Lamentaciones
א [Alef]
3 Teneʼ tsʼoʼok in sen muʼyaj tumen le ka pʼuʼuj Dioseʼ tu castigartoʼon.
2 Letiʼeʼ tsʼoʼok u tojolchʼintken, tsʼoʼok u luʼsken teʼ sáasiloʼ, yéetel ku beetik in máan ich éeʼjochʼeʼenil.+
3 Letiʼeʼ máan kʼiin u líiʼsmaj u kʼab tin contra.+
ב [Bet]
4 Tsʼoʼok u beetik u pʼáatal minaʼan u muukʼ in wíinklil, tsʼoʼok u beetik u jaaytal in wootʼel.
Tsʼoʼok u kachik in baakeloʼob.
5 Tsʼoʼok u kʼalik in paach, tsʼoʼok u baʼpachtiken yéetel yaayaj óolal*+ bey xan yéetel baʼaloʼob beetik in muʼyaj.
6 Tsʼoʼok u beetik in wantal teʼ tuʼux éeʼjochʼeʼenoʼ, tsʼoʼok in pʼáatal jeʼex le máaxoʼob úuch kíimkoʼoboʼ.
ג [Guimel]
7 Tsʼoʼok u baʼpachtiken utiaʼal maʼ in púutsʼul.
Tsʼoʼok u kʼaxken yéetel nukuch cadenaʼob de cobre.+
8 Le kéen joʼopʼok in sen kʼáatiktiʼ áantajeʼ letiʼeʼ maʼatech u yóotik u yuʼub* in oración.+
9 Tsʼoʼok u kʼatik in beel yéetel tuunichoʼob.*
Tsʼoʼok u beetik in máan tiʼ loʼoloʼoch bejoʼob.+
ד [Dalet]
10 Letiʼeʼ bey juntúul oso táan u chʼúuktik in máaneʼ, bey juntúul león táan u chʼúuktikeneʼ.+
11 Tu cháacheneʼ ka tu jóoʼsen tiʼ le bejoʼ, tsʼoʼoleʼ ka tu xeʼexetʼen.
Tsʼoʼok u beetik in sen muʼyaj.+
12 Letiʼeʼ u listokíinmaj* u arco, u tuchʼubmen yéetel u flecha.
ה [Je]
13 Tu chʼaʼaj le flechaʼob* teʼ tuʼux u líiʼsmoʼ ka tu táatsʼmáansaj in riñónoʼob tu yéetel.
14 Tuláakal tuʼux táan in sen cheʼejtaʼal, le máakoʼoboʼ bul kʼiin táan u pʼaʼastikenoʼob yéetel le kʼaayoʼob ku beetkoʼoboʼ.
15 Tsʼoʼok u beetik in sen muʼyaj, maʼ tu xuʼulul u beetik in wukʼik u jaʼil altaniza.+
ו [Waw]
