Hechos

4 Le táan túun u tʼaan Pedro yéetel Juan tu táan le máakoʼoboʼ taal u nuuktakil le sacerdoteʼoboʼ, taal u nojchil le máaxoʼob ku kanáantkoʼob le templooʼ bey xan le saduceoʼoboʼ.+ 2 Letiʼobeʼ kʼuuxchajaʼanoʼob tumen le apóstoloʼobaʼ táan kaʼach u kaʼanskoʼob le kaajoʼ yéetel táan kaʼach u tsikbaltikoʼob tiʼ tuláakal máak kaʼa kuxkíintaʼab Jesús.+ 3 Le oʼolal tu beetoʼob u maʼachal le kaʼatúul máakoʼobaʼ ka bisaʼaboʼob kʼalbil+ tak ka sáaschaji, tumen teʼ súutuk ka maʼachoʼoboʼ táan kaʼach u yáakʼabtal. 4 Chéen baʼaleʼ yaʼab tiʼ le máaxoʼob chʼenxikint le baʼaxoʼob tu tsikbaltoʼoboʼ tu creertoʼob, tuláakloʼobeʼ yaan kex 5,000 u túulal xiiboʼob.+

5 Ka sáaschaj túuneʼ tu kaajil Jerusaléneʼ tu muchʼuba u gobernanteʼob le judíoʼoboʼ, u nuuktakil le kaajoʼ bey xan le escribaʼoboʼ* 6 (ichiloʼobeʼ tiaʼan Anás+ u nojchil le sacerdoteʼoboʼ, Caifás,+ Juan, Alejandro yéetel tuláakal u láakʼtsiloʼob Anás). 7 Letiʼobeʼ tu tsʼáajoʼob Pedro yéetel Juan chúumuk tiʼ letiʼobeʼ ka joʼopʼ u kʼáatkoʼobtiʼob: «¿Máax tsʼáateʼex u páajtalil a beetkeʼex lelaʼ? ¿Tu kʼaabaʼ máax ta beeteʼex?». 8 Pedro túuneʼ chuʼup yéetel espíritu santoeʼ+ ka tu yaʼalajtiʼob:

«Teʼex ka gobernarkeʼex le kaajoʼ bey xan teʼex u nuuktakil le kaajaʼ 9 uʼuyeʼex lelaʼ: bejlaʼeʼ táan k-juzgartaʼal úuchik k-áantik juntúul máak kʼojaʼan,+ yéetel taak u yojéeltaʼal máax tsʼáa u páajtalil k-beetik. 10 Ojéelteʼex yéetel ojéeltaʼak tumen tuláakal u kajnáaliloʼob Israeleʼ le máakaʼ tsʼaʼak tu kʼaabaʼ Jesucristo le Nazarenooʼ,+ le máax ta kíimseʼex tiʼ cheʼ,+ pero kaʼa kuxkíintaʼab tumen Diosoʼ+. Tu yoʼolal letiʼeʼ le máak waʼalakbal ta táaneʼexaʼ tsʼoʼok u yutstal. 11 Jesúseʼ letiʼ ‹le tuunich maʼ ta wóotaj a chʼaʼex utiaʼal a beetkeʼex le najoʼ, letiʼe nojoch tuunich yéeyaʼab utiaʼal u cimientoil* le najoʼ›.+ 12 Tsʼoʼoleʼ minaʼan salvación tu yoʼolal uláakʼ máak, tumen ichil u kajnáaliloʼob le luʼumoʼ maʼ tsʼaʼan uláakʼ kʼaabaʼ+ utiaʼal ka páajchajak k-salvartaʼaliʼ».+

