1 Corintios

12 Beoraaʼ, sukuʼuneʼex, teneʼ in kʼáat ka a wojéelteʼex le baʼaxoʼob ku páajtal u beetik máak yéetel u yáantaj le espíritu santooʼ.+ 2 Teʼexeʼ a wojleʼexeʼ le maʼatech a creerkeʼex Dios kaʼachoʼ ka adorarkeʼex imagenoʼob maʼ tu páajtal u tʼaanoʼob yéetel ka bineʼex kaʼach jeʼel tuʼuxak ka u biseʼex le imagenoʼoboʼ.+ 3 Le oʼolal in kʼáat ka a wojéelteʼexeʼ le máax nuʼuktaʼan tumen u espíritu santo Dioseʼ junpuliʼ maʼatech u yaʼalik: «¡Jesúseʼ juntúul kʼasaʼan máak!»; tsʼoʼoleʼ mix máak jeʼel u yaʼalik: «¡Jesúseʼ Yuumtsil!», chéen jaʼaliʼ wa yaan espíritu santo tiʼeʼ.+

4 U jaajileʼ jejeláas páajtalil* jeʼel u tsʼaʼabal tiʼ máak tumen u espíritu santo Dioseʼ.+ 5 Yéetel yaan xan jejeláas meyajoʼob kʼubéentaʼantoʼon,+ chéen baʼaleʼ chéen juntúuliliʼ Yuumtsil yaan; 6 yaan jejeláas baʼaloʼob jeʼel u páajtal u beetik máakeʼ, chéen baʼaleʼ chéen juntúuliliʼ Dios tsʼáaik tiʼ máak u páajtalil u beetik.+ 7 Tsʼoʼoleʼ le kéen u péeks máak le espíritu santo u beet wa baʼaxoʼ ku beetik utiaʼal junpʼéel baʼax maʼalob.+ 8 Le espíritu santooʼ ku péeksik juntúul máak utiaʼal ka tʼaanak yéetel naʼat, yéetel láayliʼ letiʼe espíritu santo péeksik xan uláakʼ juntúul máak utiaʼal ka tʼaanak yéetel ojéelaloʼ. 9 Tiʼ uláakʼ juntúul máakeʼ le espíritu santooʼ ku tsʼáaik fe,+ yéetel láayliʼ letiʼe espíritu santo tsʼáaik xan tiʼ uláakʼ juntúul máak u páajtalil u tsʼakik kʼojaʼanoʼoboʼ.+ 10 Tiʼ uláakʼ juntúul máakeʼ ku tsʼáaik u páajtalil u beetik milagroʼob,+ tiʼ uláakʼeʼ u profetizar, tiʼ uláakʼeʼ u naʼatik le baʼaxoʼob ku yaʼalaʼaloʼ kex tiʼ Dios u taal wa maʼ;+ tiʼ uláakʼ juntúul xaneʼ u tʼaan ichil jejeláas idiomaʼob+ yéetel tiʼ uláakʼeʼ u tsolik baʼax ku yaʼalaʼal ichil le jejeláas idiomaʼoboʼ.+ 11 Chéen baʼaleʼ letiʼe espíritu santo péeksik máak u beet tuláakal le baʼaloʼobaʼ; le baʼax u kʼáat le espíritu santooʼ letiʼe baʼax ku tsʼáaik tiʼ cada juntúuloʼ.

12 U wíinklil máakeʼ yaʼab partes yaantiʼ, chéen baʼaleʼ kex yaʼab u partesileʼ chéen junpʼéeliliʼ wíinklil,+ lelaʼ bey xan u yúuchul yéetel Cristooʼ. 13 Tumen u jaajileʼ, jeʼex úuchik k-piʼixil yéetel jaʼ le ka okjaʼanajoʼonoʼ bey úuchik k-piʼixil yéetel junpʼéeliliʼ espíritu santo utiaʼal ka táakpajkoʼon tiʼ junpʼéeliliʼ wíinklil, kex judíoʼon wa griegoʼon, kex esclavoʼon wa maʼ esclavoʼon; yéetel tuláakloʼoneʼ t-kʼamaj le junpʼéeliliʼ espíritu santooʼ.

14 Tumen u jaajileʼ le wíinkliloʼ maʼ chéen junpʼéel parte yaantiʼiʼ, baʼaxeʼ yaʼab.+ 15 Wa u yook máak ka u yaʼal: «Tumen maʼ kʼabeneʼ maʼ táakpajaʼanen tiʼ le wíinkliloʼ», maʼ yoʼolal leloʼ ku xuʼulul u táakpajal tiʼ le wíinkliloʼ. 16 Wa u xikin máak ka u yaʼal: «Tumen maʼ icheneʼ maʼ táakpajaʼanen tiʼ le wíinkliloʼ», maʼ tu yoʼolal leloʼ ku xuʼulul u táakpajal tiʼ le wíinkliloʼ. 17 Tumen wa tuláakal le wíinklil ichoʼ, ¿bix jeʼel u páajtal u chʼenxikineʼ? Tsʼoʼoleʼ wa tuláakal le wíinklil xikinoʼ, ¿bix jeʼel u páajtal u yuʼubik u book wa baʼaxeʼ? 18 Le oʼolaleʼ Dioseʼ tsʼoʼok u tsʼáaik cada parte tiʼ u wíinklil máak jeʼex tu yóotilakeʼ.

