Romanos

11 Kin kʼáatik túun lelaʼ: ¿Máasaʼ Dioseʼ maʼ tu xúumpʼattaj u kaajaliʼ?+ ¡Jach u jaajileʼ maʼ! Tumen tak teen israelitaen; teneʼ tiʼ u paalaloʼob Benjamín in taal, letiʼobeʼ táakpajaʼanoʼob ichil u paalal Abrahán. 2 U jaajileʼ Dioseʼ maʼ tu xúumpʼattaj u kaajaliʼ, le kaaj tu yáax kʼaj óoltoʼ.+ ¿Maʼ wa a wojleʼex le baʼax ku yaʼalik u Tʼaan Dios yoʼolal Elías le ka tʼaanaj tu táan Dios tu contra le israelitaʼoboʼ? Elíaseʼ tu yaʼalaj: 3 «Jéeoba, tsʼoʼok u kíimskoʼob a profetaʼob yéetel tsʼoʼok u jenikoʼob a altaroʼob; tsʼoʼoleʼ chéen teen pʼaatlen yéetel beoraaʼ taak u kíimskenoʼob».+ 4 Chéen baʼaleʼ, ¿baʼax núukaʼabtiʼ tumen Dios? Núukaʼabtiʼ: «Teneʼ tsʼoʼok in wilik láayliʼ yaan 7,000 máakoʼob maʼ xolakoʼob tu táan Baaliʼ».+ 5 Teʼ kʼiinoʼob xanaʼ yaan junjaats tiʼ u kajnáaliloʼob Israel+ yéeyaʼaboʼob tu yoʼolal u nojoch utsil Dios. 6 Chéen baʼaleʼ wa yéeyaʼaboʼob tu yoʼolal u nojoch utsil Dioseʼ+ u kʼáat u yaʼaleʼ maʼ yéeyaʼaboʼob yoʼolal le baʼaxoʼob tu beetoʼoboʼ,+ tumen wa beyoʼ le nojoch utsiloʼ yaan u pʼáatal maʼ nojoch utsiliʼ.

7 ¿Baʼax túun ken k-aʼale? Le baʼax tu jach tsʼáaj u yóol u kaxt u kaajil Israeleʼ maʼ tsʼaʼabtiʼiʼ, baʼaxeʼ tsʼaʼab tiʼ le máaxoʼob yéeyaʼaboʼoboʼ.+ Le u maasiloʼob túunoʼ chichchaj u puksiʼikʼaloʼob;+ 8 jeʼex tsʼíibtaʼanilaʼ: «Dioseʼ tsʼoʼok u beetik u pʼáatloʼob jeʼex le máaxoʼob jach tʼuubul u weenloʼoboʼ;+ tsʼoʼoleʼ tu tsʼáaj xan tiʼob ichoʼob maʼ tu yilkoʼob mix baʼal yéetel xiknoʼob maʼ tu yuʼubikoʼob mix baʼal tak teʼ kʼiinoʼobaʼ».+ 9 David xaneʼ ku yaʼalik: «U fiestaʼobeʼ* ka pʼáatak bey junpʼéel trampaeʼ, bey junpʼéel u tuunichil tʼóochpajleʼ yéetel bey junpʼéel castigo utiaʼaloʼobeʼ; 10 ka lukʼuk u sáasilil u yichoʼob utiaʼal maʼ u paakatoʼob yéetel beet xan u wúutsʼul u paachoʼob utiaʼal mantatsʼ».+

11 Le oʼolaleʼ kin kʼáatik: le ka tʼóochpaj le israelitaʼoboʼ, ¿lúuboʼob wa tak ka pʼáatak maʼ tu páajtal u líikʼloʼob? ¡Jach junpuliʼ maʼ! Chéen baʼaleʼ tumen maʼ tu tsʼoʼokbesoʼob le baʼax ku yaʼalik le leyoʼ yaan u salvartaʼal le j-táanxel luʼumiloʼoboʼ, lelaʼ utiaʼal ka beetaʼak u kʼuuxiloʼob.*+ 12 Bey túunoʼ wa ku taasik utsil tiʼ le yóokʼol kaab le úuchik maʼ u tsʼoʼokbeskoʼob le leyoʼ, yéetel wa ku taasik utsil tiʼ le j-táanxel luʼumiloʼob le úuchik u junpʼíittaloʼoboʼ,+ ¡bukaʼaj túun maas utsil jeʼel u taaskoʼob tu chúukaʼaniloʼobeʼ!

