24 Teʼ súutuk jeʼeloʼ le barcooʼ tsʼoʼok kaʼach u jach náachtal, tsʼoʼoleʼ táan u jaʼajatsʼaʼal tumen le olasoʼ, tumen le iikʼoʼ aktáan u taal. 25 Le taʼaytak túun u sáastaloʼ* Jesúseʼ bin tu yiknaloʼob táan u xíimbal yóokʼol le jaʼoʼ. 26 Le discípuloʼoboʼ ka tu yiloʼob yaan máax ku taal u xíimbal yóokʼol le jaʼoʼ sajakchajoʼob, ka joʼopʼ u yawat aʼalikoʼob: «¡Juntúul jaʼasaj óol!». 27 Chéen baʼaleʼ Jesúseʼ tu séebaʼanil tu yaʼalajtiʼob: «¡Maʼ a sajaktaleʼex! Teen, maʼ a chʼaʼikeʼex saajkil».+ 28 Pedroeʼ tu yaʼalajtiʼ: «Yuumtsil, wa jaaj teecheʼ aʼal ka taalaken ta wiknal tu yóokʼol le jaʼoʼ». 29 Letiʼeʼ tu yaʼalajtiʼ: «¡Koʼoten!». Pedro túuneʼ éem teʼ barcooʼ ka joʼopʼ u xíimbal tu yóokʼol le jaʼ utiaʼal u bin yiknal Jesúsoʼ. 30 Chéen baʼaleʼ le ka tu yilaj bukaʼaj kʼaʼamil le iikʼoʼ sajakchajeʼ ka joʼopʼ u búulul, ka tu yawtaj: «¡Yuumtsil, salvarteniʼ!». 31 Tu séebaʼanileʼ Jesúseʼ tu tichʼaj u kʼabeʼ ka tu machaj, ka tu yaʼalajtiʼ: «Jach túun junpʼíit a fe, ¿baʼaxten kaʼapʼéelchaj a tuukul?».+ 32 Ka tsʼoʼok u naʼakloʼob teʼ barcooʼ jéetsʼ le kʼaʼamkach iikʼoʼ. 33 Le máaxoʼob yanoʼob túun ichil le barcooʼ xolajoʼob tu táaneʼ ka tu yaʼaloʼobtiʼ: «Techeʼ jach tu jaajil u Paalech Dios».

16 Ka áakʼabchajeʼ u discípuloʼobeʼ éemoʼob tu jáal le kʼáaʼnáaboʼ,+ 17 ka naʼakoʼob tiʼ junpʼéel barco, ka joʼopʼ u kʼáatmáanskoʼob le kʼáaʼnáaboʼ utiaʼal u binoʼob tu tojil Capernaúm. Chéen baʼaleʼ kex tsʼoʼok kaʼach u yáakʼabtaleʼ Jesúseʼ maʼ xiʼik tu yiknaloʼobiʼ.+ 18 Káaj túun junpʼéel kʼaʼamkach iikʼeʼ ka joʼopʼ u woʼoltik le kʼáaʼnáaboʼ.+ 19 Le discípuloʼoboʼ ka tsʼoʼok u náachtaloʼob kex cinco wa seis kilómetros yéetel le barcooʼ tu yiloʼob táan u xíimbal Jesús yóokʼol le jaʼoʼ yéetel táan u náatsʼal tu yiknal le barcooʼ, letiʼob túuneʼ jach sajakchajoʼob. 20 Chéen baʼaleʼ letiʼeʼ tu yaʼalajtiʼob: «¡Teen, maʼ a chʼaʼikeʼex saajkil!».+ 21 Letiʼob túuneʼ tu chaʼajoʼob ka naʼakak teʼ barcooʼ, le barco túunoʼ maʼ xáanchaj ka kʼuch teʼ kaaj tuʼux ku binoʼoboʼ.+