Apocalipsis

14 Tsʼoʼoleʼ paakatnajeneʼ ka tin wilaj le Taman+ waʼalakbal teʼ Montaña Siónoʼ,+ tu yéeteleʼ yaan 144,000 máakoʼob.+ Tu táanpoolal le máakoʼobaʼ tsʼíibtaʼan u kʼaabaʼ le Tamanoʼ bey xan u kʼaabaʼ u Taata.+ 2 Ka tin wuʼuyaj u juum junpʼéel baʼal teʼ kaʼanoʼ, jeʼex u juum yaʼab jaʼeʼ yéetel jeʼex u juum u kíilbal cháakeʼ. Le baʼax tin wuʼuyoʼ bey jeʼex u juum u kʼaay máakoʼob táan u paxik u arpaʼobeʼ. 3 Le baʼax ku kʼaykoʼob tu táan le trono, tu táan le kantúul querubínoʼob+ bey xan tu táan le ancianoʼoboʼ+ bey junpʼéel túumben kʼaayeʼ.+ Le kʼaayaʼ mix máak páajchaj u kanik, chéen le 144,000 máakoʼob+ maʼanoʼob teʼ luʼumaʼ. 4 Letiʼobeʼ maʼ núupkʼebanchajoʼob* yéetel koʼoleloʼobiʼ, u jaajileʼ mix juntéen yanchaj baʼal u yiloʼob yéetel mix juntúul koʼolel.+ Ku binoʼob tu paach le Taman jeʼel tuʼuxak ka xiʼikoʼ.+ Maʼanoʼob+ ichil le wíinikoʼob utiaʼal ka kʼuʼubkoʼob tiʼ Dios yéetel tiʼ le Taman bey jeʼex le yáax ich+ ku tsʼáaik le paakʼaloʼoboʼ. 5 Tu chiʼob xaneʼ maʼ jóokʼ mix junpʼéel tuusiʼ, jach maʼalob yaniloʼob.+

6 Teneʼ tin wilaj uláakʼ juntúul ángel táan u xikʼnal chúumuk tiʼ le kaʼanoʼ. Letiʼeʼ táan u tsʼáaik ojéeltbil le maʼalob baʼaloʼob ku taal tiʼ Diosoʼ, le jatsʼuts baʼaloʼob minaʼan xuʼulultiʼoboʼ. Lelaʼ táan u tsʼáaik u yojéelt u kajnáaliloʼob luʼum: tiʼ tuláakal luʼumoʼob, tribuʼob, idiomaʼob yéetel kaajoʼob.+ 7 Le ángelaʼ táan kaʼach u kʼaʼam aʼalik: «Chʼaʼex saajkil tiʼ Dios yéetel alabarteʼex, tumen tsʼoʼok u kʼuchul u kʼiinil le juicio ken u beetoʼ.+ Le oʼolaleʼ adorarteʼex le Máax beet kaʼan, luʼum, kʼáaʼnáab+ bey xan u sayabiloʼob jaʼ».

8 Tsʼoʼoleʼ tin wilaj u taal uláakʼ juntúul ángel, u kaʼatúul, táan u yaʼalik: «¡Tsʼoʼok u lúubul! ¡Tsʼoʼok u lúubul+ le Nojoch Babiloniaoʼ!,+ le máax tsʼáa u yukʼ tuláakal le luʼumoʼob le vino beet u jach taaktal u núupkʼebantaloʼoboʼ».+