19 Wa juntakáaliliʼ tuláakal u partesil le wíinkliloʼ, leloʼ maʼ junpʼéel wíinkliliʼ. 20 Le oʼolaleʼ le wíinkliloʼ jejeláas partes yaantiʼ. 21 Le ichoʼ maʼ tu páajtal u yaʼalik tiʼ le kʼaboʼ: «Maʼ kʼaʼabéetech teniʼ»; wa, le pooloʼ maʼ tu páajtal u yaʼalik xan tiʼ le ookoʼoboʼ: «Maʼ kʼaʼabéeteʼex teniʼ». 22 Maʼ, baʼaxeʼ le u partesil le wíinklil ku yilaʼal bey maas minaʼan u muukʼoʼoboʼ, u jaajileʼ kʼaʼabéetoʼob. 23 Le u partesil le wíinklil xan k-tuklik maʼ jach jatsʼutstakoʼoboʼ maas k-beetik u cuentailoʼob,+ bey túunoʼ le u partesil k-wíinklil suʼtsil u yeʼesaʼaloʼoboʼ maas k-kanáantkoʼob. 24 Pero le u partesil k-wíinklil jatsʼutstakoʼoboʼ mix baʼal kʼaʼabéettiʼob. Chéen baʼaleʼ Dioseʼ bey tu beetil le wíinkliloʼ, tu beetaj utiaʼal u maas kanáantaʼal le u partesil le wíinklil maʼ jach jatsʼutstakoʼoboʼ, 25 utiaʼal beyoʼ maʼ u meyaj chéen junpʼéel parte tiʼ le wíinkliloʼ, baʼaxeʼ le u partesil le wíinkliloʼ ka u paklan kanáantubaʼob.+ 26 Wa junpʼéel parte tiʼ le wíinklil ku muʼyajoʼ tuláakal u maasileʼ ku muʼyajoʼob tu yéetel;+ wa junpʼéel parte ku nojbaʼalkúuntaʼaleʼ tuláakal le u maasiloʼ ku kiʼimaktal u yóoloʼob tu yéetel.+

27 Bey túun xanoʼ, teʼexeʼ, u wíinklileʼex Cristo,+ yéetel cada juntúul tiʼ teʼexeʼ junpʼéel parte tiʼ le wíinkliloʼ.+ 28 Dios xaneʼ u tsʼaamaj jejeláas máakoʼob ichil le múuchʼuliloʼ: yáaxeʼ apóstoloʼob,+ u kaʼapʼéeleʼ profetaʼob,+ u yóoxpʼéeleʼ máakoʼob ku kaʼansajoʼob,+ tsʼoʼoleʼ máaxoʼob ku beetkoʼob milagroʼob,+ máaxoʼob ku tsʼakikoʼob kʼojaʼanoʼob,+ máaxoʼob ku yáantkoʼob u maasil máakoʼob, máaxoʼob u yojloʼob nuʼuktaj+ yéetel máaxoʼob tsʼaʼantiʼob u páajtalil u tʼaanoʼob ichil uláakʼ idiomaʼob.+ 29 Maʼ tuláakloʼob apóstoloʼobiʼ, ¿máasaʼ? Maʼ tuláakloʼob profetaʼobiʼ, ¿máasaʼ? Maʼ tuláakloʼob ku kaʼansajoʼobiʼ, ¿máasaʼ? Maʼ tuláakloʼob ku beetkoʼob milagroʼobiʼ, ¿máasaʼ? 30 Maʼ tuláakloʼob ku tsʼakikoʼob kʼojaʼanoʼobiʼ, ¿máasaʼ? Maʼ tuláakloʼob ku tʼaanoʼob ich jejeláas idiomaʼobiʼ, ¿máasaʼ?+ Maʼ tuláakloʼob ku sutkoʼob ichil uláakʼ idioma le baʼax ku yaʼalaʼaloʼ,* ¿máasaʼ?+ 31 Chéen baʼaleʼ maʼ u xuʼulul a tsʼáaik a wóoleʼex utiaʼal ka tsʼaʼabakteʼex baʼaloʼob maas nuuktak.+ Kex beyoʼ teneʼ yaan in weʼesikteʼex junpʼéel bej maas maʼalob.+