1 Pedru
Kunyaita apigawaita yuiri
3 Yawete yuiri penye perikuita pemena, peruyari pemenaita nyenga, tirame yepeyepe aintasuiwara uruyari kua nyenga pexari aintauruyari arama ae pekiriri resewara pemunya puranga penye aintarimirikuita, 2 Aintaumaa irumu pesikie Deus sui, aintaumaa yuiri perikusawa purangawaa. 3 Penye perikuita pemenaita tepeyumukaturu penyepawa irumu kua yamaawaa, peawa peyupewa irumu yuiri, uru suiwaraita yuiri, perupa siyawaita irumu yuiri. 4 Maa pemukaturu pepia upe kua Espiritu tiwa ukanyemu, kua uxariwaa tipepiaiwa penye, kua uxariwaa timaarese penye, nyãse sipiwasuwaa yawe Deus umaa ae. 5 Nyãse yawe kuera yuiri aintauyumukaturu kuaita kunyaita purangawaita, kuaita usaruwaita kuera umaa Deus, asui aintauruyari yuiri aintamena nyenga puranga. 6 Kua Sara uruyari kuera Abraão nyenga, useruka ae suixawa. Asui kuiri penyete ximiariruita pemunya resewara puranga, tiresewara pexari maantu umutawa penye. 7 Penye perikuita perimirikuita, peiku ukuawawaita yawe aintairumu kuaita perimirikuita, perespetari puranga kuaita perimirikuita, nyãse pitua xinga ainta pesui, nyãse yepewasu periku kua ipurangasawa upakawaa, tiarama kuri maa umuapatuka penye pepurandu Deus irumu.
Yagustari yanerumuaraita
8 Asui kuiri pexari yepewasu pemanduarisawa, puranga peyumaa, pegustari perumuaraita, pirasua peyumaa, tepemanduari purangawaita penye amuita sui. 9 Tepemunya ainta supe puxi aintaumunya rame penye arama puxi u aintaumbeu rame perese puxi, maa pepurandu aintarese purangawaa, nyãse sesewara usenuiwana penye periku arama kuri purangawaa. 10 Nyãse awa uputari uiku suuri umaa arama siya ara puranga, urikute tiuxari usemu iyuru sui nyenga puxuwerawa, tiyuiri uganani iyuru irumu; 11 Urikute uyereu panye puxuwerawa sui umunya arama puranga, urikute usikari timaaresesawa, usu arama sakakuera. 12 Nyãse yaneruixawa umaa ainta supe sesa irumu kuaita purangawaita, upirari yuiri iapisa kuara aintaupurandu rame irumu Maa yaneruixawa umuyereu aintasui suwa kuaita umunyawaita puxi.
Yapurara arama Kristu yawe
13 Ape awa kuri umunya penye arama puxi pesikari rame kirimbawa pemunya kua purangawaa. 14 Maa suuri kuri penye pepurara rame pemunyawaita purangawaita resewara Tepesikie aintasui, tepexari aintaumutawa penye. 15 Perikute pekuawa pepia upe peruixawa kua Kristu Yawewarawate perikute pemukaturu pepia upe, pekuawa arama pesuaxara kuaita upuranduwaita penye mayesawataa kua pesaruwaa perikuwaa. 16 Perikute pesuaxara ae timaa ipiaiwasawa irumu pesikie resewara pemaa ae, pemanduarisawa ikiaimawaa irumu, aintauyumutiĩ arama kuri kuaita ukasuariwaita perese sesewara kua purangawaa pemunyawaa Kristu resewara. 17 Deus uputari rame pepurara, ape puranga piri pepurara sesewara kua purangawaa pemunyawaa isui kua puxuwerawa pemunyawaa. 18 Nyãse umanu kua Kristu yepe viajinyu pekadu resewara, kua purangawaa umanu ae aintaresewara kuaita puxuwerawaita, urasu arama yande Deus ipiri, umanu ae ipira upe, maa upakate ae iespiritu irumu. 19 Asui iespiritu irumu usu umbue kuaita espirituita prezuwaita, 20 Kuaita tiwaita kuera aintauruyari Deus uriku rame kuera pasiensia usaru pukusawa arame Nue umunya irumu batelão, umukaturu arama parana sui kuaita yepeyepeita mira, uituwaita. 21 Kuiri umukaturu penye yawete yuiri kua batizmu, maa timaa umuyasuka yanepira sui yanekiasawa, maa yaputari resewara yamanduarisawa ikiaimawaa Deus umaa, Jesus Kristu upuamu resewara iwi kuara sui. 22 Kuxima usu iwaka kiti, asui kuiri uwapika Deus katusawa upe, asui umundu kuaita anjuita, kuaita kirimbawawaita, umunduwaita yuiri.