13 Beora túunaʼ táan in tʼaan ta wéeteleʼex, teʼex táanxel luʼumil a taaleʼex. Tumen túuxtaʼaben bey juntúul apóstol teʼ táanxel luʼumoʼoboʼ+ teneʼ kin weʼesik nojoch baʼal in wilik le meyaj kin beetkoʼ.+ 14 Yéetel leloʼ kin wilik wa jeʼel u yaatal u yóol* in wéet luʼumiloʼob utiaʼal ka u salvartuba jujuntúul tiʼ letiʼobeʼ. 15 Tumen wa le úuchik u xúumpʼattaʼal le israelitaʼob+ ku beetik u kaʼa biskuba tuláakal máak yéetel Diosoʼ, ¿baʼax túun u kʼáat u yaʼal u kaʼa kʼaʼamloʼob? Lelaʼ u kʼáat u yaʼaleʼ bey ka líiʼsaʼakoʼob ichil le kimenoʼoboʼ. 16 Tsʼoʼoleʼ wa santo le u yáax jaats tiʼ le juuchʼ ku chʼaʼabloʼ santo xan tuláakal le juuchʼoʼ; wa santo u moots le cheʼoʼ santo xan u kʼaboʼob.

17 Chéen baʼaleʼ wa kúulchʼaktaʼab jujunpʼéel tiʼ u kʼaboʼob, yéetel techeʼ kex kʼáaxil olivoecheʼ injertartaʼabech* tu jeeloʼob yéetel tsʼoʼok a poloktal yéetel u yiits ku taal tiʼ u mootsoʼ, 18 maʼ a taaskaba nojbaʼalil tu yóokʼol le kʼaboʼob kúulchʼaktaʼaboʼoboʼ. Wa ka taaskaba nojbaʼalil tu yóokʼoloʼobeʼ+ kʼaʼajaktecheʼ maʼ teech tséentik u moots le cheʼoʼ, baʼaxeʼ letiʼe moots tséentikechoʼ. 19 Techeʼ jeʼel wal a waʼalikeʼ: «Jujunpʼéel tiʼ le kʼaboʼoboʼ kúulchʼaktaʼaboʼob utiaʼal ka injertartaʼaken tu jeeloʼob».+ 20 ¡Jaaj a tʼaan! Tumen minaʼan u fejoʼobeʼ kúulchʼaktaʼaboʼob,+ chéen baʼaleʼ techeʼ yoʼolal a fejeʼ tiʼ yanechiʼ.+ Maʼ a taaskaba nojbaʼalil, baʼaxeʼ chʼaʼ saajkil. 21 Tumen wa Dios maʼ tu chaʼaj u pʼáatal u jach jéejekʼal le cheʼoʼ mix teech ken u chaʼa a pʼáatliʼ. 22 Le oʼolaleʼ, ilawile, Dioseʼ ku yeʼesik u yutsil,+ chéen baʼaleʼ ku yeʼesik xan u pʼujaʼanil. Tiʼ le máaxoʼob náachchajoʼoboʼ ku yeʼesik u pʼujaʼanil,+ chéen baʼaleʼ tiʼ techeʼ, wa ka pʼáatal tiʼ u yutsileʼ yaan u yeʼesiktech u yutsil; wa maʼeʼ yaan xan a kúulchʼaktaʼal. 23 Tak letiʼobeʼ, wa ku kaʼa antal u fejoʼobeʼ yaan u kaʼa injertartaʼaloʼobiʼ,+ tumen Dioseʼ jeʼel u páajtal u kaʼa takʼkoʼobeʼ. 24 Tumen wa teech kúulchʼaktaʼabech tiʼ junkúul kʼáaxil olivo, tsʼoʼoleʼ kex maʼ suukaʼan u beetaʼaleʼ, injertartaʼabech tiʼ junkúul olivo yaan teʼ parcelaoʼ, ¿maʼ wa túun maas jeʼel u kaʼa injertartaʼal le u jach jéejekʼal le olivo teʼ tuʼux kúulchʼaktaʼaboʼ?

