Biuvu bi mintangi

Mu thangu Yesu katonisa bidia bi Pfumu, kue kuba 70 ki minlonguki miomi katuma mu kisalu ki tsamununu va thonono? Bantina?

Tulendi ko banzila ti bo ka basi ba ko mu thangu Yesu katonisa bidia bi Pfumu, ti muna 70 ki milonguki beni mintina voti Yesu kasi kubakikinina ko. Yesu niandi mu diluaku beni dina, wutomba ba kaka ayi mimvuala miandi.

Buba 12 ki milonguki ayi 70 ki minlonguki beni mina baboso wubakikinina. Yesu wuteka sobula mu wombo di balonguki bandi 12 ki babakala bobo katedila mimvuala. (Luka 6:12-16) Yesu ku Ngalili kaba mu thangu “kakutikisa kumi ki mimvuala miodi” ayi “wubatuma benda yamikisa luyalu lu Nzambi ayi wubatuma babelusa zimbevo.” (Luka 9:1-6) Ayi kuntuala wusobula diaka 70 ki minlonguki ayi “wubatuma buadi buadi.” (Luka 9:51; 10:1) Vayi, Yesu wuba phe ayi minlonguki mi phila mu phila mu bibuangu biobi keba kue samuninanga.

Bayuda bobo bayiza ba balonguki ba Yesu, beba tulanga nyengo wu Pasika kadika mvu, bulendakana ayi makanda mawu. (2 Mo. 12: 6-11, 17-20) Mu thangu lufua luandi luyiza fikama, Yesu ayi mimvuala miandi bayenda ku Yelusalemi. Vayi kasi mana lomba ko balonguki bandi boso bo baba ku Yuda, ku Ngalili, ayi ku Peree biza tudi nyengo wu Pasika yinneni va kimosi ayi niandi. Dimonikini bumboti mboti ti, Yesu wutomba kaka ba ayi mimvuala miandi mu diluaku beni dina. Wubakamba: “Phuila yiwombo yiba yama mu diambu di dia Pasika yayi va kimosi ayi beno tuamina ndimona ziphasi.”​—Luka 22:15.

Kuidi ayi bila kimfunu kioki Yesu katedisila kaka mimvuala miandi. Fioti fisiala mu diambu di Yesu kafua banga “muana dimemi di Nzambi wum’botulanga masumu mu nza.” (Yow. 1:29) Diambu beni difuana salimina ku Yelusalemi koko beba vaninanga minkayilu kuidi Nzambi tona thama. Lufua lu Yesu lunata khudulu yinneni viokila yo yimonika mu nzila yi muana dimemi diodi di diwu kuidi makanda ma Iseli mu builu bobo batotuka mu buvika ku Ngipiti. (1 Ko. 5:7, 8) Mambu momo Yesu kavanga masadisa kumi miodi mi balonguki bandi baba mintonisi mi kimvuka ki Bukristu. (Efe. 2:20-22) Didi diambu dimboti mu zaba ti Yelusalemi mbanza yi busantu yiba na “12 ki zifondasio” ayi mu zifondasio beni mu sonama ‘12 ki mazina ma 12 ki mimvuala mi muana dimemi.’ (Tso. 21:10-14) Ninga, mimvuala mikuikama miba na kiyeko kinneni mu lungana ku lukanu lu Nzambi. Diawu tume sudika bila mbi Yesu katombila kaka bela na 12 ki mimvuala mu nyengo beni wutsuka wu Pasika ayi mu nyengo wowo wuyiza vingana, wowo batedidi: Bidia bi Pfumu.

Balonguki boso bo bankaka buba phe 70 yoyi tutekidi tubilanga va thonono, basi dia ko bidia beni bina bi Pfumu ayi Yesu. Vayi balonguki boso bobo bamonisa kadulu ki kuikama, bafuana baka mamboti mu nyengo wowo Yesu katonisa wu bidia bi Pfumu. Baboso kumanima bayiza ba bakristu bobo batulu mafuta mu kipheve, bafuana kota mu luwawanu lu Kipfumu lolo Yesu katula ayi mimvuala miandi mu builu beni buna.​—Luka 22:29, 30.