9 Tu paacheʼ taal uláakʼ juntúul ángel, u yóoxtúul, táan u kʼaʼam aʼalik: «Le máax ku adorartik le tsʼíitsʼik baʼalcheʼ+ yéetel u imagenil, yéetel ku chaʼik u marcartaʼal tu táanpoolal wa tu kʼabeʼ,+ 10 yaan u beetaʼal u yukʼik xan u vinoil u pʼujaʼanil Dios, le vino maʼ júuljaʼataʼan yéetel tsʼoʼok u láalaʼal tu copail u pʼujaʼanil Diosoʼ.+ Tsʼoʼoleʼ yaan u beetaʼal u muʼyaj yéetel kʼáakʼ bey xan yéetel azufre+ tu táan le ángeloʼob santoʼoboʼ yéetel tu táan le Tamanoʼ. 11 Le baʼaxoʼob ku muʼyajtikoʼ* yaan u butsʼilankil utiaʼal kʼiinoʼob minaʼan u xuul.+ Tsʼoʼoleʼ le máaxoʼob adorartik le tsʼíitsʼik baʼalcheʼ yéetel u imagen bey xan tuláakal le máaxoʼob ku chaʼik u marcartaʼaloʼob yéetel u kʼaabaʼ le tsʼíitsʼik baʼalcheʼoʼ bul kʼiin yéetel bul áakʼab kun muʼyajoʼob.+ 12 Le oʼolal yaan u kʼaʼabéettal u chúukpajal u yóol le máaxoʼob santoʼob+ ku tsʼoʼokbeskoʼob u tʼaan Dios yéetel ku tsʼáaik u fejoʼob+ tiʼ Jesúsoʼ».

13 Ka túun tin wuʼuyaj junpʼéel tʼaan teʼ kaʼan táan u yaʼalik: «Tsʼíibte: desde bejlaʼeʼ, kiʼimak u yóol le máaxoʼob ku kíimloʼob junmúuchʼ yéetel Yuumtsiloʼ.+ Jach beyoʼ, le espíritu santooʼ ku yaʼalik ka jeʼelkoʼob tiʼ u meyajoʼob, tumen le baʼaxoʼob tu beetoʼoboʼ yaan u binoʼob tu yéeteloʼob».

14 Tsʼoʼoleʼ paakatnajeneʼ ka tin wilaj junpʼéel sak múuyal. Le máax kulukbal yóokʼol le múuyaloʼ chíikaʼan tiʼ u paal máak,+ tu pooleʼ yaan junpʼéel corona de oro yéetel tu kʼabeʼ yaan junpʼéel lóobcheʼ* jach yaan u yej.

15 Uláakʼ juntúul ángel túuneʼ jóokʼ teʼ templo* táan u kʼaʼam aʼalik tiʼ le máax kulukbal yóokʼol le múuyaloʼ: «Jup a lóobcheʼeʼ ka káajak a cosechar, tumen tsʼoʼok u kʼuchul u kʼiinil u yúuchul cosechar. Tsʼoʼok u kʼantal le baʼax kun cosecharbil teʼ luʼumoʼ».+ 16 Le máax kulukbal túun yóokʼol le múuyaloʼ, tu jupaj u lóobcheʼeʼ ka tu jochaj u yich le luʼumoʼ.

17 Uláakʼ juntúul ángeleʼ jóokʼ teʼ templo* yaan teʼ kaʼanoʼ, u machmaj xan junpʼéel lóobcheʼ jach yaan u yej.

18 Uláakʼ juntúul ángel túuneʼ jóokʼ tiʼ le altaroʼ, tiʼ letiʼeʼ tsʼaʼan páajtalil yóokʼol le kʼáakʼoʼ. Ka tu kʼaʼam aʼalaj tiʼ le ángel machmil le lóobcheʼ jach yaan u yejoʼ: «Jup a lóobcheʼ jach yaan u yejoʼ ka a xotʼ u pʼóopʼochal u yich le luʼumoʼ, tumen u yich le uvaoʼ tsʼoʼok u kʼantal».+ 19 Le ángel túunoʼ tu jupaj u lóobcheʼeʼ ka tu xotʼaj u pʼóopʼochal u uvail le luʼumoʼ, ka túun tu láalaj tu pilail u pʼujaʼanil Dios.+ 20 Bey túunoʼ, u yich le uvaoʼ pupuʼchaʼataʼab paachil tiʼ le kaajoʼ, ka jóokʼ kʼiʼikʼ tiʼ le pila tak ka kʼuch tuʼux ku náakal u freno le tsíiminoʼoboʼ. Le kʼiʼikʼoʼ tu bulaj kex 296 kilómetros* luʼum.