Mateo
3 Teʼ kʼiinoʼob jeʼeloʼ taal Juan Bautistaeʼ ka joʼopʼ u kʼaʼaytaj tu desiertoil Judea, 2 táan u yaʼalik: «Kʼex a tuukuleʼex tumen u Reinoil kaʼaneʼ tsʼoʼok u náatsʼal». 3 Juaneʼ letiʼe máax tiʼ tʼaanaj profeta Isaías ka tu yaʼalaj: «¡Uʼuyeʼex! Yaan máax ku yawat teʼ desierto táan u yaʼalik: ‹¡Maʼalobkíinteʼex u beel Jéeoba! Tojkíinteʼex u beeloʼob›». 4 U nookʼ Juaneʼ beetaʼan kaʼach yéetel u tsoʼotsel camello, u jéepʼkʼaxtmaj u nakʼ yéetel junpʼéel kʼaxnakʼ de kʼéewel; u yoʼoch xaneʼ sáakʼ yéetel u kaabil kʼáax. 5 Tuláakal túun u kajnáaliloʼob Jerusalén, Judea yéetel le mejen kajtaliloʼob yaan naatsʼ tiʼ u áalkab jaʼil le Jordanoʼ ku taaloʼob kaʼach tu yiknal, 6 letiʼ túuneʼ ku tsʼáaik u yokjaʼob teʼ Jordanoʼ; letiʼob xaneʼ ku yaʼalikoʼob kaʼach tuláakal u kʼebanoʼob.
7 Ka tu yilaj Juan táan u taal yaʼab fariseoʼob yéetel saduceoʼob teʼ tuʼux ku tsʼaa okjaʼoʼ, tu yaʼalajtiʼob: «U chʼiʼibaleʼex kaan, ¿máax aʼalteʼex jeʼel u páajtal a púutsʼleʼex tiʼ u kʼiinil u pʼuʼujul Dios tsʼoʼok u náatsʼloʼ? 8 Eʼeseʼex yéetel baʼax ka beetkeʼex* tsʼoʼok a kʼexik a tuukuleʼex. 9 Maʼ xan u táabal a waʼaleʼex ichil a puksiʼikʼaleʼex: ‹Toʼoneʼ k-taataeʼ Abrahán›. Tumen kin waʼalikteʼexeʼ Dioseʼ jeʼel u páajtal u líiʼsik u paalal Abrahán tiʼ le tuunichoʼobaʼ. 10 Le báatoʼ tsʼoʼok u tsʼaʼabal tu moots le cheʼoboʼ. Le oʼolaleʼ tuláakal cheʼ maʼ tu tsʼáaik maʼalob icheʼ yaan u chʼaʼakal yéetel yaan u puʼulul ich kʼáakʼ. 11 Teneʼ kin tsʼáaik a wokjaʼex yéetel jaʼ tumen ka kʼexik a tuukuleʼex, baʼaleʼ le uláakʼ Máax kun taaloʼ maas yaan u páajtalil tiʼ teen, maʼ in náajaltmaj mix tak in luʼsik u xaanabiʼ. Le Máakaʼ yaan u tsʼáaik a wokjaʼex yéetel kiliʼich muukʼ bey xan yéetel kʼáakʼ. 12 U machmaj u nuʼukulil utiaʼal u saltik le trigooʼ, yaan u láaj míistik u sojlil yéetel yaan u líiʼsik le trigo teʼ chʼiiloʼ, baʼaleʼ le u sojliloʼ yaan u tóokik yéetel junpʼéel kʼáakʼ maʼ tu páajtal u tuʼupul».
13 Jesús túuneʼ lukʼ Galileaeʼ ka taal teʼ Jordán utiaʼal ka tsʼaʼabak u yokjaʼ tumen Juanoʼ. 14 Baʼaleʼ Juaneʼ maʼ u kʼáat kaʼachiʼ, tu yaʼalajtiʼ: «¿Teech ka taal utiaʼal ka in tsʼáa a wokjaʼ? ¿Maʼ wa teen kʼaʼabéet a tsʼáaik in wokjaʼiʼ?». 15 Jesuseʼ tu núukajtiʼ: «Beete, kex chéen bejlaʼeʼ, tumen beyoʼ jeʼel u páajtal k-beetik tuláakal le baʼax u kʼáat Diosoʼ». Juan túuneʼ tu yóotaj u tsʼáa u yokjaʼ. 16 Ka tsʼaʼab u yokjaʼeʼ, Jesuseʼ tu séebaʼanil jóokʼ ichil le jaʼoʼ; ¡ile!, jeʼepaj túun le kaʼanoʼ ka tu yilaj u yéemel u kiliʼich muukʼ Dios bey juntúul paloma ku taal tu yóokʼoleʼ. 17 Jóokʼ xan junpʼéel tʼaan teʼ kaʼan táan u yaʼalik: «Lelaʼ in Paal, máax in yaabiltmaj, tu yoʼolal máax jach kiʼimak in wóol».