16 Ku kachik in koj yéetel chʼichʼiltuunich.
Ku beetik in balaʼkinba ich taʼan.+
17 Techeʼ tsʼoʼok a luʼsik le jeetsʼelil yaantenoʼ, tsʼoʼok tak in tuʼubsik bix le kiʼimak óolaloʼ.*
18 Le oʼolal kin waʼalik: «Tsʼoʼok u saʼatal in kiʼichkelmil, tsʼoʼok u xuʼulul in páaʼtik u yáantken Jéeoba».
ז [Zayin]
19 Kʼaʼajaktecheʼ táan in sen muʼyaj yéetel minaʼan in wotoch,+ kʼaʼajaktecheʼ táan in wukʼik kʼáakʼaj xíiw bey xan veneno.+
20 Le kéen kʼaʼajaktech bix in sen muʼyajeʼ yaan a taal tin wiknal yéetel yaan a wáantken.+
21 Teneʼ in wojel jach bey ken a beetiloʼ, le oʼolal yaan u chúukpajal in wóol in páaʼtech.+
ח [Jet]
22 Tumen jach nojoch u yaabilaj Jéeobaeʼ maʼ xuʼuluktoʼoniʼ,+
letiʼeʼ mantatsʼ ku chʼaʼik óotsilil tiʼ máak.+
23 Letiʼeʼ sáamsamal ku chʼaʼik óotsilil,+ junpuliʼ maʼ ken u pʼat kʼaasil máak.+
24 Teneʼ tsʼoʼok in waʼalik: «In wojel yaan u yáantken Jéeoba,+ le oʼolal yaan u chúukpajal in wóol in páaʼte».+
ט [Tet]
25 Jéeobaeʼ ku yeʼesik u yutsil tiʼ le máax ku kʼubik u yóol tiʼoʼ+ bey xan tiʼ le máax ku yilik u natsʼkuba tu yiknaloʼ.+
26 Jach maʼalob ka chúukpajak u yóol máak+ u páaʼt u salvartaʼal tumen Jéeoba.+
27 Maʼalob ka suukak tiʼ máak u aktáantik problemas desde tu táankelmil.+
י [Yod]
28 Le kéen tsʼaʼabak u kuuch máak tumen Dioseʼ chéen unaj u kutal u yuʼube, maʼ unaj u yaʼalik mix baʼaliʼ.+
29 Unaj u noktal luʼum,+ maʼ xaaneʼ jeʼel u chʼaʼabal óotsilil tiʼeʼ.+
30 Unaj u sutik u pʼuʼuk tiʼ le máax lajikoʼ, chéen unaj u yuʼubik u sen aʼalaʼal baʼal tiʼ.
כ [Kaf]
31 Jéeobaeʼ maʼ ken u xúumpʼattoʼon utiaʼal mantatsʼ.+
32 Kex tsʼoʼok u beetik k-muʼyajeʼ, tu yoʼolal u nojoch yaabilajeʼ yaan xan u chʼaʼiktoʼon óotsilil.+
33 Letiʼeʼ maʼ kiʼimak u yóol u beetik u muʼyaj wíinikiʼ mix xan u beetik u yaatal u yóoliʼ.+
ל [Lamed]
34 Le u xanaʼchaʼataʼal le máaxoʼob ku ganartaʼaloʼob yéetel ku bisaʼaloʼob táanxel luʼumiloʼ,+
35 le maʼ u beetaʼal justicia tiʼ juntúul máak kex táan u yilaʼal tumen le Maas Nojoch Diosoʼ,+
36 le u beetaʼal injusticia tiʼ juntúul máak teʼ súutuk táan u juzgartaʼaloʼ,
tuláakal le baʼaloʼob beyaʼ Jéeobaeʼ junpuliʼ maʼ tu páajtal u chéen ilik.
מ [Mem]
37 Mix máak jeʼel u yaʼalik junpʼéel baʼal yéetel ka béeychajkeʼ, chéen jaʼaliʼ wa Jéeoba aʼalmil ka úuchkeʼ.
38 Tu chiʼ le Maas Nojoch Diosoʼ
maʼ tu jóokʼol baʼaloʼob kʼaastakiʼ, chéen baʼaloʼob maʼalobtak.
39 ¿Yaan wa baʼax oʼolal u quejarkuba juntúul máak* kéen joʼopʼok u muʼyaj tu yoʼolal baʼax maʼ maʼalob u beetmiʼ?+
נ [Nun]
40 Unaj k-jach ilik bix kuxlikoʼon,+ le kéen tsʼoʼokkeʼ unaj k-suut yiknal Jéeoba.+
41 Unaj k-líiʼsik k-kʼab utiaʼal k-aʼalik tiʼ Dios yéetel tuláakal k-puksiʼikʼal:+
42 «Tsʼoʼok k-kʼebantal yéetel tsʼoʼok k-tsʼáaikba ta contra,+ chéen baʼaleʼ techeʼ maʼ a perdonartoʼoniʼ.+
ס [Samek]
43 Tumen pʼujaʼanecheʼ maʼ ta wuʼuyik k-oración.+
Tsʼoʼok a chʼaʼpachtikoʼon yéetel tsʼoʼok a kíimskoʼon, maʼ ta chʼaʼajtoʼon óotsililiʼ.+
