Salmos
Utiaʼal máax ku nuʼuktaj: unaj u paʼaxal jeʼex le kʼaay ku kʼaabaʼtik «U kéejil u taal u sáastal».* Le kʼaayaʼ David tsʼíibte.
22 In Dios, in Dios, ¿baʼaxten tsʼoʼok a pʼatken?+
¿Baʼaxten maʼ ta taal a salvarten?
¿Baʼaxten maʼ ta wuʼuyik in kʼáatiktech áantaj tu kʼiinil táan in muʼyaj?+
2 In Dios, bul kʼiin yéetel bul áakʼab
táan in tʼankech, pero maʼ ta núukik.+
3 Techeʼ santoech,+
tiaʼanech tu chúumuk u kaajil Israeleʼ, letiʼobeʼ táan u alabarkechoʼob.
4 K-papáʼobeʼ tiʼ teech tu kʼubaj u yóoloʼob,+
tu kʼubaj u yóoloʼob tiʼ teech, le oʼolal mantatsʼ ta salvartoʼob.+
5 Ta salvartoʼob tumen tiʼ teech tu kʼáatoʼob áantaj.
Tumen tu kʼubaj u yóoloʼob tiʼ techeʼ, maʼ ta pʼatoʼob kʼaasiliʼ.+
6 Pero teneʼ chéen juntúul x-nookʼolen, maʼ juntúul máakeniʼ,
ku yaʼalaʼalten baʼal tumen le máakoʼoboʼ, tsʼoʼoleʼ pʼektaʼanen tumen le kaajoʼ.+
7 Tuláakal máax ilkeneʼ ku burlarken,+
ku taaskenoʼob mix baʼalil yéetel ku piʼikʼtik u pooloʼob+ táan u yaʼalikoʼob:
8 «Tu kʼubéentuba tiʼ Jéeoba. ¡Salvartaʼak tumen letiʼ!
¡Tumen jach yaabiltaʼaneʼ, salvartaʼak túun tumen letiʼ!».+
9 Teech jóoʼsen tu nakʼ in maama,+
Teech beet in wuʼuyik kanáantaʼanen tu kʼiiniloʼob táan u tsʼaʼabal in chuʼuch.
10 Desde ka síijeneʼ pʼaʼaten ta kʼab utiaʼal a kanáantken,
desde tiaʼanen ichil u nakʼ in maamaeʼ, teech in Dios.
11 Maʼ a pʼáatal náach tiʼ teen, tumen le problemasoʼ naatsʼ yaniloʼob,+
mix máak uláakʼ jeʼel u yáantkeneʼ.+
12 Baʼpachtaʼanen tumen yaʼab táankelem toroʼob,+
baʼpachtaʼanen tumen nukuch toroʼob ku taaloʼob tu luʼumil Basán.+
13 Ku japik u chiʼob tin contra,+
beyoʼob juntúul tsʼíitsʼik león ku xeʼexetʼik baʼax ku lúubul tu kʼabeʼ.+
14 Beyen jaʼ tsʼoʼok u wéekchʼintaʼaleʼ.
Láaj juukʼul in baakeloʼob.
15 Tsʼoʼok in tijil, beyen junxéetʼ kʼat tsʼoʼok u tijleʼ,+
in waakʼeʼ ku táakʼal ichil in chiʼ,+
jach taʼaytak in kíimil.+
16 Baʼpachtaʼanen tumen junmúuchʼ kʼasaʼan máakoʼob,+
u baʼpachtmenoʼob jeʼex u beetik le peekʼoʼoboʼ.+
Jeʼex u beetik juntúul leóneʼ ku pulkuba u náachoʼob in kʼaboʼob yéetel in wookoʼob.+
17 Chíikaʼan u yilaʼal in baakeloʼob.*+
Le máaxoʼob pʼekmilenoʼ chéen táan u jach paktikenoʼob.
19 Jéeoba Dios, maʼ a pʼáatal náach tiʼ teen.+
Teech tsʼáaikten muukʼ, koʼoten tu séebaʼanil a wáanten.+
20 Salvarten tiʼ le espadaoʼ,
salvart in kuxtaliʼ tumen jach chéen le yaanten, maʼ a pʼatken tu kʼab le peekʼoʼoboʼ.+
21 Salvarten tiʼ u chiʼ le leónoʼ+
bey xan tiʼ u baak le nukuch wakaxoʼoboʼ.* Núuk in oración, salvarteniʼ.
22 Yaan in waʼalik a kʼaabaʼ utiaʼal u yuʼub in sukuʼunoʼob,+
yaan in alabarkech kéen in muchʼinba yéetel le máaxoʼob adorarkechoʼ.+
23 ¡Teʼex ka adorarkeʼex* Jéeobaeʼ, alabarteʼex!
¡Teʼex u paalaleʼex Jacobeʼ, alabarteʼex!+
Teʼex u paalaleʼex Israeleʼ, chinleneʼex tu táan.
24 Letiʼeʼ maʼatech u mutsʼik u yich kéen u yil táan u muʼyaj máak,+
maʼatech u taʼakikuba tiʼ máak.+
Kéen kʼáataʼak áantaj tiʼeʼ, ku yuʼubik.+
25 Yaan in alabarkech kéen in muchʼinba yéetel le máaxoʼob adorarkechoʼ,+
tu táan le máaxoʼob meyajtikechoʼ, yaan in beetik le baʼax in prometermoʼ.
26 Le utsul máakoʼoboʼ yaan u janaloʼob yéetel yaan u naʼajtaloʼob,+
yaan u alabartaʼal Jéeoba tumen le máaxoʼob kaxtikoʼ.+
Yaan u disfrutartik u kuxtaloʼob utiaʼal mantatsʼ.
27 Tuláakal yóokʼol kaabeʼ yaan u kʼaʼajal u yiikʼ yéetel yaan u suut tu yiknal Jéeoba.
Tuláakal le familiaʼob kajaʼanoʼob way luʼumeʼ yaan u chintaloʼob ta táan.+
28 Jéeobaeʼ Rey,+
letiʼ gobernartik le kaajoʼoboʼ.
29 Tuláakal le j-ayikʼaloʼob yaan way luʼumeʼ yaan u janaloʼob yéetel yaan u chintaloʼob tu táan,
tuláakal le máaxoʼob bíin suunakoʼob luʼumiloʼ yaan u xoltaloʼob tu táan,
mix juntúul tiʼ letiʼob jeʼel u páajtal u salvartik u kuxtal tu juunaleʼ.
30 U descendenciaʼobeʼ yaan u meyajtikoʼob Dios,
le paalaloʼob bíin síijkoʼoboʼ yaan u tsikbaltaʼaltiʼob máax Jéeoba.
31 Letiʼobeʼ yaan u yaʼalikoʼob bix u beetik justicia,
le baʼaxoʼob tsʼoʼok u beetik Diosoʼ yaan u tsikbaltikoʼob tak tiʼ le máaxoʼob maʼ síijkoʼoboʼ.