1 Corintios

4 Toʼoneʼ k-kʼáat ka ilaʼakoʼon tumen le máakoʼob jeʼex máakoʼob meyajtik* Cristoeʼ, yéetel bey máakoʼob tsʼaʼan u kanáantoʼob le baʼaloʼob taʼakaʼanoʼob* tumen Diosoʼ.+ 2 Baʼax ku páaʼtaʼal tiʼ le j-meyajoʼoboʼ ka u yeʼesoʼob chúukaʼan u yóol u tsʼoʼokbesoʼob le meyaj tsʼaʼantiʼoboʼ. 3 In tiaʼal teneʼ maʼ jach kʼaʼanaʼan in wilik ka a juzgarteneʼex wa ka u juzgarten juntúul jueziʼ. U jaajileʼ mix teen kin juzgarkinba tin juunal. 4 Tumen teneʼ maʼ kʼajaʼanten wa yaan baʼax kʼaas in beetmiʼ. Chéen baʼaleʼ lelaʼ maʼ u kʼáat u yaʼal wa toj in kuxtaliʼ, baʼaxeʼ Jéeoba juzgarken.+ 5 Le oʼolaleʼ maʼ a juzgarkeʼex+ mix baʼal antes tiʼ u kʼuchul u kʼiinil, baʼaxeʼ tak ken taalak le Yuumtsiloʼ. Letiʼeʼ yaan u jóoʼsik ich sáasilil le baʼax taʼakaʼan ich éeʼjochʼeʼeniloʼ, yéetel yaan u chíikbesik baʼax ku chʼaʼtuklik le máakoʼob ichil u puksiʼikʼaloʼoboʼ; bey túunoʼ Dioseʼ yaan u tsʼáaik tiʼ cada juntúul le baʼax ku náajmatikoʼ.+

6 Sukuʼuneʼex, le ka tin waʼalaj le baʼaloʼobaʼ tʼaanajen tin woʼolal yéetel tu yoʼolal Apolos+ utiaʼal a wutsileʼex, utiaʼal beyoʼ tiʼ le baʼaxoʼob t-beetoʼ ka a kaneʼex lelaʼ: «Maʼ a píitmáaneʼex tiʼ le baʼaxoʼob tsʼíibtaʼanoʼ», utiaʼal maʼ a nojbaʼalkúuntkabaʼex+ ikil a tuklikeʼex maas maʼalob juntúul máak tiʼ uláakʼ máak. 7 Tumen ¿máax beetik a jelaʼantal tiʼ uláakʼ máak? U jaajileʼ, ¿maʼ wa Dios tsʼaamiltech tuláakal le baʼaxoʼob yaantechoʼ?+ Jeʼeloʼ, wa letiʼ tsʼaamiltecheʼ, ¿baʼaxten túun ka nojbaʼalkúuntkaba bey maʼ tsʼaabil úuchik u beetaʼaltecheʼ?