13 Le máakoʼob túunoʼ jaʼakʼ u yóoloʼob le ka tu yiloʼob yéetel u jaajil u yóol ku tʼaan Pedro yéetel Juan, bey xan le ka tu yiloʼob chéen óotsil máakoʼob maʼ xooknajaʼanoʼobiʼ.*+ Ka túun tu tsʼáajoʼob cuentaeʼ letiʼobeʼ suuk kaʼach u máanoʼob yéetel Jesús.+ 14 Tsʼoʼoleʼ maʼ tu kaxtoʼob baʼal u yaʼaloʼobiʼ+ tumen táan kaʼach u yilkoʼob tiʼ waʼalakbal tu yiknaloʼob+ le máak tsʼaʼakoʼ. 15 Ka túun tu yaʼaloʼobtiʼob ka jóokʼkoʼob teʼ tuʼux yaan le Sanedrínoʼ,* tsʼoʼoleʼ ka joʼopʼ u tsikbaltikoʼob baʼax ken u beetoʼob, 16 tu yaʼaloʼob: «¿Baʼax ken k-beet yéetel le máakoʼobaʼ?+ Tumen u jaajileʼ junpʼéel nojoch milagro tsʼoʼok u beetkoʼob, yéetel tsʼoʼok u yilaʼal tumen tuláakal u kajnáaliloʼob Jerusalén.+ Tsʼoʼoleʼ maʼ tu páajtal k-aʼalik wa maʼ jaajiʼ. 17 Utiaʼal maʼ u maas tsikbaltaʼal ichil le kaajoʼ koʼoneʼex sajakkúuntkoʼob yéetel koʼoneʼex aʼaliktiʼob maʼ u kaʼanskoʼob mix máak tu kʼaabaʼ Jesús».+

18 Ka tsʼoʼokeʼ tʼaʼanoʼobeʼ ka aʼalaʼabtiʼob maʼ u yaʼalikoʼob mix baʼal tu yoʼolal u kʼaabaʼ Jesús mix u kaʼanskoʼob wa baʼax tu yoʼolal. 19 Le oʼolal Pedro yéetel Juaneʼ tu yaʼaloʼob: «Tukleʼex baʼax maʼalob tu táan Dios: ¿K-uʼuyik a tʼaaneʼex wa k-uʼuyik u tʼaan Dios? 20 Chéen baʼaleʼ ojéelteʼexeʼ toʼoneʼ maʼ tu páajtal u xuʼulul k-tʼaan tiʼ le baʼaxoʼob tsʼoʼok k-ilik yéetel tsʼoʼok k-uʼuyikoʼ».+ 21 Ka tsʼoʼok túun u kaʼa amenazarkoʼob le apóstoloʼobaʼ tu chaʼajoʼob u binoʼob tumen maʼ tu kaxtoʼob baʼax oʼolal u castigarkoʼobiʼ. Lelaʼ tu beetoʼob xan tumen saajkoʼob tiʼ le kaajoʼ,+ tumen tuláakloʼobeʼ táan kaʼach u alabarkoʼob Dios tu yoʼolal le baʼax úuchoʼ. 22 Le máak tsʼaʼak yéetel le milagrooʼ yaan maas tiʼ 40 años tiʼ.

23 Ka tsʼoʼok u jáalkʼabtaʼaloʼobeʼ binoʼob yiknal u maasil discípuloʼoboʼ ka tu tsikbaltoʼob baʼax aʼalaʼabtiʼob tumen u nuuktakil le sacerdoteʼob yéetel u nuuktakil le kaajoʼ. 24 Le ka tu yuʼuboʼob lelaʼ múul orarnajoʼob tiʼ Dios, tu yaʼaloʼobtiʼ:

