniki wu minkunga kasi bikila ko zithatukusu nzila zithumbu kumvongisa. Wuvanga diambu. Wutuba ti: “Ndikota mu khati buangu ki kinlongo ki Nzambi.” Kuawu Yehova kakolusila mayindu mandi. (Nku. 73:17-19) Yehova, nkundi’eto nioni lutidi bakundi beto boso weta zaba mu thangu tuidi mu kiadi. Enati tulembo nsambila muingi katutuadisa ayi enati tukikinini lusadusu lolo keta kutuvana mu nzila yi Mbembo’andi ayi mu nzila yi kimvuka, matu baka ndembama yi khati ntima mu diambu di tumonisa mvibudulu mu thangu tuidi mu kiadi. Buba ti tumueni ti zithatukusu ziviokikini mu beto, Yehova weta kutukindisa ayi weta kutubomba.—Nku. 94:19.a
Nlevi nioni wusonika Minkunga 73, telimini va ntuala “buangu kinlongo ki Nzambi” (Tala paragrafi 7)
MU THANGU “TUFIKIMINI NZAMBI” MATU BA MU LUZINGU LUMBOTI TONA LUMBU KIAKI AYI MATU BA NA VUVU MU DIAMBU DI BILUMBU BINKUIZA
8. Mu ziphila mbi diaka zinkaka zimfunu fikama kuidi Nzambi dididi diambu dimboti kuidi beto?
8 Fikama kuidi Nzambi didi diambu dimboti kuidi beto mu ziphila diaka zinkaka ziwadi zimfunu. Ditheti, tulenda ba mu luzingu lumboti enati tuidi na nguizani yingolo ayi Nzambi. Dimmuadi, kueta kutusadisa tuba na vuvu kikinda mu diambu di bilumbu binkuiza. (Yel. 29:11) Bika buabu tuluta tadila mamboti beni momo.
9. Mu phila mbi fikama kuidi Yehova kueta tudila ti luzingu lueto luba mfunu wombo?
9 Fikama Yehova kueta tula ti luzingu lueto luba mfunu. Batu bawombo lumbu kiaki ka bawilukilanga ko ti Nzambi widi beta banzila ti luzingu luisi ko mfunu ayi nkuna wu batu wela zimbala. Vayi beto mu nzila yi ndongokolo’eto yi Mbembo’andi tuyiza ba sikididi ti Nzambi “wumfutanga batu boso bankuntombanga mu bukiedika.” (Ebe. 11:6) Buba lumbu kiaki, tuidi mu luzingu lu zikhini bila tueta sala kisalu kioki Nzambi katuvangila—sadila Dise dieto di mazulu, Yehova.—5 Mo. 10:12, 13.
10. Diambu mbi batumonisini mu Minkunga 37:29 mu diambu ditedi phila yoyi luzingu lu batu bobo beta tudila Yehova vuvu luela bela?
10 Batu bawombo lumbu kiaki, vuvu kiawu kisukidi mu luzingu lualu: Kuenda ku kisalu, yonzula dikanda ayi sueka zimbongo mu diambu di bununu buawu. Basi zaba ko mambu momo Nzambi kavanina tsila mu diambu di bilumbu binkuiza. Vayi bisadi bi Yehova bawu beta tula vuvu kiawu kuidi niandi. (Nku. 25:3-5; 1 Tim. 6:17) Tueta tudila sikididi kieto kuidi Nzambi yoyi tuididi pfika pfika ayi tueta tudila sikididi kieto mu zitsila ziozi katuvana. Luzingu lueto mu diambu di bilumbu binkuiza lutadidi phe vuvu kioki tuidi ki sambila Nzambi mvimba mvimba ku Paladiso.—Tanga Minkunga 37:29.
11. Mambu mbi meta salama beto fikama kuidi Nzambi ayi niandi bue keta kukimuena?
11 Fikama kuidi Nzambi didi diambu dimboti kuidi beto mu ziphila diaka zinkaka ziwombo. Mu kifuani, Yehova veni tsila yi lemvukila masumu ma batu bobo bam’balula mavanga, bobo bakumfikama. (Yes. 1:18) Yawu yeta tula ti tubika nata zitu mu kansasa kieto mu bila ki masumu momo tuvanga mu thama. (Nku. 32:1-5) Ayi tuidi mu makhini mayangidika Yehova. (Zin. 23:15) Bukiedika wulenda yindula mamboti mankaka momo wulenda baka mu ba kikundi kingolo ayi Nzambi. Vayi bue wulenda tatiminina bela pfika pfika kuidi Nzambi?