25 Sukuʼuneʼex, teneʼ maʼ in kʼáat ka a tukleʼex wa jach táaj yaan a naʼateʼex ka tak pʼáatak maʼ a chʼaʼikeʼex en cuenta le baʼax taʼakaʼan+ tumen Diosaʼ: junjaats tiʼ u kaajil Israeleʼ tsʼoʼok u chichtal u puksiʼikʼaloʼob, lelaʼ bey kun pʼáatal tak ken okok tuláakal le jaytúul j-táanxel luʼumiloʼob yéeyaʼanoʼob tumen Diosoʼ, 26 utiaʼal beyoʼ ka u salvartuba tuláakal u kaajil Israel.+ Jeʼex tsʼíibtaʼanilaʼ: «Le salvadoroʼ tu kaajil Sión+ kun jóokʼol yéetel yaan u beetik u xuʼulul u beetaʼal baʼaloʼob kʼaastak tumen u paalal Jacob. 27 Lelaʼ letiʼe pacto ken in béeykunt tu yéeteloʼob+ le kéen in luʼs u kʼebanoʼoboʼ».+ 28 U jaajileʼ letiʼobeʼ maʼ kʼaʼamoʼob tumen Diosiʼ tumen maʼ tu yóotaj u yuʼuboʼob le jatsʼuts baʼaloʼob tsikbaltaʼaboʼ, ka tsʼoʼokeʼ teʼex jóoʼs u yutsil leloʼ. Pero Dioseʼ tu yéeyaj jujuntúul tiʼ letiʼob utiaʼal ka u bisuba tu yéeteloʼob, lelaʼ tu beetaj yoʼolal le baʼax u yaʼalmaj tiʼ u yúuchben láakʼtsiloʼoboʼ.+ 29 Tumen Dioseʼ maʼatech u yaatal u yóol kéen tsʼoʼokok u síik wa baʼax, mix kéen tsʼoʼokok u yéeyik wa máax. 30 Teʼexeʼ maʼatech a wuʼuyikeʼex u tʼaan Dios kaʼachi,+ chéen baʼaleʼ beoraaʼ Dioseʼ ku chʼaʼikteʼex óotsilil+ tumen maʼ tu yuʼubik tʼaan le judíoʼoboʼ.+ 31 Bey túun xanoʼ úuchik u chʼaʼikteʼex óotsilil Dios tumen maʼ tu yuʼubik tʼaan le judíoʼoboʼ, beoraaʼ jeʼel u páajtal xan u chʼaʼabal óotsilil tiʼ letiʼobeʼ. 32 Tumen Dioseʼ tu chaʼaj u pʼáatal tuláakal máak bey esclavoil tiʼ le x-maʼ uʼuyajtʼaaniloʼ+ utiaʼal beyoʼ ka páajchajak u yeʼesik u chʼaʼ óotsilal tiʼ tuláakal máak.+

33 ¡Bukaʼaj baʼaloʼob maʼalobtak ku taal tiʼ Dios, yéetel bukaʼaj taamil u naʼat bey xan u kʼaj óolal! ¡Maʼ tu páajtal u chʼaʼnuʼuktaʼal le baʼaxoʼob ku tuklik u beetkoʼ mix u xakʼaltaʼal u beeloʼob! 34 Tumen «¿máax tsʼoʼok u kʼuchul u kʼaj óolt u tuukul Jéeoba wa máax tsʼoʼok u tsolik u xikin?».+ 35 Wa «¿máax tsʼoʼok u yáax tsʼáaik wa baʼax tiʼ Dios utiaʼal ka kʼaʼabéetchajak u boʼotaʼaltiʼ?».+ 36 Tumen tiʼ letiʼ u taal tuláakal baʼal, tu yoʼolal letiʼ yanoʼob yéetel letiʼ láaj tiaʼalintikoʼob. Letiʼ ka alabartaʼak utiaʼal mantatsʼ. Ka béeyak.*