Juão

Espiritu Santu muraki

16 Asui Jesus umbeu yuiri ainta, unyee:

—Hambeu penye arama panye kua hambeuwaa tiarama pewari sesui. 2 Aintaumburi kuri penye sinaguga sui. Asui amu ara kuri kuaita uyukáwaita penye aintaumanduari kuri aintaumunya puranga Deus supe. 3 Yawe kuri aintaumunya nyãse tiaintaukunyeseri sepaya nẽ ixe yuiri. 4 Hambeuwana penye arama kua nyenga pemanduari arama kuri sangawa upe kua hambeuwaita penye arama. Tire hambeu penye arama hayupiru rame haiku peirumu nyãse peirumute ixe. 5 Maa kuiri hasu ipiri kua umunduwaa ixe, asui tiawa pesuiwara upurandu ixe. Maa kititaa resu? 6 Maa sasiyara pepia turusu nyãse hambeu resewara penye arama kua hambeuwaa. 7 Hambeu penye arama supiwa, harikute hasu pesui, tirame hasu pesui tikuri uri pepiri kua umusuuriwaa, maa hasu rame hamundu kuri penye arama ae. 8 Uri rame kuri uxari kuri aintaukuawa aintauriku aintapekadu kuaita mundu puraita, uxari yuiri aintaukuawa sese kua purangawaa, uxari yuiri aintaukuawa aintaupurara kuri aintapekadu resewara. 9 Uxari aintaukuawa aintapekadu resewara nyãse tiaintauxari aintapia serese. 10 Uxari aintaukuawa kua purangawaa resewara nyãse hasu sepaya ipiri asuiwana kuri tikuri pemaa ixe. 11 Uxari aintaukuawa aintaupurara arama kuri nyãse hamburiana kua mundu ruixawa. 12 Harikure turusu hambeu arama penye arama maa tipepuderi pesendu ae kuiri. 13 Maa uri rame kuri kua Espiritu supiwa uxari kuri pekuawa panye nyenga supiwa, tikuri upurungita simutara, maa umbeu kuri kua usenduwaa, asui uxari kuri pekuawa sese kua uriwaa kuri. 14 Umbeu kuri purangawaa serese nyãse uriku kuri kua sesuiwara asui umbeu kuri penye arama ae. 15 Panye sepaya urikuwaa aete harikuwaa yuiri, sesewara hambeu penye arama:

—Uriku arama kuri sesuiwara, asui umbeu kuri penye arama ae. 16 Watari xinga tiana kuri pemaa ixe, asui xinga pemaawana yuiri kuri ixe. 17 Asui yepeyepe umbuewaita aintauyupurungita, aintaunyee:

—Mayesawataa kua umbeuwaa yande arama? Watari xinga tiana kuri pemaa ixe maa asui xinga pemaawana yuiri kuri ixe. Umbeute yuiri, hasu sepaya piri. 18 Asui aintaunyee:

—Mayesawataa kua inyenga watari xinga? Tiyakuawa mayesawataa ae. 19 Asui Jesus ukuawa aintauputari aintaupurandu ae asui unyee ainta supe:

—Maitaa peputari pekuawa mayesawataa kua hambeuwaa, watari xinga tiana kuri pemaa ixe maa asui xinga pemaawana yuiri kuri ixe? 20 Supiwa hambeu penye arama:

—Peyaxiu kuri sasiyara kuri penye, maa suuri kuri kuaita mundu puraita. Sasiyara kuri penye asui kua sasiyarasawa uyutrukari suuri arama kuri penye. 21 Sasiyara kua kunya unaseri irumu imembira nyãse usikana sangawa, maa unaseri rire imembira tiana umanduari sese kua upurarawaa anyunte suuri umaa kua imembira unaseriwaa umaa kua mundu upe. 22 Yawete yuiri penye kuiri sasiyara penye, maa hamaa yuiri kuri penye mukuĩsawa asuiwana kuri suuri pepia, asui tikuri awa upuderi uyuka pesui kua suurisawa. 23 Nyã ara upe kuri nemaa pepurandu seirumu. Supiwa hambeu penye arama:

—Sepaya uxari kuri penye arama maantu pepurandu irumu serera rupi. 24 Tire maa nungara pepurandu serera rupi, pepurandu asui periku kuri ae suuri arama kuri penye turusu piri.

Umbeu sesewara usu arama aintasui

25 Hambeuwana penye arama kua hambeuwaa hambue aramawaa ipupe, amu ara kuri tikuri hambeu penye arama hambue aramawaa ipupe, maa hambeu kuri penye arama uyukuawa sese kua sepaya. 26 Nyã ara upe kuri pepurandu kuri serera rupi, maa tihambeu penye arama hapurandu kuri sepaya irumu perese. 27 Nyãse sepaya ugustari penye nyãse pegustari yuiri ixe pexari yuiri pepia serese hayuiri Deus sui. 28 Hayuiri sepaya sui hawike arama kua mundu kiti, kuiri hasu kua mundu sui hasu arama sepaya ipiri. 29 Asui umbuewaita unyee ixupe:

—Kuiri repurungita uyukuawa tirembeu yande arama kua nyenga rembue aramawaa ipupe. 30 Kuiri yakuawa rekuawate panye maa rese, tipresizu amu upurandu inde. Sesewara yakuawa supiwa reyuiri Deus sui. 31 Asui Jesus unyee ainta supe:

—Maitaa pexari pepia serese kuiri? 32 Amu ara kuri kuiri yuiri peyusãi kuri panye penye perendawa kiti asui kuri pexari ixe, maa timaa yepenyuwaa ixe maa seirumute sepaya. 33 Hambeuwana penye arama kua nyenga tiarama maa rese peiku sepia upe. Pepurara kuri kua mundu upe, maa pexari suuri pepia nyãse hamuserana kua mundu.