PHILA YITATIMININA BELA “PFIKA PFIKA KUIDI NZAMBI”
12. Mbi wutula muingi wufikama Nzambi?
12 Enati widi Mukristu nioni wubaka mbotama, widi deja wufikama kuidi Nzambi mu phila mosi yinneni. Wulonguka mambu mawombo makiedika mu diambu ditadidi Yehova Nzambi ayi Yesu, wubalula mavanga maku mu masumu maku mathama, wumonisa minu kingolo kuidi Nzambi ayi wutula ngolo mu vangila mambu mu nguizani ayi lukanu luandi. Muingi tufikama kuidi Nzambi, tufueti tatamana vanga mambu momo.—Kol. 2:6.
13. Mambu mbi matatu malenda kutusadisa tutatamana fikama kuidi Yehova?
13 Mbi bieta kutusadisa tutatamana fikama kuidi Yehova? 1) Tufueti tatamana tanga ayi longuka Bibila. Mu kubutudila, lukanu lueto luedi sukila ko kaka mu zaba malongi mathonono mu diambu di Nzambi. Vayi tufueti tombanga zaba lukanu lu Nzambi mu diambu di beto ayi tufueti diatusungu mu zitsikudukusu ziandi ziozi zidi mu Mbembo’andi. (Efe. 5:15-17) 2) Tufueti kindisa minu kieto mu yindudila mu buphinda bidimbu biwombo biobi bilembo monisa luzolo luandi kuidi beto. 3) Tufueti tatamana lenda mambu momo meta fuemisa Yehova ayi tufueti manga tula kikundi na batu bobo beta vanga mambu maphila yoyi.—Nku. 1:1; 101:3.
14. Mu tadila mambu momo madi mu 1 Kolinto 10:31, mambu mbi tulenda vanga mu luzingu lueto lu lumbu ka lumbu mu diambu di tuyangidika Yehova? (Tala phe zifoto.)
14 Tanga 1 Kolinto 10:31. Didi diambu dimfunu tutatamana tomba mu kipfuzi kioso mambu momo meta yangidika Yehova. Tuedi sukila ko kaka mu kuendanga mu zikhutukunu zi kimvuka ayi mu kisalu ki tsamununu, vayi tufueti luta vanganga mambu momo manyangidikanga Yehova. Mambu mamboti momo meta yangidika Yehova matadidi mu mambu momo tueta vanga kadika lumbu. Mu kifuani, mu thangu tuntuba kiedika mu mambu moso ayi mu thangu tueta kabula bima biobi tuidi kuidi batu bankaka, buawu tueta yangidikila Yehova. (2 Ko. 8:21; 9:7) Tidi phe tubongila mu mfunu wombo dikaba di luzingu. Tueta fikama kuidi Mvani wu luzingu mu tatamana ba na bifu bifuana mu mambu matedi ndiwulu ayi nduiwunu ayi mu kipanga bumboti buvini bueto bunitu mu ziphila zifuana. Zingolo zioso ziozi tueta tula mu diambu di yangidika Yehova, mfunu wombo zikala va meso mandi.—Luka 16:10.
Nata ditoma mu nduenga yoso, kukikipa mu phila yimboti mu tulanga ngala sisi, dianga bumboti ayi yambanga banzenza, zidi ziphila ziozi tulenda yangidikila Yehova (Tala paragrafi 14)
15. Bue Yehova keta kututombila tuvangila batu bankaka mambu?
15 Yehova weta vangila batu boso mambu mamboti, buba bobo beta kunsadila ayi bobo ka bansadilanga ko. (Mat. 5:45) Katidi phe tubutudilanga kuidi batu bankaka. Mu kifuani, tufueti ‘manganga tubilanga batu mu phila yimbimbi, tubika banga batu bobo ban’zonzanga . . . tuba batu balembama kuidi batu boso.’ (Tito 3:2) Beto ba na mambu beni momo mu mayindu, tuedi lenda ko batu bankaka mu bila kioki ka bawilukilanga ko mambu momo beto tueta wilukila. (2 Tim. 2:23-25) Tueta fikama kuidi Yehova mu tatamana ba batu bamboti ayi mu tatamana ba nguizani yimboti ayi batu boso.
