1 Corintios
3 Bey túunoʼ, sukuʼuneʼex, maʼ béeychaj in tʼankeʼex jeʼex u tʼaʼanal máakoʼob nuʼuktaʼanoʼob tumen u espíritu santo Dioseʼ,+ baʼaxeʼ jeʼex u tʼaʼanal máakoʼob ku nuʼuktaʼaloʼob tumen u tsʼíibolaloʼobeʼ, bey xan jeʼex u tʼaʼanal máakoʼob beyoʼob mejen paalal+ tiʼ baʼaloʼob yaan yil yéetel Cristoeʼ. 2 Teneʼ tin tséenteʼex yéetel leche, maʼ yéetel chichich janaliʼ, tumen maʼ tu páajtal kaʼach a jaachʼeʼex. U jaajileʼ, tak beora maʼ tu páajtal a jachʼkeʼex chichich janalaʼ,+ 3 tumen láayliʼ táan a nuʼuktaʼaleʼex tumen a tsʼíibolaleʼexeʼ.+ Tumen ka tsʼíikileʼex* yéetel ka baʼateleʼexeʼ, leloʼ ¿maʼ wa ku yeʼesikeʼ láayliʼ táan a nuʼuktaʼaleʼex tumen a tsʼíibolaleʼex+ yéetel táan a kuxtaleʼex jeʼex u maasil máakoʼoboʼ? 4 Tumen kéen u yaʼal wa máax: «Teneʼ u discípuloen Pablo», yéetel kéen aʼalaʼak tumen uláakʼ: «Teneʼ u discípuloen Apolos»,+ ¿maʼ wa táan a beetkabaʼex jeʼex u maasil máakoʼoboʼ?
5 Tumen ¿máax Apolos? Wa ¿máax Pablo? Letiʼobeʼ chéen meyajnajoʼob+ utiaʼal ka kʼuchuk a beetabaʼex u discípulo Jesús, jeʼex tsʼaʼabik u páajtalil tiʼ cada juntúul tiʼ letiʼob tumen Yuumtsileʼ. 6 Teen pakʼe,+ Apolos jóoyabte,+ chéen baʼaleʼ Dios beet u nojochtal. 7 Bey túunoʼ le máax ku paakʼal yéetel le máax ku jóoyaboʼ maʼ unaj u alabartaʼaliʼ, baʼaxeʼ chéen Dios tumen letiʼ beetik u nojochtal.+ 8 Le máax túun ku paakʼal yéetel le ku jóoyaboʼ ku múul meyajoʼob,* chéen baʼaleʼ cada juntúuleʼ yaan u kʼamik u boʼolil yoʼolal le meyaj tu beetoʼ.+ 9 Tumen toʼoneʼ u yéet meyajoʼon Dios. Teʼex le luʼum ku meyajtaʼal tumen Diosoʼ; teʼexeʼ junpʼéel naj tsʼoʼok u líiʼsaʼal tumen Dios.+
10 Yoʼolal le u nojoch utsil Dios tsʼaʼabtenoʼ, teneʼ tin tsʼáaj junpʼéel cimiento+ jeʼex u beetik juntúul máak yaan u naʼat ku nuʼuktik u líiʼsaʼal junpʼéel najeʼ, chéen baʼaleʼ yaan uláakʼ máax táan u meyaj tu yóokʼol le cimientoaʼ. Cada juntúul túuneʼ unaj u seguer u kanáantik bix u meyaj tu yóokʼol le cimientoaʼ. 11 Tumen mix máak jeʼel u páajtal u tsʼáaik uláakʼ cimiento utiaʼal u jeelintik le yáax tsʼaʼanoʼ, le cimientoaʼ Jesucristo.+ 12 Chéen baʼaleʼ wa yóokʼol le cimiento yaan máax ku líiʼsik junpʼéel naj yéetel oro, plata, kiʼichkelem tuunichoʼob, wa yéetel cheʼ, suʼuk, bey xan wa yéetel chʼiliboʼobeʼ, 13 le meyaj ku beetik cada juntúuloʼ yaan u chíikpajal baʼax clase meyajil. Tumen le kéen kʼuchuk le kʼiinoʼ yaan u tsʼaʼabal a pruebail tumen le kʼáakʼoʼ,+ le kʼáakʼ túunoʼ yaan u yeʼesik baʼax clase najil tu beetaj cada juntúul. 14 Wa maʼ tu yelel le meyaj u beetmaj wa máax yóokʼol le cimientooʼ, le máakaʼ yaan u kʼamik u boʼolil. 15 Chéen baʼaleʼ wa le meyaj u beetmaj wa máax ku láaj eleloʼ yaan u láaj perdertik, pero letiʼeʼ yaan u salvarkuba; wa ku yúuchul lelaʼ letiʼeʼ yaan u púutsʼul tiʼ le kʼáakʼoʼ.
16 ¿Maʼ wa a wojleʼexeʼ u temploʼex Dios+ yéetel tiʼ yaan u espíritu santo Dios ichileʼexeʼ?+ 17 Wa juntúul máak ku xuʼulsik u templo Dioseʼ, Dioseʼ yaan u xuʼulsik tiʼ le máakaʼ; tumen u templo Dioseʼ santo, yéetel le temploaʼ teʼex.+
18 Mix máak ka u tusuba tu juunal: wa yaan máax ichileʼex ku tuklik yaan u naʼat tu táan u máakiloʼob le yóokʼol kaabaʼ,* u beetuba j-maʼ naʼatil utiaʼal ka yanak u naʼat. 19 Tumen le naʼat ku taal tiʼ le yóokʼol kaabaʼ mix baʼal u biilal tu táan Dios, tumen tsʼíibtaʼan: «Le baʼax ku tuklik u beetik le kʼasaʼan máakoʼ, ku beetaʼal u suut tu yóokʼol tumen Dios».+ 20 Tsʼoʼoleʼ tsʼíibtaʼan xan: «Jéeobaeʼ u yojel chéen kunel le baʼaxoʼob ku tuklik le máakoʼob yaan u naʼatoʼoboʼ».+ 21 Le oʼolaleʼ, mix máak ka u nojbaʼalkúuntuba tu yoʼolal le máakoʼoboʼ tumen tuláakal baʼaleʼ a tiaʼaleʼex, 22 wa Pablo, wa Apolos, wa Cefas,*+ wa le yóokʼol kaaboʼ, wa le kuxtaloʼ, wa le kíimiloʼ, wa le baʼaxoʼob yanoʼob bejlaʼoʼ, wa le baʼaxoʼob ku taal u kʼiinoʼ, tuláakal a tiaʼaleʼex; 23 chéen baʼaleʼ teʼexeʼ u tiaʼaleʼex Cristo,+ yéetel Cristoeʼ u tiaʼal Dios.