DILONGI 55
Buela mioko mu kimvuka kiaku
Mu nza yimvimba, bisadi bi Yehova badi zimilio ayi badi phe na zimili zi bimvuka. Bambangi boso beta yangalala mu malongi ayi formasio yoyi beta baka, ayi mu luzolo loso bawu phe beta buela mioko mu bimvuka biawu. Ngeyo phe buawu weta muena mu diambu di kimvuka kieno?
1. Mu ziphila mbi wulenda vanina thangu ayi zingolo ziaku mu kimvuka kio wukala?
Mu kimvuka, mutu nionso mfunu kakala. Enati mu kimvuka kieno muidi na bakhomba bo badi bieta voti bobo bayonzuka, wulenda kubasadisa mu diambu di bakutakananga mu zikhutukunu. Wulenda phe kubasadisa mu phila yinkaka, banga kue basumbila bima ku zandu voti kubasadisa mu bisalu bi nzo. (Tanga Zaki 1:27.) Wulenda kuaku kivana mu luzolo loso mu buela mioko mu diambu di khombodolo ayi mbongosolo yi nzo yi Kimfumu. Kuisi ko mutu wulenda tukuika mu kingolo muingi tubuela mioko mu kimvuka; bila luzolo lueto kuidi Nzambi ayi bakhomba zieto luawu lueta tutuma ‘tukivana mu luzolo lueto veka.’—Minkunga 110:3.
Batu bobo babaka mbotama, balenda luta buela diaka mioko mu ziphila zinkaka. Bakhomba zi babakala bo ban’dukisa mambu mo mantombana mu Bibila, balenda kuawu sala mu kimvuka banga bisadi mu kisalu ayi kuntuala beba ba bakulutu. Bakhomba zi babakala ayi zi baketo balenda kuawu ba min’zibudi mi nzila ayi sala buwombo mu kisalu kitsamununu. Bambangi zinkaka zi Yehova beta kivana mu diambu di tunga zinzo zi Kimfumu ayi beta kue vuanda mu bibuangu bidi bimvuka bintomba lusadusu.
2. Bue wulenda buedila kimvuka mioko mu nzila yi bima biaku?
Bibila kieta tulomba ‘tuzitisa Yehova mu nzila yi bima bieto biluvalu.’ (Zingana 3:9) Didi diambu di zikhini mu vana zimbongo zieto voti bima bieto, mu diambu di buela mioko mu kimvuka kioki tuidi voti mu kisalu kitsamununu mu nza yimvimba. (Tanga 2 Kolinto 9:7.) Makaba meto phe meta sadisa bakhomba zieto bo babuilukulu mambu ma ziphasi. Bambangi ziwombo zi Yehova “beta tula zimbongo va ndambu” mu diambu di vana makaba. (Tanga 1 Kolinto 16:2.) Diawu beta sadila siti yi donate.jw.org voti zikesi zi makaba zio zidi mu zinzo zi Kimfumu. Phila beni yo yivanina, yeta monisa ti tueta zola Yehova.
TUVISA MBOTI MBOTI
Tutubila ziphila zio tulenda buedila kimvuka mioko.
3. Tulenda sadila bima bieto mu vana makaba
Yehova ayi Yesu beta zola mutu nioni weta vana mu mayangi. Kibedi lumbu Yesu wumona kiphumbulu kimosi kinketo lembo vani makaba. Tanga Luka 21:1-4 ayi vana mimvutu mu biuvu biabi:
Fueti teka vana makaba mawombo mosi Yehova kamona khini?
Yehova ayi Yesu bue beta muena mu thangu tumvana mu ntim’eto woso?
Mosi wuluta zaba bue beta sadila makaba beni, tala VIDEO. Ayi vana mvutu mu kiuvu kiaki kilandikini.
Bue makaba meto meta sadisila bimvuka bi nza yimvimba?
4. Tulenda vana lusadusu lueto mu luzolo loso
Mu thangu thama, bisadi bi Yehova beba mvananga ko kaka zimbongo mu diambu di bibuangu biawu bi lusambulu. Vayi phe babe salanga buwombo mu diambu di tanina ayi bongisa bi buangu beni. Tanga 2 Lusansu 34:9-11 ayi vana mvutu mu kiuvu kiaki:
Bue kadika mutu mu thangu yi bana ba Iseli kabuedila mioko mu diambu di mbongosolo yi Kinlongo?
Mosi wumona bue Bambangi zi Yehova beta bongisila zinzo ziawu zi Kimfumu, tala VIDEO. Ayi vana mimvutu mu biuvu biabi bilandikini.
Bila mbi dididi diambu dimfunu ti nzo yi Kimfumu yifueti banga thangu zioso kitoko ayi mu phila yimboti?
Mu ziphila mbi wulenda vanina lusadusu luaku?
5. Sadila kimvuka
Bibila kieta kindisa kuwombo bakhomba ba babakala basala mu kimvuka. Tala VIDEO ayi vana mvutu mu kiuvu kiaki kilandikini.
Bue Ryan kayiza kivanina kuwombo mu kisalu ki kimvuka?
Bibila kimonisini mambu momo khomba wubakala kafueti dukisa muingi kaba sadi ki kisalu voti nkulutu. Tanga 1 Timote 3:1-13 ayi vana mimvutu mu biuvu biabi:
Mambu mbi meta tombana kuidi khomba wubakala nio tidi ba sadi ki kisalu voti nkulutu?
Enati dikanda kadi, mambu mbi malenda tombana mu dikanda diandi?—Tala verse 4 ayi 11.
Mu thangu bakhomba ba babakala balembo tudi zingolo mu ba na bikadulu beni biobi, mamboti mbi yilenda natina kimvuka?
BALENDA KUYUVUSA: “A beno kue kueta ba zimbongo ziozi zieta diatisa dibundu dieno?”
Mbi wulenda vutula?
MU BUKHUFI
Yehova weta yangalala bo tumvana thangu’eto, zingolo zieto voti zimbongo zieto mu diambu di buela mioko mu kimvuka.
Phutukulu
Bue tulenda vanina thangu’eto ayi zingolo zieto mu diambu di kisalu ki kimvuka?
Bue tulenda buedila mioko mu kimvuka mu vananga bima bieto?
Mu ziphila mbi tulenda yangalala buedila kimvuka mioko?
TALA MAMBU MANKAKA
Mu bilumbu bieto biabi Nzambi weta lomba kaka buku ki kumi (dime)?
“Biblia elobi nini mpo na dime?” (Lisolo oyo ezali na Internet)
“Tomba baka” biyeko mu kimvuka mbi yinsundula.
“Ozali koluka mikumba?” (Linɔ́ngi ya Mosɛnzɛli ya 15/09/2014)
Zingolo zio zieta yitukisa batu zio Bambangi zi Yehova beta tula mu diambu di natina bakhomba ziawu minkanda.
Kokabola mikanda oyo elimbolaka Biblia na République Démocratique du Congo (4:25)
Bambangi zi Yehova beta bafuta mu kisalu kio beta sala?
“Batatoli ya Yehova bazwaka mbongo wapi?” (Lisolo oyo ezali na Internet)