«Kiʼichkelem Yuum, teech Máax beetmil kaʼan, luʼum, kʼáaʼnáab bey xan tuláakal le baʼaloʼob yanoʼob ichiloʼ.+ 25 Tu yoʼolal espíritu santoeʼ tʼaanajech yéetel u chiʼ David k-úuchben taata,+ le máax meyajtechoʼ, letiʼeʼ tu yaʼalaj: ‹¿Baʼaxten pʼujaʼan le kaajoʼoboʼ? ¿Baʼaxten le máakoʼoboʼ táan u tuukuloʼob tiʼ baʼaloʼob mix baʼal u biilaloʼob? 26 U reyiloʼob yóokʼol kaabeʼ tsʼoʼok u líikʼloʼob baʼateʼel, le gobernanteʼoboʼ tsʼoʼok u muchʼkubaʼob utiaʼal u tsʼáaikubaʼob tu contra Jéeoba yéetel tu contra le máax u yéeymoʼ›.*+ 27 U jaajileʼ bey úuchikoʼ. Herodes yéetel Poncio Pilato,+ junmúuchʼ yéetel j-táanxel luʼumiloʼob bey xan yéetel u kajnáaliloʼob Israeleʼ tu muchʼubaʼob teʼ kaajaʼ utiaʼal u tsʼáaikubaʼob tu contra le máax meyajtikechoʼ, tu contra Jesús, le máax santo a yéeymoʼ.+ 28 Letiʼobeʼ tu muchʼubaʼob utiaʼal u beetkoʼob le baʼax a waʼalmiliʼ yaan u yúuchloʼ. Techeʼ yéetel a páajtalileʼ ta beetaj u yúuchul tuláakal le baʼaloʼobaʼ tumen bey ta wóotilakoʼ.+ 29 Beora túunaʼ Jéeoba, chʼenxikint le baʼaxoʼob ku yaʼalikoʼob utiaʼal u sajakkúuntkoʼonoʼoboʼ, yéetel áant le máaxoʼob meyajtikechaʼ utiaʼal maʼ u chʼaʼikoʼob saajkil u kaʼansoʼob le baʼax ka waʼalikoʼ. 30 Maʼ u xuʼulul xan u meyajtech a poder utiaʼal a tsʼakik máakoʼob, a beetik milagroʼob bey xan uláakʼ nukuch baʼaloʼob+ tu kʼaabaʼ Jesús, le máax santo meyajtikechoʼ».+

31 Ka tsʼoʼok u kʼáat óolaloʼob* tiʼ Dioseʼ le lugar tuʼux yanoʼoboʼ tíitaʼabi, tuláakloʼob túuneʼ chuʼupoʼob yéetel espíritu santo,+ le oʼolal maʼ sajakchajoʼob u kaʼansoʼob le baʼax ku yaʼalik Diosoʼ.+

32 Tsʼoʼoleʼ tuláakal le máaxoʼob tu beetubaʼob discípuloiloʼ junpʼéeliliʼ bix u tuukuloʼob yéetel uts u puksiʼikʼaloʼob, mix juntúul tiʼ letiʼob ku yaʼalik kaʼach wa chéen u tiaʼal le baʼaxoʼob yaantiʼoʼ, baʼaxeʼ le baʼaloʼobaʼ ku meyaj kaʼach utiaʼal u paklan áantkubaʼob.+ 33 Le apóstoloʼob xanoʼ maʼ xuʼul u tsʼáaikoʼob ojéeltbil de ke kaʼa kuxkíintaʼab Yuumtsil Jesúsiʼ,+ jach maʼalob úuchik u beetkoʼob. Tsʼoʼoleʼ Dioseʼ tu yeʼesaj u nojoch utsil tiʼ tuláakloʼob. 34 U jaajileʼ mix máak ichiloʼob ku bineltik kaʼach wa baʼax tiʼ,+ tumen tuláakal le máaxoʼob yaan u kʼaaxoʼob wa u yotochoʼobeʼ ku konkoʼob yéetel ku taaskoʼob kaʼach u tojol 35 utiaʼal ka u kʼuboʼob tiʼ le apóstoloʼoboʼ.+ Letiʼob túuneʼ ku tʼoxkoʼob tiʼ cada juntúul según bukaʼaj kʼaʼabéettiʼ.+ 36 Lelaʼ bey úuchik u beetik José, juntúul levita sijnáal tu islail Chipre, letiʼeʼ tsʼaʼab u kʼaabaʼt Bernabé+ tumen le apóstoloʼoboʼ (le kʼaabaʼaʼ u kʼáat u yaʼaleʼ ku kiʼimakkúuntik u yóol máak).* 37 Joséeʼ tu konaj le terreno yaan kaʼach tiʼoʼ ka tu taasaj u taakʼinileʼ ka tu kʼubaj tiʼ le apóstoloʼoboʼ.+