TULENDA “FIKAMA KUIDI NZAMBI” BUBA MU THANGU TUTUDIDI NZIMBALA
16. Mu phila mbi nsoniki wu Minkunga 73 katonina kukimuena kumanima ma mua thangu?
16 Vayi mambu mbi meta salama enati mu thangu mosi plina weka kimona ti wusiedi ko wufuana mu baka luzolo lu Yehova? Diambu beni diodi dibuilukulu phe nsoniki wu Minkunga 73. Wutatakana mu tuba ti: “Fioti fisiala nginu malu mama masialumuka; fioti fisiala nginu ndizimbisa singumunu ki kulu kuama.” (Nku. 73:2) Mu mayindu mandi veka, wukimona ti wuba “wuluala” ayi wuba “vungisi” ayi banga “bulu ki nsitu” va ntuala Yehova. (Nku. 73:21, 22) Wukimona ti mu bila ki nzimbal’andi, wuba mutu phamba nioni kasi fuana ko baka luzolo lu Yehova?
17. a) Buba mu thangu kakimona ti weka mutu phamba, diambu mbi nsoniki wu minkunga katomba vanga? b) Dilongi mbi tulenda baka mu mambu momo kadengana? (Tala phe zifoto.)
17 Enati nsoniki beni wu minkunga wukimona ti kasi ko mfunu kuidi Yehova, phila beni yina kakimuena yisi zingila ko zithangu ziwombo. Yimonika ti mu thangu kakimona mu phila beni yina, wubakula mfunu wu fikama kuidi Nzambi, banga phila bulembo monisina ziphova ziandi ziazi: “Muaki ndidi kaka va kimosi ayi ngeyo [Yehova] mu zithangu zioso; wutsimbidila mu koko kuama ku lubakala. Ngeyo weta kundiatisa mu zindongi ziaku ayi bosi ngeyo wela kuthambula mu nkembo.” (Nku. 73:23, 24) Beto phe tufueti tulanga thalu’eto kuidi Yehova banga ditadi dikutusikimisa mu thangu tulembo kimoni ti tume lebakana ayi tuvongidi nitu. (Nku. 73:26; 94:18) Buba ti tuvambukidi mu mua ndambu thangu, tulenda vutuka kuidi Yehova mu ba na sikididi ti widi “wukubama mu lemvukilanga.” (Nku. 86:5) Nduka nduka mu thangu tulembo kimoni tusiedi ko mfunu, didi diambu dimfunu mu fikama kuidi Nzambi.—Nku. 103:13, 14.
Mu thangu tukimueni ti tume lebakana mu kipheve, tufueti fikama kuidi Yehova mu luta kukivana buwombo mu kunsambila (Tala paragrafi 17)
“FIKAMA KUIDI NZAMBI” MVIMBA MVIMBA
18. Bila mbi kuisi ko zindilu mu fikama kuidi Yehova?
18 Kuisi ko kadi zindilu mu phila yoyi tulenda fikiminina kuidi Yehova ayi mu phila yimboti yoyi tulenda kun’zabila. Bibila kitubidi ti zinzila zi Yehova, ndueng’andi ayi nzayilu’andi “bilendi bakulu ko.”—Loma 11:33.
19. Sikididi mbi Minkunga yituveni?
19 Minkunga 79:13 yitubidi ti: “Buna beto batu baku, nkangu’aku wu mamemi weti dikila; tuela kuzitisa mu zithangu zioso, mu tsungi ka tsungi, tuela yolukila min’zitusu miaku.” Bo wulembo tatamana ba pfika pfika ayi Nzambi, ngeyo phe wulenda ba sikididi ti wela baka lusakumunu lu mvu ka mvu ayi mu sikididi kioso mawu tuba ti: “Nzambi niandi zingolo voti ditadi diama ayi kuku kiama mu zithangu zioso.”—Nku. 73:26.
NKUNGA 32 Poná nde Yehova!
a Batu bankaka bobo balembo dengana zithatukusu zingolo, buba ziozi zi mayindu ayi batu bobo badi mu kiadi kioki kikadi fika mana, balenda tomba lusadusu lu munganga. Mu diambu di wuzaba mambu mawombo, tala Nzo yi Nkengidi, No. 1 2023 mu dingala.