12 Tiʼ junpʼéel u kʼiinil sábadoeʼ Jesúseʼ máan teʼ tuʼux pakʼaʼan trigooʼ, u discípuloʼob túuneʼ wiʼijchajoʼobeʼ ka joʼopʼ u tʼokikoʼob u yiʼij le trigooʼ ka joʼopʼ u jaantikoʼob.+ 2 Le fariseoʼoboʼ ka tu yiloʼob leloʼ tu yaʼaloʼob tiʼ Jesús: «¡Ilawile! A discípuloʼobeʼ táan u beetkoʼob le baʼax maʼ uts u beetaʼal tu kʼiinil sábadooʼ».+ 3 Letiʼeʼ tu yaʼalajtiʼob: «¿Maʼ wa a xokmeʼex le baʼax tu beetaj David yéetel le máaxoʼob ku máanoʼob tu yéetel le ka wiʼijchajoʼoboʼ?+ 4 Letiʼobeʼ ookoʼob tu yotoch Dioseʼ ka tu jaantoʼob le waaj kʼubaʼan tu táan Diosoʼ,+ kex maʼ unaj u jaantikoʼob kaʼachiʼ. Le waajaʼ chéen le sacerdoteʼob unaj u jaantikoʼob kaʼachoʼ.+ 5 ¿Maʼ wa a xokmeʼex xan baʼax ku yaʼalik le Ley tu yoʼolal le Sábadooʼ? Le sacerdoteʼoboʼ kex ku meyajoʼob teʼ templo tak tu kʼiinil le Sábadooʼ maʼ kʼeban u yilaʼaliʼ.+ 6 Chéen baʼaleʼ kin waʼalikteʼexeʼ wayeʼ yaan juntúul máax maas nojoch ke le templooʼ.+ 7 Wa ka a naʼateʼex kaʼach baʼax u kʼáat u yaʼal le tʼaanoʼobaʼ: ‹In kʼáat ka a chʼaʼex óotsilil,+ maʼ ka a kʼubeʼex baʼalcheʼobiʼ›,+ bejlaʼa maʼ táan a waʼalikeʼex kʼaas baʼax ku beetik le máakoʼobaʼ, tumen letiʼobeʼ mix baʼal kʼaas u beetmoʼob. 8 Tumen u Paal máakeʼ letiʼ u Yuumil le Sábadooʼ».+

23 Tiʼ junpʼéel u kʼiinil sábadoeʼ Jesúseʼ máan teʼ tuʼux pakʼaʼan trigooʼ, u discípuloʼob túuneʼ le táan u xíimbaloʼoboʼ káaj u tʼokikoʼob u yiʼij le trigooʼ.+ 24 Le fariseoʼoboʼ ka tu yiloʼob leloʼ tu yaʼaloʼob tiʼ Jesús: «¿Táan wa a wilik baʼax ku beetik a discípuloʼob? Letiʼobeʼ táan u beetkoʼob le baʼax maʼ uts u beetaʼal tu kʼiinil sábadooʼ». 25 Chéen baʼaleʼ Jesúseʼ tu yaʼalajtiʼob: «¿Mix juntéen wa ta xokeʼex baʼax tu beetaj David le ka pʼáat minaʼan baʼal u jaantoʼob, yéetel le ka jach wiʼijchaj letiʼ yéetel le máaxoʼob ku máanoʼob tu yéeteloʼ?+ 26 Letiʼeʼ ook tu yotoch Dioseʼ ka tu jaantaj le waaj kʼubaʼan tu táan Diosoʼ, ka tu tsʼáaj xan tiʼ le máaxoʼob yanoʼob tu yéeteloʼ. Tsʼoʼoleʼ le waajaʼ mix máak unaj u jaantik kaʼachi, chéen le sacerdoteʼoboʼ.+ Le baʼax úuchaʼ bey u yaʼalik u tsikbalil Abiatar+ u nojchil le sacerdoteʼoboʼ». 27 Jesúseʼ tu yaʼalaj xan tiʼob: «U kʼiinil sábadoeʼ beetaʼab utiaʼal u yutsil wíinik,+ wíinikeʼ maʼ beetaʼab utiaʼal ka u tsʼoʼokbes u kʼiinil sábadoiʼ. 28 Bey túunoʼ u Paal máakeʼ letiʼ u Yuumil le Sábadooʼ».+