44 Techeʼ a tsʼaamaj junpʼéel múuyal ta táan, le oʼolal maʼ tu kʼuchul k-oración ta wiknal.+
45 Techeʼ tsʼoʼok a beetik k-pʼáatal bey basura tu táan le kaajoʼoboʼ, tsʼoʼok k-pʼáatal mix baʼaloʼon tu táanoʼob».
פ [Pe]
46 Tuláakal k-enemigoʼobeʼ ku japik u chiʼob utiaʼal u tʼaanoʼob t-contra.+
47 Mantatsʼ saajkoʼon yéetel mantatsʼ táan k-muʼyaj,+ jach yaj yaniloʼon yéetel táan u bintoʼon kʼaasil.+
48 Teneʼ táan u chooj u jaʼil in wichoʼob tu yoʼolal baʼax tsʼoʼok u yúuchul tiʼ in kaajal.+
ע [Ayin]
49 Maʼ tu xuʼulul u yáalal u jaʼil in wichoʼob, maʼ tu jáawal,+
50 chéen yaan u jáawal le kéen u sutuba Jéeoba desde teʼ kaʼan utiaʼal u yilik bix u muʼyaj u kaajaloʼ.+
51 Teneʼ táan in muʼyaj tu yoʼolal le baʼaxoʼob kin wilik u yúuchul tiʼ le kaajoʼob yanoʼob tu baʼpach in kaajaloʼ.+
צ [Tsade]
52 Kex mix baʼal in beetmajtiʼobeʼ le máaxoʼob pʼekmilenoʼ tsʼoʼok u chukikenoʼob jeʼex u chuʼukul juntúul chʼíichʼeʼ.
53 Le ka lúuben teʼ jooloʼ letiʼobeʼ taakchaj u xuʼulskoʼob in kuxtal, joʼopʼ u pulkoʼob tuunichoʼob tin wóokʼol.
54 Tumen joʼopʼ u chooj jaʼ tu yóokʼol in pooleʼ tin waʼalaj: «¡Bey tsʼoʼokiktenaʼ!».
ק [Kof]
55 Jéeoba Dios, teneʼ tin chʼaʼchiʼitaj a kʼaabaʼ le tiaʼanen tu taamil le jooloʼ.+
56 Chʼenxikinteniʼ, maʼ a makik a xikin le kéen joʼopʼok in kʼáatiktech áantaj, salvarteniʼ.
57 Le ka tin tʼanechoʼ techeʼ náatsʼech tin wiknaleʼ ka ta waʼalajten: «Maʼ a chʼaʼik saajkil».
ר [Reix]
58 Jéeoba Dios, techeʼ ta defenderten, ta salvartaj in kuxtal.+
59 Jéeoba Dios, techeʼ tsʼoʼok a wilik le baʼax beetaʼabtenoʼ, beetten justicia.+
60 Techeʼ tsʼoʼok a wilik bukaʼaj u kʼasaʼaniloʼob tiʼ teen, bey xan tuláakal baʼax ku chʼaʼtuklikoʼob tin contra.
ש [Sin] wa [Xin]
61 Jéeoba Dios, tsʼoʼok a wuʼuyik bix u yaʼalikoʼobten baʼal bey xan tuláakal baʼax ku chʼaʼtuklikoʼob tin contra.+
62 Tsʼoʼok a wuʼuyik baʼaxoʼob ku jóokʼol tu chiʼ le máaxoʼob pʼekmilenoʼ, le baʼaxoʼob bul kʼiin táan u x-mukul aʼalikoʼob tin contraoʼ.
63 Jach ilawil tuláakal baʼax ku beetkoʼob, letiʼobeʼ ku pʼaʼastikenoʼob yéetel le kʼaayoʼob ku beetkoʼoboʼ.
ת [Taw]
64 Jéeoba Dios, techeʼ yaan a sutiktiʼob u jeel le baʼax ku beetkoʼoboʼ.
65 Techeʼ yaan a maldecirkoʼob, yaan a beetik u chichtal u puksiʼikʼaloʼob.
66 Jéeoba, techeʼ jach pʼujaʼanech le oʼolal yaan a chʼaʼpachtikoʼob yéetel yaan a xuʼulsiktiʼob way luʼumeʼ.