8 ¿Tsʼoʼok wa u yantal tuláakal baʼax kʼaʼabéetteʼex? ¿Tsʼoʼok wa a ayikʼaltaleʼex? ¿Tsʼoʼok wa a pʼatkoʼoneʼex paachil utiaʼal u káajal a reinareʼex?+ U jaajileʼ bukaʼaj maʼalobil wa tsʼoʼok u káajal a reinareʼexeʼ utiaʼal xan ka múuchʼ reinarnakoʼon ta wéeteleʼex.+ 9 Tumen teneʼ kin wilkeʼ, toʼon le apóstoloʼoboʼ, tsʼoʼok k-tsʼaʼabal tumen Dios tu tsʼoʼokbal junpʼéel baʼal ku chaʼantaʼal, yéetel beyoʼon máakoʼob yéeyaʼanoʼob utiaʼal kíimileʼ.+ Tsʼoʼok k-kʼuchul xan k-beetba bey junpʼéel chaʼan utiaʼal le yóokʼol kaaboʼ,+ utiaʼal le ángeloʼoboʼ bey xan utiaʼal le wíinikoʼoboʼ. 10 Tu yoʼolal Cristoeʼ toʼoneʼ k-ilaʼal bey minaʼan k-naʼateʼ,+ chéen baʼaleʼ teʼexeʼ yaan a naʼateʼex tu yoʼolal Cristo. Toʼoneʼ minaʼan k-muukʼ, chéen baʼaleʼ teʼexeʼ yaan a muukʼeʼex. Ku yúuchul maʼalob tʼaan ta woʼolaleʼex, chéen baʼaleʼ toʼoneʼ k-mixbaʼalkúuntaʼal. 11 Tak beoraaʼ láayliʼ táan k-máansik wiʼijil,+ ukʼajil,+ óoliʼ x-maʼ nookʼil yaniloʼon,* táan k-jaʼajatsʼaʼal+ yéetel k-poʼopochʼaʼal, minaʼan k-otoch 12 yéetel táan k-kíimsikba meyaj.+ Le kéen poʼochʼkoʼon tumen le máakoʼoboʼ k-bendecirkoʼob,+ le kéen chʼaʼpachtaʼakoʼoneʼ ku chúukpajal k-óol k-muʼyajte,*+ 13 le kéen aʼalaʼak baʼaloʼob maʼ jaajtak t-contraeʼ k-núukik yéetel utsil.+ Tak beoraaʼ u máakiloʼob le yóokʼol kaabaʼ ku yilkoʼonoʼob bey basuraeʼ yéetel bey baʼaxoʼob maʼ kʼaʼabéettiʼobeʼ.

14 Le baʼaloʼobaʼ maʼ táan in tsʼíibtikteʼex utiaʼal in suʼlakkúuntikeʼexiʼ, baʼaxeʼ utiaʼal in tsolikteʼex u nuʼuk, tumen beyeʼex in paalaleʼ yéetel in yaabiltmeʼex. 15 Tumen kex ka yanak 10,000 máakoʼob kaʼansikteʼex baʼaloʼob yaan yil yéetel Cristoeʼ, u jaajileʼ maʼ yaʼab a taataʼex yaniʼ. Tu yoʼolal Cristoeʼ teneʼ tsʼoʼok in kʼuchul in beetinba a taataʼex úuchik in tsikbaltikteʼex le jatsʼuts baʼaloʼob ku taal tiʼ Diosoʼ.+ 16 Le oʼolaleʼ kin kʼáat óoltikteʼex: beeteʼex jeʼex in beetkoʼ.+ 17 Le beetkeʼ táan in túuxtik Timoteo ta wiknaleʼex tumen letiʼeʼ in paal, jach in yaabiltmaj yéetel jach chúukaʼan u yóol tiʼ Yuumtsil. Letiʼeʼ yaan u kʼaʼajsikteʼex bix in tsʼoʼokbesik le meyaj tu kʼubéentajten Cristo Jesúsoʼ,+ jeʼex in kaʼansik tuláakal tuʼux tiʼ tuláakal múuchʼulileʼ.

18 Yaan jujuntúul tiʼ teʼexeʼ ku nojbaʼalkúuntkubaʼob tumen ku tuklikoʼobeʼ maʼ kin bin ta wiknaleʼex. 19 Chéen baʼaleʼ wa Jéeoba u kʼáateʼ, maʼ kun xáantaleʼ yaan in bin ta wiknaleʼex. Maʼ táan in bin utiaʼal ka in wojéelt baʼax ku yaʼalik le máaxoʼob ku nojbaʼalkúuntkubaʼoboʼ, baʼaxeʼ utiaʼal ka in wojéelt wa táan u nuʼuktaʼaloʼob tumen u páajtalil Dios wa maʼ. 20 Tumen le baʼax eʼesik táan k-nuʼuktaʼal tumen u Reino Dioseʼ maʼ letiʼe baʼaxoʼob k-aʼalikoʼ, baʼaxeʼ letiʼe baʼaxoʼob k-beetkoʼ tumen ku yeʼeskoʼob yaantoʼon u poder Dios. 21 ¿Baʼax túun a kʼáateʼex? ¿Ka xiʼiken ta wiknaleʼex yéetel junpʼéel u cheʼil jaatsʼ,+ wa ka xiʼiken yéetel yaabilaj bey xan yéetel jeetsʼel óolal?